Հայաստանի ու Թուրքիայի հավաքականների խաղացողների տրանսֆերային արժեքները․ ովքեր են ամենաթանկ ֆուտբոլիստները
Եվրո-2024-ի ընտրական փուլի հերթական տուրի շրջանակում Հայաստանի հավաքականը երկու օրից՝ սեպտեմբերի 8-ին արտագնա խաղում կմրցի Թուրքիայի հավաքականի հետ։ Հայաստանի հավաքականը վաստակած 6 միավորով այս պահին գնտվում է D խմբի մրցաշարային աղյուսակի երկրորդ հորիզոնականում՝ զիջելով միայն Թուրքիային, որը 9 միավոր ունի, սակայն արդարության համար նշենք, որ Թուրքիան չորս խաղ է անցկացրել, մենք՝ երեք։ Խմբի հետնապահը Լատվիան է, որը երեք խաղում նույնքան պարտություն է կրել։ Ուելսը չորս խաղից հետո ընդամենը չորս միավոր ունի ու 4-րդ հորիզոնականում է։ Խմբի գլխավոր ֆավորիտ հանդիսացող Խորվաթիայի հավաքականը այս պահին երրորդն է, սակայն ընդամենը երկու խաղ է անցկացրել, դրսում հաղթել է Թուրքիային, տանը ոչ-ոքի խաղացել Ուելսի հետ։
Սեպտեմբերի 11-ին Երևանում ընդունելու ենք հենց Խորվաթիայի ընտրանուն։ Հայաստանի հավաքականի հետ առաջիկա խաղի համար Թուրքիայի հավաքականի գլխավոր մարզիչը թիմ է հրավիրել 24 ֆուտբոլիստների։ «Տրանսֆերմարկետի» տվյալների համաձայն՝ թուրք ֆուտբոլիստների տրանսֆերային ընդհանուր արժեքը կազմում է 250 միլիոն եվրո։ Հայաստանի հավաքականում ընդգրկված ֆուտբոլիստների տրանսֆերային հանրագումարը, նույն կազմակերպության տվյալներով, 32,5 միլիոն եվրո է։ Թուրքիայի հավաքականի ավագ և առաջատար, Միլանի «Ինտերի» կիսապաշտպան Հաքան Չալհանօղլուի տրանսֆերային արժեքը միայն գնահատվում է մոտ 40 միլիոն եվրո է։ Այս արդյունքով նա ամենաթանկ տրանսֆերային արժեքն ունեցող խաղացողն է թուրքերի կազմում։ Հայաստանի հավաքականի կազմում ամենաթանկ տրանսֆերային արժեքն ունեցող խաղացողը «Կրասնոդարի» առաջատարը դարձած Էդուարդ Սպերցյանն է, ում նկատմամբ եվրոպական ֆուտբոլում իսկական որս է սկսվել, սակայն հայազգի տաղադը դեռ շարունակում է ելույթները Ռուսաստանի առաջնությունում։ Նրա տրանսֆերային արժեքը գնահատավում է մոտ 12 միլիոն եվրո։
Կարծիքներ