Ֆրանսիայի կինոարվեստների ակադեմիան հրապարակել է 2013-ի հաղթողների անունները
hraparak
1 Մարտ 2014 | 16:35
0
Փարիզի «Շատլե» թատրոնում կայացել է ֆրանսիական «Սեզար» կինոմրցանակների հանձնման հանդիսավոր արարողությունը:
«Լավագույն ֆիլմ» անվանակարգում հաղթող է ճանաչվել ռեժիսոր Գիյոմ Գալյենի «Ես, կրկին ես և մայրիկը» ֆիլմը: Մի քանի անվանակարգերում ներկայացված այս ֆիլմը մրցանակ է ստացել նաև «Լավագույն ռեժիսորական դեբյուտ» անվանակարգում։ Բացի այդ, Գալյենն արժանացել է նաև «Լավագույն դերասան» մրցանակին:
Լավագույն ռեժիսոր է ճանաչվել 80-ամյա Ռոման Պոլանսկին՝ «Վեներան մորթու մեջ» ֆիլմի համար, որը ստեղծվել է Դևիդ Այվզի համանուն պիեսի հիման վրա։ Ալբեր Դյուպոնտելի «Խիստ ռեժիմի ինն ամիսներ» ֆիլմն արժանացել է «Լավագույն սցենար» մրցանակի։ Այդ ֆիլմն օգնել է նաև դերասանուհի Սանդրին Կիբերլենին ստանալ մրցանակ՝ «Լավագույն դերասանուհի» անվանակարգում։
Երկրորդ պլանի լավագույն դերասան է դարձել Նիլս Արեստրուպը, իսկ ահա երկրորդ պլանի լավագույն դերասանուհի՝ Ադել Անելը՝ ետևում թողնելով Ֆրանսիայի նախագահ Ֆրանսուա Օլանդի սիրուհուն՝ դերասանուհի Ժյուլի Գայեին։
Ֆելիքս Վան Գրոենգինենի բելգիա-հոլանդական «Բաց շրջան» ֆիլմը ճանաչվել է «Լավագույն արտասահմանյան ֆիլմ»:
Իսկ «Սեզար»-ի պատվավոր մրցանակին է արժանացել ամերիկացի դերասանուհի Սկարլետ Յոհանսոնը։ Նա դարձել է ամենաերիտասարդ կինոգործիչը, ով արժանացել է այդ մրցանակին:
«Սեզար» կինոմրցանակը 1976-ից ի վեր յուրաքանչյուր տարի շնորհվում է Ֆրանսիայի կինոարվեստների և տեխնիկայի ակադեմիայի կողմից՝ նախորդ տարվա ընթացքում թողարկված լավագույն կինոստեղծագործություններին և դրանց հեղինակներին:
Կարծիքներ