Արտաշատից Հրազդան եկած Արամ Դանիելյանի համախոհները նրան բարոյապես աջակցելու համար են (տեսանյութ)
Հրազդանի գործող քաղաքապետ Արամ Դանիելյանը քիչ առաջ կատարեց իր քաղաքացիական պարտքը՝ քվեարկելով 25/20 ընտրատեղամասում: Ո՞ւմ օգտին է քվեարկել գործող քաղաքապետը, հաստատ ոչ Սասուն Միքայելյանի: Քվեարկությունից հետո Արամ Դանիելյանը խոսեց լրագրողների հետ և համոզմունք հայտնեց, որ հաղթողն ինքն է լինելու. «Կարծում եմ, որ ես չեմ պարտվելու: Ես այն մարդն եմ, որ կոնֆլիկտային չեմ, հաղթողին պետք է շնորհավորել».- ամեն դեպքում շեշտեց քաղաքապետը՝ պատասխանելով այն հարցին, թե պարտության դեպքում կշնորհավորի հաղթողին:
Hraparak.am-ի հարցին, թե նկատե՞լ է մարզպետարանի մոտ այսօր կայանված երկու ավտոբուսները, որոնք մարդ էին բերել Հրազդան, քաղաքապետն Արտաշատում բարեկամներ ունի՞. «Մենք բոլոր տեղերում էլ բարեկամներ ունենք, որովհետև ՀՀ-ն շատ փոքր հանրապետություն է, մարդիկ եկել էին, իմ համախոհները եկել էին ինձ աջակցեն: Էդ խի՞ չեք ասում, որ 20 օր է` Իջանից Երևանից, Կիրովականից, Լենինականից, որ հրազդանցիներ քարոզչություն են անում, դրա մասին չեք ասում, այսօր մարդիկ եկել են, որ ինձ աջւակցեն: Գիտեք կա բարոյական աջակցություն, կողքովս քայլելով, ի՞նչ պետք է անեն, եթե այստեղի գրանցում չունեն: Իմ կողքին ամբողջ հրազդանցիներն են կանգնած: Ես վստահ եմ, հրազդանցին գոհ է իմ աշխատանից: 14 տարիների ընթացքում բնականաբար քաղաքում մենք բազմաթիվ խնդիրներ ունենք: Քաղաքի բյուջեով չես կարա, Հրազդանի նման սպեցիֆիկ քաղաքի խնդիրները լուծես: Մենք ունենք քաղաքի զարգացման ծրագիր, տարիների ընթացքում այդ խնդիրները կլուծվեն»:
Հետաքրքրական էր, որ Արամ Դանիելյանն այսօր խոսեց իր բիզնեսների մասին, լրագրողները նկատել էին վերջինիս թանկարժեք մեքենան և հետաքրքրվեցին, թե ինչ միջոցներով է այն գնել. «Դա իմ անձնական մեքենան է, իմ անձնական միջոցներով: Ես բիզնես էլ ունեմ, իմ բարեկամների բիզնեսների օգնությամբ: Դուք կկարդաք, կտեսնեք»: Երբ լրագրողները պնդեցին, թե կոնկրետ ինչ բիզնեսի մասին է խոսքը, միջամտեց Արամ Դանիելյանի նախընտրական շտաբի պետ Կարեն Մարգարյանը. «Հավատարմագրային կառավարման բիզնեսներ են, որևիցե խնդիր, կարծում ենք, չկա»:
Թեպետ Արամ Դանիելյանը թանկարժեք մեքենա ունի, բայց անգամ իր մեքենայի «բարօրության» համար ճանապարհները լավ կարգի չէր բերել. «Դուք կարող է ճանապարհաշինությունից չեք հասկանում: Հրազդանում կա 193 կիլոմետր գլխավոր ճանապարհ, մենակ դրա պահպանման համար, որ 6 ամիս ձմեռը և 35 մինուս ջերմաստիճանի սահմաններում այդքան ավազ ու աղ լցրու, քայքայվում է,,այդ ճանապարհները պահպանելն արդեն մեծ աշխատանք է»:
Նշենք նաև, որ այդ ողջ ընթացքում մի տատիկ էր սպասում քաղաքապետին, նրա «դեմքին շպրտելու» համար, որ 10 տարի առաջվա իր խոստումը չի կատարել:
Մանրամասները՝ տեսանյութում:
Կարծիքներ