Թող տեսնեն, որ մեր երեխեքը սոված են
hraparak
16 Փետրվար 2011 | 12:30
0
Երեկ կառավարության շենքի դիմաց բացօթյա առեւտուրն արգելելու Երեւանի քաղաքապետի որոշման դեմ կրկին բողոքի ցույց են արել նախկին առեւտրականները: Կառավարությունից ոչ մի պատասխան չստանալով` ցուցարարները շարժվել են դեպի ՄԱԿ-ի հայաստանյան գրասենյակ եւ այնտեղ շարունակել բողոքի ակցիան:Ի տարբերություն հայրենի չինովնիկների անտարբերության՝ քաղաքապետի որոշման դեմ բողոքողների 3 հոգանոց պատվիրակությանն ընդունել է ՄԱԿ-ի հայաստանյան գրասենյակի ղեկավար Դաֆինա Գերչեւան: Վերջինս, ցուցարարների փոխանցմամբ, չնայած ասել է, թե «իրենք այն ինստանցիան չեն, որ խնդիրը լուծեն, իրավասու չեն», սակայն խոստացել է, որ հարցը կբարձրացնի կառավարության հետ առաջիկա հանդիպման ժամանակ:
Գերչեւան, ըստ ցուցարար-պատվիրակների, իր աջակցությունն է հայտնել նրանց, որ «միահամուռ բիզնես պլանի» ներկայացման պարագայում իրենք կտրամադրեն մարդիկ, ովքեր անվճար կօգնեն նրանց բիզնեսը զարգացնելուն: Նշենք, որ ցուցարարների վստահեցմամբ՝ իրենք պատրաստվում են նոր ցույցերի, նստացույցերի, որոնց կմասնակցեն նաեւ իրենց երեխաները: «Թող տեսնեն, որ մեր երեխեքը սոված են»,-ասել են նրանք:
Կարծիքներ