Երեխաների պաշտպանության օրը Աբովյան քաղաքում անկրկնելի տոն դարձավ

Այսօր երեխաների պաշտպանության միջազգային օրվան համահունչ Աբովյանում «Գագիկ Ծառուկյան» բարեգործական հիմնադրամի նախաձեռնությամբ տեղի ունեցան բազմազան միջոցառումներ: Վերջիններիս ներգրավվեցին բազմաթիվ երեխաներ ինչպես Աբովյան քաղաքից, այնպես էլ Կոտայքի մարզի այլ բնակավայրերից: Աբովյանում կազմակերպված միջոցառմանը ներկա գտնվեց նաև Աբովյանի պատվավոր քաղաքացի Գագիկ Ծառուկյանը` ողջունելով և շնորհավորելով փոքրիկներին:

Աբովյանի քաղաքապետ Վահագն Գևորգյանը ողջունեց ներկաներին` շնորհավորելով բոլոր մանուկներին լուսավոր տոնի առթիվ: Քաղաքապետը իր երախտագիտությունն արտահայտեց Գ. Ծառուկյանին` նկատելով, որ որպես Աբովյանի պատվավոր քաղաքացի` նա մշտապես աջակցում է նմանօրինակ միջոցառումների կազմակերպմանը: Վ. Գևորգյանը փոքրիկներին մաղթեց հեքիաթային ու անամպ մանկություն:

Հավելենք, որ Աբովյանի թատրոնի հարակից` Կարուսելների հրապարակում կայացած միջոցառման մեկնարկը տրվեց գունավոր կավճանկարչությամբ, որին հաջորդեց համերգային ծրագիր: Վերջինիս մասնկացեցին նաև երեխաների կողմից սիրված բազմաթիվ մուլտհերոսներ: Փոքրիկները մեծ խանդավառությամբ խաղում և լուսանկարվում էին իրենց սիրելի հերոսների հետ: Երեխաների համար նախատեսված համերգային ծրագրին մասնակցեցին նաև «Նազենիկ» ու «Ժպիտ» պարային համույթները և այլ երաժշտական խմբեր: Համերգային ծրագիրն ընդմիջվում էր ինտերակտիվ խաղերով և առաջադրանքներով, որոնց ներգրավվում էին մանուկները, իսկ հաղթողներն էլ արժանանում մրցանակների: Երեխաները հաճույքով վայելեցին անվճար ատրակցիոնները, հյութն ու պաղպաղակը:

Համերգային ծրագիրը շարունակվեց ամբողջ օրը` մեծ բավականություն պատճառելով թե’ մանուկներին, թե’ նրանց ուղեկցող ծնողներին: երեխաների տոնին նվիրված միջոցառումներն Աբովյանում շարունակվեցին ողջ օրը:

Նելլի Կարապետյան