Պուտինը պատասխանեց նաեւ «Հրապարակի» հարցին ԼՂ հակամարտության մասին
Ինչպես արդեն տեղեկացրել էինք, այսօր «Ուղիղ կապ Պուտինի հետ» նախագծին հարց էր ուղղել նաեւ «Հրապարակը»` կապված ԼՂՀ հակամարտության կարգավորման՝ Պուտինի անձնական տեսլականի հետ: Իհարկե, հասկանալի պատճառներով, հարցը որոշակիորեն խմբագրվել էր ՌԴ նախագահի օգնականների կողմից, սակայն պահպանվել էր հիմնական բովանդակությունը, որին էլ պատասխանեց ՌԴ նախագահը:
Այսպես «Հրապարակն» իր հարցերում գրել էր.
- Ինչպե՞ս եք անձամբ Դուք տեսնում ԼՂ հակամարտության այս իրավիճակում դեպքերի հետագա զարգացումը,
- Ռուսական ԶԼՄ-ների հրապարակումներից պարզ էր դարձել, որ Դուք արբանյակի միջոցով տեղյակ եք եղել և հետևել եք զորքերի տեղաշարժին: Այդ դեպքում ինչո՞ւ չեք կանխարգելել:
- Կշարունակի՞, արդյոք, Ռուսաստանը զենք վաճառել Ադրբեջանին:
Այս հարցերից ուղիղ եթերում հնչեց միայն առաջինի պատասխանը, այն է՝ ինչպիսի՞ն է ՌԴ նախագահը տեսնում ԼՂ հակամարտության հետագա զարգացումը: Հարցը խմբագրվել էր և փոխվել էր շեշտադրումը՝ ինչպիսի՞ն է անձամբ ՌԴ նախագահը տեսնում խնդրի կարգավորումը: Ի պատասխան այս հարցի՝ Պուտինը նշեց, որ «ՌԴ-ում ապրում են միլիոնավոր հայեր եւ ադրբեջանցիներ, ում միջեւ նորմալ հարաբերություններ կան, փառք Աստծո, եւ այդպես էլ պետք է լինի»: ԼՂ հակամարտության առնչությամբ ՌԴ նախագահը նշեց, որ Ռուսաստանը շարունակելու է ջանքեր ներդնել, որպեսզի հակամարտությունը կարգավորվի խաղաղ բանակցային ճանապարհով, սակայն նաեւ ընդգծեց, որ խնդրի վերջնական կարգավորումը պատկանում է Հայաստանի եւ Ադրբեջանի ղեկավարությանը: Ռուսաստանի ղեկավարն իր խոսքում նշեց, որ հակամարտությանը պետք է վերաբերվել բժշկական «Մի վնասիր» հայտնի սկզբունքին համեմատ, եւ պետք է գտնել փոխզիջումային տարբերակ:
Կարծիքներ