Ես կարծիք չունեմ

Սերժ Սարգսյանի փեսայի՝ Միքայել Մինասյանի հայտնի «լայվից» հետո վարչապետ Նիկոլ Փաշինյանի հրահանգով համացանցում ակտիվ գրոհ ձեռնարկած իշխող խմբակցության պատգամավորներն այս թեմայով «հրադադար» են վերցրել: Նրանք տարակուսած են Նիկոլ Փաշինյանի արտասովոր լռության փաստից՝ ինչու չի արձագանքում կամ գոնե իրենց պարզաբանում Մինասյանի հայտարարությունները։ Երկու օր է՝ նրանք այլեւս չեն բարձրացնում նույնիսկ ԱԱԾ նախկին տնօրեն Արթուր Վանեցյանին պատասխանատվության ենթարկելու հարցը, ով, ըստ Մինասյանի, Նիկոլ Փաշինյանի կողմից որպես սուրհանդակ էր ներկայացել իրեն եւ գործարք առաջարկել՝ սիմվոլիկ գումար վճարել՝ ազատ ապրելու դիմաց, գումարած՝ քաղաքական չեզոքություն պահպանել։ Ի դեպ, որոշ տեղեկություններով, այդ սիմվոլիկ գումարն այնքան էլ լիմվոլիկ չէ՝ խոսքը 50 մլն դոլարի մասին է:

Այս թեմայով երեկ զրուցեցինք «Իմ քայլի» պատգամավոր Նազելի Բաղդասարյանի հետ, ով, ի թիվս այլ պատգամավորների, Մինասյանի դեմ գրոհի ակտիվ մասնակիցներից էր, չնայած նրա մայրը՝ Մարգարիտա Մինասյանը, որը չորս տարի առաջ պայքարում էր Գյումրիի դրամատիկական թատրոնի տնօրենի պաշտոնի համար, ըստ հավաստի լուրերի, Միքայել Մինասյանի եւ նրա ընկերոջ՝ ՀՀԿ-ական նախկին պատգամավոր Արման Սահակյանի հովանավորչությունն էր վայելում: Այդ մասին մամուլը բազմիցս գրել է: Նազելի Բաղդասարյանից երեկ հետաքրքրվեցինք՝ Մինասյանի եւ իր մոր միջեւ ազգակցական կապ կա՞։ Նա վստահեցրեց, որ բացի ազգանունների համընկնումից, այլ կապ չկա: 

- Միքայել Մինասյանի հայտնի «լայվից» հետո ձեր ֆրակցիան միահամուռ ուժերով հուժկու գրոհ ձեռնարկեց, բարձրացնում էիք նաեւ Արթուր Վանեցյանին պատասխանատվության ենթարկելու հարցը, որ նա իր լիազորություններն է գերազանցել։ Դուք մասնագիտությամբ իրավաբան եք, Դուք է՞լ եք պնդում, որ ԱԱԾ տնօրենը պետք է պատասխանատվության ենթարկվի:

- Ես՝ որպես իշխող ուժի ներկայացուցիչ, բայց նախեւառաջ  որպես իրավաբան, ոսկե կանոն ունեմ՝ այն գործերը, որոնք գտնվում են իրավապահների տիրույթում, որեւէ կերպ չմեկնաբանել: Իմ դրական կամ բացասական կարծիքը կարող է կաշկանդել իրավապահների գործողությունները, այս նկատառումով չեմ մեկնաբանի:

- Եթե պարզվի, որ Նիկոլ Փաշինյանն է իսկապես հանձնարարել Վանեցյանին՝ գնալ եւ հանդիպել Մինասյանին, որպես իրավաբան՝ ի՞նչ կասեք․ ո՞վ պետք է պատասխանատվության ենթարկվի:

- Ես էլ եմ 15 տարի զբաղվել լրագրությամբ, գիտեմ հարցն այնպես տալ, որ ներքաշել պատասխանի: Կրկնում եմ՝ չեմ պատասխանի:

- Բայց ձեր թիմը շատ ակտիվ նման դեպքերում կարծիքներ է հայտնում, ինչպես հայտնի «լայվից» հետո Վանեցյանի դատաստանն էին տեսնում, ես ընդամենը տեսական պատասխան եմ ակնկալում: Միգուցե թիմում վստա՞հ եք, որ վարչապետը նման հանձնարարական չէր տա, դրա համար էիք նման գրառումներ անում:

- Ես նման բան չեմ ասել: Ես որեւէ բան չեմ մեկնաբանում այդ հարցի շուրջ, իրավապահների գնահատականը կլինի՝ կխոսենք:

- Ասենք Ձեզ՝ որպես իշխող թիմի անդամ, չի՞ հետաքրքրում՝ Փաշինյանը նման հանձնարարական տվե՞լ է, թե՞ ոչ, Դուք, օրինակ, պարզաբանում խնդրե՞լ եք ձեր թիմի ղեկավարից, թե՞ ոչ: Գոնե հանրությանը ժողովրդի վարչապետը ոչինչ չի պարզաբանել, նա համառորեն լռում է, իր խոսնակն անհրաժեշտություն չի տեսնում մեկնաբանելու, Ձեզ է՞լ չի հետաքրքրում:

- Իմ տեսակետներն ու դիրքորոշումները, մինչեւ իրավապահների հստակ դիրքորոշումներ չլինեն, ես պահում եմ իմ մեջ:

- Բայց հարցն ի՞նչ կապ ունի իրավապահների գործողությունների հետ:

- Քանի որ խնդիրն իրավական հարթության մեջ է, եւ իրավապահներն արդեն հատուկ գործողություններ են իրականացնում, ցանկացած գնահատական մնում է լուսանցքից դուրս:

- Ես գնահատական չեմ ուզում լսել, հարցնում եմ՝ Դուք տեղյա՞կ եք՝ եղե՞լ է նման հանձնարարական, կամ՝ Դուք իշխանության ներկայացուցիչ եք, տեղյակ չե՞ք, թե ինչ սկզբունքով է աշխատում իշխանությունը, արդեն որերորդ նախկին իշխանության ներկայացուցիչն է հայտարարում ստվերային գործարքի, բիզնես խլելու մասին: Հիմա հարցն այն է՝ իսկապե՞ս իշխանությունն ունակ է բիզնես խլելու, ստվերային գործարքներ կնքելու:

- Իսկ Դուք ի՞նչ եք կարծում:

- Ես լրագրող եմ, չեմ կարող կարծիք հայտնել:

- Դե, տեսեք, ես էլ կարծիք չունեմ, որովհետեւ ես վստահում եմ այն քաղաքական ուժին, որի հետ ճանապարհ եմ անցել, անցնելու եմ եւ կհայտնվեմ այն տեղում, որտեղ ՀՀ քաղաքացուն սպասվում է ապահով եւ բարեկեցիկ երկիր:

- Ստվերային գործարքների արդյունքո՞ւմ:

- Խնդրում եմ՝ իմ ասածները չմեկնաբանել:

- Ինչո՞ւ եք խուսափում այս պարզ հարցին պատասխանելուց, ինչո՞ւ է վարչապետը լռում:

- Ձեր հարցի հասցեատերը ես չեմ: Իսկ ընդհանրապես՝ ես բացառում եմ ցանկացած տեսակի ստվերայնություն: Թե ինչու, ըստ Ձեզ, հերքող կարծիք չի հնչում, մի պարզ պատճառով, որովհետեւ իրավապահները պետք է գործողություններ իրականացնեն, որ հանրության մեջ որեւէ կասկած չլինի, որովհետեւ շատ հանգամանքներ քաղաքական կոնյունկտուրայից դուրս են: Մենք իրավական երկրում ենք ապրում, եւ քաղաքական որեւէ հայտարարություն կարող է այդքան հիմնավոր չլինել, քան հստակ ապացույցներն ու իրավական գործողությունները: Կարծում եմ նաեւ՝ դա է պատճառը, որ քաղաքական թիմն այս պահին որեւէ կերպ չի մեկնաբանում, որպեսզի չասեն, որ իրավապահների վրա նաեւ որոշակի ազդեցություն են գործում: Ես հասկանում եմ, որ մենք կոնյունկտուրա ունեցել ենք նախկինում, հիմա, շատերի կարծիքով, միգուցե իրավապահ համակարգը թելադրանքով է աշխատում, սրանով մենք այդ սովորույթը ջարդում ենք:

- Այսինքն, հենց  նո՞ր որոշեցիք, որ այդպես պիտի անեք, երկու օր առաջ քննադատում էիք նույն պատմության առնվազն երկու հերոսներին, էլ չենք խոսում վարչապետի հայտարարությունների մասին։ Օրինակ, հիշում եք՝ բնապահպանության նախկին նախարար Արամ Հարությունյանի գործով ինչպիսի հայտարարություններ էր անում, թե դարի հանցագործությունն է բացահայտվել, այն պարագայում, երբ ոչ մի բան հայտնի չէր: Իսկ երբ խնդիրն իրեն է առնչվում, չի խոսում:

- Ես վստահ եմ, որ ցանկացած հայտարարության հիմքում իրավական հիմք կա, եթե չկա, հայտարարություն չի հնչում: