Գորիսում թթի արաղի փառատոն են կազմակերպել

Սյունիքի նախկին մարզպետ Սուրեն Խաչատրյանը նորից իր «ափսեում» է, իր ռեժիմը Սյունիքում վերականգնելու փորձերն իզուր չանցան, եւ նախկին մարզպետն այնքան է ակտիվացել, որ իրեն ոչ թե «այլընտրանքային», այլ «ուղիղ» ղեկավար է համարում: Նա ամեն ինչ ուզում է անել, որպեսզի ցույց տա, որ մարզում «ասողն» ինքն է, եւ գործող մարզպետ Վահե Հակոբյանն ընդամենը «անգլիական թագուհի» է: Լիսկայի ակտիվության դոզան այնքան մեծ է, որ նրա մտահղացումները դուրս են գալիս տրամաբանության շրջանակներից: Օրինակ, մոտ մեկ-երկու ամիս առաջ է Գորիսում թութը վերջացել, սակայն այսօր քաղաքում կազմակերպվելու է թթի փառատոն: Մտահղացումը նախկին մարզպետինն է, որոշել է մեծ կերուխում, գինարբուք սարքել՝ ուրախացնել գորիսեցիներին: Այս եւ այլ հարցերի վերաբերյալ զրուցեցինք Սուրիկ Խաչատրյանի հետ: «Ես չեմ կազմակերպել, քաղաքապետն է կազմակերպել»,- եղավ թթի փառատոնի մասին պատասխանը, բայց զրույցից պարզվեց, որ ամեն բան գիտի այդ փառատոնի մասին:

- Ինչո՞ւ հիմա, ինչո՞ւ «Թթի փառատոն», երբ արդեն թութ չկա:

- Թութ չկա, թթի արաղ կա: Փառատոնը պետք է լիներ մայիսի կողմերը կամ հունիսի սկզբին, բայց դե՝ չեղավ, հիմա կլինի: Կմասնակցեն գորիսեցիները, հյուրեր մշակույթի նախարարությունից, տարբեր համայնքապետեր:

- Ո՞րն է այդ փառատոնի նպատակը:

- Դե դա մշակույթի նախարարության հետ է որոշվել, դեռեւս նախկին քաղաքապետի ժամանակ որոշեցինք, որ այդպիսի փառատոն պիտի անեն, դա հետաձգվեց, հիմա նոր քաղաքապետը կյանքի է կոչում:

- Ասում են՝ ակտիվ երեւալու Ձեր մոլուցքն է ստիպել ամառվա այս եղանակին այդպիսի անհեթեթ միջոցառում կազմակերպել:

- Ես չգիտեմ էդ ով է նման բան ասում, բայց ես արդեն ասեցի, որ էդ փառատոնը նախկին քաղաքապետի եւ մշակույթի նախարարության համատեղ նախաձեռնությամբ պետք ա լիներ: Ու ես դրա հետ ոչ մի կապ չունեմ, ես դաժե կարող ա չմասնակցեմ, Արցախում եմ, ու եթե թութ էլ չկա, չգիտեմ դաժե ինչ պետք ա անել, քաղաքապետը թող մտածի:

- Իսկ գո՞հ եք նոր քաղաքապետի աշխատանքից, Դուք հասաք նրան, որ էլի Ձեր «մարդը» բազմեց Գորիսի քաղաքապետի աթոռին:

- Դե կաշխատի, էլի, ընդամենը մեկ ամիս ա, որ կա, չեմ կարծում, որ մեկ ամսվա համար կարելի ա գնահատական տալ, սպասենք՝ հարյուր օրվա տրադիցիան լրանա, ինքն էլ կիսվի իր կատարած աշխատանքներով, էդ ժամանակ միասին կգնահատենք:

- Բայց խոսում են, որ ոչ թե նա, այլ Դուք եք կառավարում Գորիսը, ընդունելություններ կազմակերպում բնակիչների հետ Ձեր շտաբում, նրան ուղղորդում:

- Որ ընդունում եմ գորիսեցիներին, նրանց խնդիրները լուծում, դա միանշանակ ա, բայց քաղաքի կառավարումը քաղաքապետն ա զբաղվում, ես ընդամենը իմ գործն եմ անում, եթե իսկապես մարդիկ կարիքի մեջ են, օգնում եմ, քաղաքում ինչ-որ տարածքներ բարեկարգելու խնդիր կա՝ անում: Ես ունեմ իմ կաբինետը, եւ դա շատ վաղուց ունեի եւ էդ կաբինետում էլ նստում եմ, դա ոչ շտաբ ա, ոչ էլ, այլ «Սյունիք-Զանգեզուր» բարեգործական հիմնադրամի որպես նախագահ էդ կաբինետն ա:

- Դե տեսնո՞ւմ եք, որ ձեռք չեք քաշում եւ Ձեզ այլընտրանքային ղեկավար եք կարգել:

- Չէ այլընտրանքային չեմ, ուղղակի եմ, այո:

- Այսինքն՝ հավակնություններ ունեք նորից հետ գալու, ղեկավար աթոռներ զբաղեցնելու:

- Բայց հիմա պասիվ եմ, խի՞:

- Օրինակ՝ ի՞նչ եք անում:

- Հիմա, էս պահին Գորիսում շատ գեղեցիկ հրապարակ եմ բարեկարգում, դրա կողքին էլ մի հատ շատ լուրջ, մեծ զոհվածների հուշարձան, հիմա պետք ա սկսեմ փողոցների բարեկարգման աշխատանքները:

- Իսկ ի՞նչ կարգավիճակում եք անում, մարզպետ կա, քաղաքապետ կա…

- Դե, հիմա քաղաքապետն էդ հնարավորությունները չունի, դրանք մեծ գումարների հետ են կապված, հիմա առանց միջոցների ո՞վ ինչ կարող է անել:

- Փաստորեն, ստարտի կանգնած եք եւ ղեկավար աթոռի եք պատրաստվում վերադառնալ: Հավակնո՞ւմ եք որեւէ պաշտոնի:

- Դե, դա ղեկավարությունը պետք է որոշի: Եթե իրենք գտնեն, որ կարող եմ ինչ-որ տեղ դերակատարում ունենալ, ուրեմն կունենամ, եթե պետք ա էս կարգավիճակով մնամ, ուրեմն կմնամ, ոչ մի խնդիր էլ չկա:

- Հովիկ Աբրահամյանի հետ մտերիմ եք, ի՞նչ է ասում նա, Ձեզ նոր պաշտոն տալո՞ւ է, գնահատականը Ձեր մասին ինչպիսի՞ն է:

- Դե, իրանից պետք ա հարցնեք, դե, մտերիմ ենք դեռ 90-ական թվականից, ինքն էլ էր քաղսովետի նախագահ, ես էլ, մենք համագործակցում էինք, հետո 95-ից ԱԺ-ում՝ պատգամավորներ, եւ դեռ մինչեւ էսօր մեր մտերմությունը մնում է, մենք եղել ենք կոլեգաներ:

Նա հիմա էլ վճռական քայլերով է սկսել, հանրությունն էլ է դա տեսնում, մանավանդ որ ինքն ամեն ինչից տեղեկացված ա՝ գյուղից, քաղաքից, մարզից, երկրից, պրակտիկ մարդ ա, եւ դա իրան հնարավորություն է տալու շատ բաներ անի:

- Դուք վերջերս հաճախ եք երեւում Մանվել Գրիգորյանի կողքին, վերջին համագումարում էլ վարչության անդամ դարձաք, կարծում եք՝ անելի՞ք ունեք ԵԿՄ-ում:

- Ո՞նց, ես 1988թ.-ից զենք եմ վերցրել, պատերազմում եղել, առաջին մարդկանցից մեկը ես էի, որ զենք վերցրեցի, ԵԿՄ վարչության ստեղծման առաջին օրից եմ անդամ եղել ու հաստատ անելիքներ ունեմ:

- Փաստորեն, հունիսի 1-ը՝ Բուդաղյանների հետ տեղի ունեցած միջադեպը, Ձեր կյանքում ոչինչ չի փոխել…

- Ես չեմ ուզում այդ մասին լսեմ, այդ մասին որեւիցե բան պատասխանեմ, դա իմ կյանքում վատ էջ է:

Լուսինե ՇԱՀՎԵՐԴՅԱՆ

[email protected]