Իրանը չի պատրաստվում գնալ եւ ոչ մի զիջման

«Թշնամիներն ուզում են կասեցնել Իրանի միջուկային գործունեությունը, բայց Իրանի ժողովուրդը ոչ մի զիջման չի գնա»,- կրկին կտրուկ հայտարարությամբ է հանդես եկել Իրանի Իսլամական Հանրապետության նախագահ Մահմուդ Ահմադինեջադը:  Նա նշել է, որ Իրանն արդեն իսկ ստացել է միջուկային տեխնոլոգիաներ, թեեւ «թշնամի պետություններն ամեն ինչ արել են, որպեսզի խոչընդոտեն իրենց»: Ահմադինեջադը Արեւմուտքի համար երկու ճանապարհ է նախանշել. այն կամ պետք է համագործակցի Իրանի հետ, կամ շարունակի միջուկային ծրագրի դեմ հանդես գալ: Իրանի նախագահի խոսքով՝ երկրորդ տարբերակի ընտրության դեպքում Արեւմուտքը հաջողության չի հասնի:



«Իրանն արդեն իսկ տիրապետում է միջուկային տեխնոլոգիաներին, բայց մենք պատրաստ ենք համագործակցել նրանց հետ արդարության շրջանակներում»,- հայտարարել է երկրի նախագահը: Նշենք, որ Մահմուդ Ահմադինեջադի հայտարարությունը նախորդում է հունվարի 21-ին կայանալիք «5+1» ձեւաչափով բանակցություններին: Թուրքիայի մայրաքաղաքում Իրանի հետ բանակցությունների սեղանի շուրջ կնստեն Ֆրանսիան, Մեծ Բրիտանիան, Միացյալ Նահանգները, Ռուսաստանը, Չինաստանը եւ Գերմանիան: