Վահրամ Մկրտչյանը լուրջ չի վերաբերվում իշխանափոխության կոչերին

ՀԺԱՄ կուսակցության նախկին ղեկավար, ՀՀԿ ցուցակով համամասնական պատգամավոր դարձած Վահրամ Մկրտչյանն այն պատգամավորներից է, որ երեկ չքվեարկեց կառավարության ներկայացրած երկու նախագծերը, քվեարկությունից անմիջապես հետո մեզ հետ զրույցում նա վստահեցրեց, որ ինքը քվեարկել է, բայց հետո խորհրդարանի կայքում քվեարկության արձանագրությունից պարզվեց, որ չի քվեարկել: Մկրտչյանը համարվում է Հովիկ Աբրահամյանի երբեմնի ախոյան Տիգրան Սարգսյանի մտերիմ Բարսեղ Բեգլարյանի «մարդը» խորհրդարանում:

- Պարոն Մկրտչյան, ինչպե՞ս կբնութագրեք խորհրդարանում ստեղծված վիճակը, եզակի դեպքերից է, երբ ՀՀԿ-ն տապալում է կառավարության ներկայացրած նախագծերը, սա կառավարության վերաբերյալ խորհրդարանի դիրքորոշո՞ւմն էր, թե՞ ՀՀԿ-ն այլեւս չի տիրապետում իրավիճակին:

- Չեմ կիսում Ձեր ձեւակերպումը, թե տապալվեց, այդպիսի բան չկա, ուղղակի դահլիճում կային բացականեր, փաստացի երկու-երեք հոգի գործուղման մեջ են:

- Փաստն այն է, որ չընդունվեց երկու օրինագիծ, մինչդեռ նախկինում մոբիլիզացնում էին ուժերը, հետո նոր քվեարկության դնում, եթե վտանգ էր զգացվում, հետաձգում էին:

- Չեն անցել՝ հետո կանցնեն, այդտեղ ոչ մի քաղաքական հարց չկա, ՀՀԿ-ն շատ ամուր եւ կոնսոլիդացված է, նաեւ սատարում է Հովիկ Աբրահամյանին: Ես նոր մարդ եմ խորհրդարանում եւ տեսնում եմ մի շատ զարմանալի բան. շատ հաճախ ոչ իշխանական պատգամավորները հանձնաժողովներում գեղեցիկ բաներ են ասում, գալիս են նիստերին՝ դեմ կամ ձեռնպահ են քվեարկում: Վատ օրենքը բերում են՝ դեմ են, լավ օրենքը բերում են՝ էլի դեմ են: Ակնհայտ է, որ իրենք ուզում են խոչընդոտել, բայց չի ստացվի, մենք կայուն մեծամասնություն ենք եւ մտածում ենք մեր երկրի, մեր ժողովրդի համար:

- Ոչ իշխանականները կարծում են, որ լավ չեք մտածում, եռյակը երեկ հայտարարեց, որ մերժում է 12 կետերի վերաբերյալ իշխանության երկխոսության առաջարկը, հայտարարեց նաեւ, որ իրենք շարունակելու են իշխանափոխության ծրագրի իրագործումը, որով, ի վերջո, կտապալեն ձեզ: Սա ձեզ չի՞ մտահոգում:

- Դրանք ռոմանտիզմի ժանրից են կամ դետեկտիվ ֆիլմերի: Գոյություն ունեն հերթական նիստեր, մինչ դա իրենք պետք է կարողանան կոնսոլիդացված մնալ, որ հաջողության հասնեն, ես խիստ կասկածում եմ: Եվ երկրորդ՝ ՀՀԿ-ն եւ հանրապետության նախագահն իրենց տրամաբանությամբ համագործակցային սուբյեկտ են: Այսինքն՝ ինչ է դա նշանակում, ամբողջ գործունեության ընթացքում նախագահ Սերժ Սարգսյանը միշտ կոալիցիաներ է կազմել, համագործակցության ձեռք է մեկնել փոքր, միջին կուսակցություններին, որովհետեւ ՀՀԿ-ն կարծել է, որ մի խելքը լավ է, երկուսն ավելի լավ է, եւ համատեղ, միասնական գործունեության արդյունքում կարող ենք էլ ավելի լուրջ հորիզոններ նվաճել:

- Բայց ոչ բոլորն են ցանկանում քաղաքական առուծախի մեջ մտնել, ինչպես Ձեր դեպքում եղավ: Ժամանակին Դուք էլ ՀՀԿ-ի թունդ ընդդիմադիրներից էիք, հետո երկխոսվեցիք ու հիմա դարձել եք իսկական ՀՀԿ-ական:

- Հիմա ես չգիտեմ իսկական եւ ոչ իսկական ՀՀԿ-ականը որն է, բայց ՀԺԱՄ-ը փոքր ու միջին բիզնեսի պաշտպանության շահերից էր հանդես գալիս, իսկ ՀՀԿ-ն դա ընդգրկել է իր հայեցակարգային ծրագրերում: Մի խոսքով, ես էստեղ խորթություն չեմ զգում, ինձ լավ եմ զգում: Հիմա վերադառնամ եռյակին: ՀՀԿ-ն համագործակցության առաջարկ արեց, իրենք նախ նախապայման առաջ քաշեցին, հետո հրաժարվեցին: Իսկ մենք ասում ենք՝ եկեք քննարկենք ու կատարենք, դրա համար ժամանակագրություն պետք է լինի, հո միանգամից չե՞ն կատարվելու: Այսինքն՝ մենք պատրաստակամ ենք դա անելու, բայց ես տեսնում եմ, որ մեր գործընկերներն անընդհատ պահանջներ են փոխում, այսինքն՝ «վատ պարողին միշտ էլ ինչ-որ բան խանգարում է», եւ ես տպավորություն ունեմ, որ իրենք միշտ ուզում են մնալ արդիական, ընդդիմության կարգավիճակով եւ ինչ պահանջ էլ որ ձեւակերպեն, ու իշխանությունն անի, համոզված եմ, որ եւս մի պահանջ առաջ կբերեն, որ չհամաձայնեն երկխոսությանը: Հիմա իշխանությունն ասում է՝ եկեք բարեփոխենք Սահմանադրությունը, եւ այդ բարեփոխված Սահմանադրությունում բոլորդ էլ ձեր տեղը կունենաք արեւի տակ՝ համապատասխան չափաբաժնով, որ դուք կցանկանաք ստանալ:

- Իրենք համաձայն չեն ձեր առաջարկած գործարքին եւ ասում են, որ մենք ամբողջ իշխանությունը կվերցնենք, կմերժենք Սահմանադրությունը, որով առաջարկում եք հավերժացնել ձեր իշխանությունը:

- Նախ մենք գործարք չենք առաջարկում, այլ՝ համագործակցություն, որպեսզի երկրի առջեւ ծառացած խնդիրները լուծենք: Բացի դա, իրենք իրենց մտածողության մեջ այդքան էլ ազնիվ չեն, մի շարք խնդիրները, որոնք կուտակված են մեր երկրի առջեւ, դրանք նաեւ այն ժամանակներից են, երբ երկրի կառավարմանը մասնակից էին նաեւ այդ սուբյեկտները, հիմա դրանք մոռացել են եւ խնդիրների լուծման պատասխանատվությունը վերագրում են միայն ՀՀԿ-ին: Ես լուրջ չեմ վերաբերվում եռյակի իշխանափոխության կոչերին. սկսած 91 թվականից, երբ նոր նախագահ ու պետություն ունեցանք, ընդդիմությունը միշտ նման կոչեր է արել: Քավ լիցի, դա նրանց իրավունքն է եւ իրենց պարտականությունը: Երեւի եռյակն էլ հաշվարկել է ու պիտի մինչեւ հաջորդ ընտրություն զգոն մնա, որ դժգոհ զանգվածների ամբողջ պոտենցիալը կուտակեն: Բացի դրանից, մեծ հակասություն կա նրանց պահանջների մեջ, մի կողմից ասում են. փոխեք ընտրակարգը՝ դարձնելով ամբողջովին համամասնական, մյուս կողմից ասում են՝ պահպանենք նախագահական մոդելը: Իրենք ասում են, որ մեծամասնականները խանգարում են արդար ընտրությունների անցկացմանը, բայց նախագահի ինստիտուտն առաջնային մանդատ ստանալու ինստիտուտ է, դա սկզբունքորեն մեծամասնականի մանդատ է, այսինքն՝ շատ անձնավորված են այստեղ խոսում:

- Ի դեպ, Ծառուկյանի նախագահական հավակնություններին ինչպե՞ս եք վերաբերվում:

- Դա Ծառուկյանի խնդիրն է, ես չեմ կարող ասել, ժողովուրդը պետք է իր գնահատականը տա:

- Սովորաբար ժողովրդի ընտրած նախագահները փաստացի չեն ստանձնում այդ գործը:

- Փառք աստծո, մենք ժողովրդավար պետություն ենք, գուցե ժողովրդին թվացել է, թե իր թեկնածուն է հաղթել: