2015-ի մարտի 1-ից առաջ Հայաստանում նոր մարտի 1-ի վտանգ կա

Սերժ Սարգսյանը խուսափեց «ժողովրդի թշնամի» արտահայտությունից եւ դրա փոխարեն օգտագործեց «չարիք» բառը: Բայց, միեւնույն է, ռեպրեսիաները երկար չսպասեցրին: Քաղաքական «չիստկայի» մասին կուսակցապետի հրահանգի հաջորդ օրը եւեթ՝ փետրվարի 13-ին, ԱԺ նախագահն սկսեց հիմքեր նախապատրաստել Ծառուկյանին մանդատից զրկելու համար: Սրան «անշառ» անուն դրեցին՝ ուսումնասիրություն: 3 օրից հայտնի դարձավ, որ ոստիկանապետն ազատել է Պետական պահպանության գլխավոր վարչության շուրջ 200 աշխատակցի, որոնք հսկում էին ԲՀԿ առաջնորդի օբյեկտները: Այս գործողությունը եւս խաղաղ անվանում ստացավ: Ներկայացվեց ոստիկանությունում ընթացող բարեփոխումների, պայմանագրերի վերանայման շրջանակում:

Ոստիկանության լրատվության վարչության պետ Աշոտ Ահարոնյանը թիվ չնշեց: Ասաց, որ ՊՊԳՎ-ում կադրային փոփոխություններ են. «Եղել են ազատումներ, եղել են նոր նշանակումներ»: Բայց որքանո՞վ է օրինական միանգամից այսքան պայմանագրեր լուծելը: «Պայմանագրեր եղել են, բայց չեն խզվել, ուղղակի մարդիկ են փոխվել»,- պատասխանեց Ահարոնյանը: Պաշտոնական հաղորդագրության մեջ էլ ասված է. «Խնդիրն անվտանգության ապահովումն ավելի փորձառու կադրերով իրականացնելն է»: Կարող է թվալ, թե Վլադիմիր Գասպարյանն օր ու գիշեր մտածում է, թե ոնց անի, որ Ծառուկյանի օբյեկտներն ավելի լավ հսկվեն, եւ որ դրանք ավելի անվտանգ լինեն: Իրականում, սակայն, այսկերպ ոստիկանապետը զինաթափեց Ծառուկյանի զորքը: Այն զորքը, որի մասին լեգենդներ էին պտտվում: Լեգենդներ, որոնք Սերժ Սարգսյանը հրամայեց ստուգել: Նա չէր կարող չիմանալ, թե ինչպես է գոյացել այս զորքը:

Գաղտնիք չէ, որ ԲՀԿ օբյեկտները հսկող ոստիկաններն այնքան էլ «ճիշտ» ոստիկաններ չէին, այլ Ծառուկյանի մարդիկ էին՝ նրա ծանոթ-բարեկամ, համագյուղացի տղերքը, որոնց վերջին 5-6 տարիներին, ԲՀԿ առաջնորդին արված լավության կարգով, ընդունել էին Պետական պահպանության վարչություն, ոստիկանի համազգեստ տվել եւ, ամենակարեւորը՝ ավտոմատներ եւ մարտական ատրճանակներ: Այդ օբյեկտները ոստիկանության հետ պայմանագրեր էին կնքում եւ վճարում իրենց ստացած պահպանության ծառայությունների դիմաց: Աշխատավարձից բացի, Ծառուկյանի օբյեկտները հսկողները նաեւ ծրար էին ստանում, այնպես որ, նրանք ավելի հարուստ էին, քան ոստիկանության շարքային «պահակները», որոնց աշխատավարձերը բարձրացվեցին բոլորովին վերջերս, իսկ նախկինում նրանք այնքան ցածր էին վարձատրվում, որ ստիպված ազատ ժամանակ կոշկակարություն կամ «մալյարություն» էին անում: Իսկ Ծառուկյանի անվտանգության աշխատակիցները լավ վարձատրվող եւ մարտական զենքով, ավտոմատներով զինված տղաներ էին, որոնց զինաթափելուց էլ, ըստ էության, սկսվեցին ռեպրեսիվ գործողությունները:

Նույն օրը երեկոյան ԱԺ ԲՀԿ-ական պատգամավոր Ռուստամ Գասպարյանի տունը շրջապատեցին քաղաքացիական հագուստով իրավապահները եւ խուզարկություն անցկացրին, փնտրելով պատգամավորի որդուն: Նրանք տակնուվրա արեցին տունը, սակայն տղային չգտան: Գասպարյանի գյուղում՝ Ջանֆիդայում, խուճապ բարձրացավ, իսկ առավոտյան Քննչական կոմիտեն բացատրեց, որ ընդամենը «միջոցներ է ձեռնարկում» 2014 թվականին կատարված դեպքի «հանգամանքների բազմակողմանի եւ լրիվ հետազոտումն ապահովելու ուղղությամբ»: Խոսքը 2014 թվականի գործի մասին է, որի շրջանակներում Գասպարյանի 22 տարեկան որդուն՝ Ռոմանին, մեղադրում էին մարդու առեւանգման մեջ: Նա, ըստ նյութերի, իր ընկերոջ հետ, որն ի դեպ ոստիկան էր, սոցիալական ցանցերի միջոցով ծանոթացել էր մի երիտասարդի հետ, տարել էր նրան ավտոմեքենայով Ջանֆիդա գյուղ, իսկ հետո, կասկածելով, որ նա ոչ ավանդական կողմնորոշում ունի, ծեծել էր:

2014-ին պատգամավորի որդու հանդեպ հետախուզում հայտարարեցին, սեպտեմբերին կալանավորեցին, իսկ 2 ամիս անց խափանման միջոցը փոխեցին եւ ազատ արձակեցին: «Մի քանի անգամ Ռոման Գասպարյանին հրավիրել են, չի եկել, գործով ծանուցագիր են ուղարկել»,- պարզաբանեց Քննչական կոմիտեի մամուլի խոսնակ Սոնա Տռուզյանը: Բայց կարեւորն այն է, որ դարակներում քնած քրգործի մասին մարդիկ հիշել են ճիշտ ժամանակին:

Նույն օրը իրավապահները նկատեցին նաեւ, որ Ռուբեն Գեւորգյանը Դավիթաշենի 4-րդ թաղամասի իր հյուրանոցում մարմնավաճառներ է ընդունում, եւ մի քանի աղջիկների տարան բաժին: Ծաղիկ Ռուբոն հայտարարեց, որ իր հյուրանոցում չկան մարմնավաճառներ, դա նորմալ հանգստի վայր է: Իրականում, սակայն, ոչ մի «նորմալ» էլ չէ, քանի որ այդ հյուրանոցի սենյակներում «ռեսպուբլիկա խայտառակող» բաներ են կատարվում՝ «հեռուստացույցով հեռարձակվում են պոռնոգրական նյութեր»: Ակամայից հիշեցինք 2008 թվականը, երբ մոտավորապես նույն տեքստը տարածել էին Հակոբ Հակոբյանի՝ Լեդի Հակոբի հյուրանոցում պոռնկատուն հայտնաբերելու մասին:

Փետրվարի 16-ին ոստիկանական գործողություններ կատարվեցին նաեւ Գյուրջյան փողոցի մի սուպերմարկետի մոտ, որտեղից բերման ենթարկեցին «Բարգավաճի» Նոր Նորքի տարածքային կառույցի ղեկավար 1971թ. ծնված Արթուր Մամոյանին, առգրավելով նրա զենքը: Իսկ երեկ լուրեր պտտվեցին, որ ձերբակալել են Արմավիրի, Մարալիկի ԲՀԿ տարածքային կառույցների ղեկավարներին, շարքային ԲՀԿ-ականների եւ ակտիվիստների: Օրինակ, ԲՀԿ-ական Արման Չատինյանին տարել էին Արաբկիրի բաժին, որովհետեւ նա ալկոհոլ է օգտագործել, ծեծել է կնոջը, ջարդուխուրդ է արել իրերը, կինն էլ բաժին է զանգել: Ինչո՞վ բերման ենթարկելու առիթ չէ: Մի գող էլ Շենգավիթում են բռնել՝ Գայանե Քոչարյան, ով, իբր, ԲՀԿ-ական է: Չի բացառվում, որ շուտով բոլոր ԲՀԿ-ականները կներկայացվեն որպես գողեր եւ թմրամոլներ, ճիշտ այնպես, ինչպես արվեց մարտի մեկից հետո, եթե, իհարկե, հաշտություն չկայանա կողմերի միջեւ, ինչի մասին երեկոյան արդեն լուրեր էին պտտվում:

«Իշխանություններն անցել են բոլոր սահմանները եւ սկսել են բացահայտ ահաբեկչական գործողություններ իրականացնել… փորձելով վախի եւ բռնությունների միջոցով ճնշել համաժողովրդական շարժումը»,- երեկ հայտարարեց ԲՀԿ գրասենյակը, տեղեկացնելով, որ ահաբեկությունից տուժածներին իրավական օգնության խումբ է ստեղծվում: Եվ սա եւս եղել է մարտիմեկյան օրերին: Այսպես, 2015-ի մարտի 1-ից առաջ Հայաստանում նոր մարտի 1 է սարքվում: