Աղասի Այվազյանի փառատոնը կփակվի «Արալեզով»
![Արթուր Սահակյան](/images/2010/10/7-ej-axasi-e1287994804447-400x249.jpg)
«Մետրո» թատրոնում շարունակվում են աշխատանքները Աղասի Այվազյանի «Արալեզ» պիեսի բեմականացման վրա, որով հոկտեմբերի 24-ին կփակվի փառատոնը: Ներկայացման բեմադրիչն է Արթուր Սահակյանը, ում հետ մենք հապճեպ հարցազրույց ունեցանք՝ խլելով փորձի թանկագին րոպեները: Ա. Սահակյանը չի աշխատում որեւէ թատրոնում, անկախ բեմադրիչի համարում ունի, փառատոնային ակտիվություն չի ցուցաբերում, աչքը չի տնկել պետբյուջեի փողերի ու «Սունդուկյանի» գեղարվեստական ղեկավարի բաղձալի աթոռի վրա: Մենք փորձեցինք իմանալ, թե ինչն է նրան գրավել այս փառատոնում:
- Զարմանալի է Ձեզ ներգրավված տեսնել որեւէ փառատոնի շրջանակում:
- Փառատոնների ես չեմ մասնակցում, ի ծնե: Խնդիրն այն է, որ ինձ դիմեց Աղասի Այվազյանի այրին, եւ ես հասկացա, որ այդ պարտավորվածությունը, որպես թատրոնի աշխատող, ես ունեմ: Ես այդ իմաստով շատ շնորհակալ եմ իրեն, որ ինձ այդ առիթը ընձեռեց, որպեսզի ես նախ ավելի խորը ծանոթանամ Աղասի Այվազյանի դրամատուրգիայի հետ եւ այս պիեսի շուրջ հանդիպեմ «Մետրո» թատրոնի անձնակազմին: Ես մի քիչ հեռու եմ թատերական օֆիցիալ միջավայրից, եւ ինձ համար ծանր է մասնակցել ցանկացած փառատոնի: Ես հույս ունեմ, որ այս ներկայացումը կյանք կունենա փառատոնից դուրս:
- Որպես բեմադրիչ՝ ի՞նչը կառանձնացնեք Աղասի Այվազյանի դրամատուրգիայում:
- Ես, ճիշտն ասած, պատրաստ չեմ ամբողջական կարծիք հայտնել Աղասի Այվազյանի դրամատուրգիայի մասին: «Արալեզը» ինձ շատ հետաքրքիր է թվում: Ամեն դեպքում, ինքը շատ կարեւոր հեղինակ ա հայ գրականության մեջ, շատ կարեւոր եւ շատ որակով:
- Դուք բեմադրություն դնելիս նախապես կանխատեսո՞ւմ եք, թե ինչ հարաբերություն կառաջանա ներկայացման ու հանդիսատեսի միջեւ:
- Ամեն ներկայացում անելիս դու ամեն ինչ անում ես, որ այդ հարաբերությունը ստացվի: Բայց այդ հարաբերությունը մի դեպքում անում ես մի մակարդակի վրա, Բեքեթի դեպքում մի այլ մակարդակի վրա ա, Աղասի Այվազյանի դեպքում՝ մի երրորդ մակարդակի վրա: Ես հիմա Բեքեթ եմ բեմադրելու: Ես գիտեմ, որ Բեքեթի համար դռները չեն ջարդելու, բայց դրանից ելնելով չանել էդ գործը՝ մեծ շռայլություն կլինի: Ներողություն՝ դա էլ մեր «քյարն» ա: Առանձնապես հասարակության մեջ ես թատրոնի պահանջ չեմ տեսնում: Ես տեսնում եմ ռաբիզի պահանջ: Բայց, իհարկե, առաջարկն է ծնում պահանջարկ: Թատրոնն ավելի վատ վիճակում չի, քան թե մյուս ոլորտները, ասենք՝ հեռուստատեսությունը: Ուղղակի եթե հեռուստաընկերությունը սովորաբար անտաղանդ ա լինում, թատրոնը տաղանդի խնդիր ունի: Թատրոնը ընդգծված անուշադրության մատնվեց: Այսօր դերասանը առանց երկմտելու ընդունում է սերիալում խաղալու առաջարկը, իսկ դա նշանակում է, որ նրա մասնագիտությունը ստորացված է: Բայց ես չեմ կարծում, որ այս տարիները լրիվ անպտուղ են եղել:
Կարծիքներ