Ծրագրի կեսը չեն յուրացնում

Ծրագրի կեսը չեն յուրացնում
Կրթության եւ գիտության նախարարության կոլեգիայում քննարկվել են Գիտելիքների թեստավորման կենտրոնի այս տարեսկզբին կատարած ուսումնասիրությունների արդյունքները՝ որոշ առարկաների գծով: Ստուգումներն իրականացվել են երկու մարզում՝ Սյունիքում եւ Երեւանի Քանաքեռ-Զեյթուն եւ Ավան համայնքներում, 8-11-րդ դասարաններում՝ բնագիտական եւ հումանիտար առարկաներից: Ստուգման արդյունքները, մեղմ ասած, կատաստրոֆիկ են. դրական գնահատականի շեմը չի հաղթահարել, այսինքն՝ ծրագրի նվազագույն ծավալը  չի յուրացրել «Քիմիա» առարկայից` սովորողների 62, «Աշխարհագրությունից»` 35, «Հայոց լեզվից»` 44, «Անգլերենից»` 47 տոկոսը: Սա խոսում է այն մասին, որ դպրոցական ծրագրերը խրթին են՝ մանկական ուղեղներին անհասանելի: Նույնը եւ դասագրքերը: Տարիներ շարունակ կեղծ, անմատչելի ուսումնական չափորոշիչներով գործող մեր կրթական համակարգը, փաստորեն, չի ծառայում իր նպատակին ու նշանակությանը՝ երեխաներին ոչ թե նվազագույն, անհրաժեշտ գիտելիքների ծավալ է փոխանցում, այլ 10-11 տարի դպրոցում անիմաստ ժամավաճառության մի կուռ համակարգ է  ստեղծել, որը զբաղված է հասարակության աչքերին թոզ փչելով: Ուսման համար լավագույն 10-11 տարի մեր երեխաները զբաղված են անպտուղ գործունեությամբ՝ միայն վկայական են ստանում: Հետաքրքիր է, թե ինչ են անելու այս արդյունքների հետ կրթության պատասխանատուները: Եթե դրանք ընդամենը հիմք են ծառայելու, որ անցանկալի տնօրեններին պատժեն կամ ստիպեն, որ սրանք կեղծեն հաջորդ ստուգումների ընթացքն ու արդյունքները, ապա մեր դպրոցները կշարունակեն առաջիկայում էլ ձեւ անել, թե գիտելիք են տալիս: Հասարակությունն էլ կշարունակի ձեւ անել, թե դպրոց ունի, որը մատաղ սերնդին կրթում է: