Այսօր թանգարանների մուտքն ազատ է
![թանգարան](/images/2011/05/41-e1305357225921-400x250.jpg)
Հայաստանն արդեն 7-րդ անգամ մասնակցում է Եվրոպայի խորհրդի եւ ՅՈՒՆԵՍԿՕ-Ի աջակցությամբ ու հովանավորությամբ անցկացվող «Թանգարանային գիշեր» - «Գրավոր հիշողություն» միջոցառումների շարքին, որը համակարգում է ՀՀ մշակույթի նախարարությունը:
Այս մեծամաշտաբ միջոցառմանը միաժամանակ մասնակից կդառնան աշխարհի 40 երկրների հազարավոր թանգարաններ: Մասնակցելու են ոչ միայն Երեւանի, այլ նաեւ Հայաստանի բոլոր մարզերի մշակութային օջախները, թանգարանները, որոնք հանդես կգան հատուկ տոնական միջոցառումներով, մշտական գործող ցուցադրությունների կողքին տեղի են ունենալու նաեւ երաժշտական, թատերական ներկայացումներ:
Այս տարի, Հայաստանի Ազգային պատկերասրահում, ամենատարբեր միջոցառումների կողքին, առաջին անգամ Երեւանի Մնջախաղի պետական թատրոնը կներկայացնի «Հայկական տառեր» բեմադրության պրեմիերան, ինչպես նաեւ Ռոբերտ Սահակյանցի հայկական մուլտֆիլմերը:
Վարդգես Սուրենյանցի սրահում կներկայացվեն Արա Գեղեցիկի եւ Սալոմեի մենախոսությունները: Հովհ. Թումանյանի «Ախթամար» պոեմի հիման վրա նկարահանված կինոնկարը կցուցադրվի մեկ այլ՝ Ե. Չարենցի անվան գրականության եւ արվեստի թանգարանում:
Մ. Սարյանի տուն- թանգարանում էլ ցուցադրություններից բացի նախատեսված է նաեւ վոկալ եւ կամերային երաժշտության համերգ, իսկ ջազ երաժշտության սիրահարները կարող են ջազ ունկնդրել Ժամանակակից արվեստի թանգարանում:
«Ծիծաղաշարժ պատկերներ կոմպոզիտորի կյանքից» խորագրով ցուցահանդես է նախատեսված Ալ. Սպենդիարյանի անվան տուն-թանգարանում, որտեղ «Կակաո՝ Սպենդիարյանի բաղադրատոմսով» խաղ- վիկտորինայից բացի կցուցադրվի «Վերադարձ» ֆիլմը:
Փարաջանովի տուն-թանգարանում կցուցադրվեն Ուկրաինայից ստացված՝ Ս. Փարաջանովին վերաբերվող գաղտնազերծված նոր փաստաթղթերը: Դ. Դեմիրճյանի տուն-թանգարանում էլ, «Դեմիրճյանական նորօրյա քաջնազարները» գրական երեկոյից բացի, կներկայացվի «Պույպույ մուկիկը» տիկնիկայինը:
«Ջանգյուլումին» նվիրված Համբարձման տոնի վիճակահանությունից բացի, Հովհ. Թումանյանի թանգարանում կլինեն նաեւ ինտերակտիվ խաղեր, ինչպես նաեւ «Կիթառի հնչյունները» համերգը: Իսկ «Ռոտոնդա» թատերախումբը կներկայացնի «Ռուբենս» բեմադրությունը:
Որպես եզրափակիչ ակորդ, կեսգիշերից մեկ ժամ առաջ, Էրեբունի թանգարանում կկազմակերպվի տոնական ընթրիք՝ թանգարանների միջազգային օրվան նվիրված:
Կարծիքներ