Նոր նախարարները երաշխավորված բիզնեսի ներկայացուցիչներ են եղել
Նոր կառավարությունն անվանում են պրոֆեսիոնալների կաբինետ, մենեջերների կառավարություն, գործարարների, նկատի ունենալով այն հանգամանքը, որ նորանշանակ նախարարները հիմնականում մասնավոր ձեռնարկությունների նախկին ղեկավարներ են: Նոր վարչապետի բնորոշմամբ՝ «համեստ եւ պարկեշտ» այդ անձինք միանգամից չեն համաձայնել նախարար դառնալ, եւ նրանց կարելի է հասկանալ: Նրանք բիզնեսի ոլորտից են եկել, բայց նրանցից ոչ մեկն ինքնուրույն խաղացող չի եղել, եւ ձեռնարկությունները, որտեղ նրանք աշխատել են, հաջողել են բոլորովին այլ պատճառներով:
«Ինգո Արմենիային» օգնեց վարչապետ Տիգրան Սարգսյանը
Առողջապահության նախարար Լեւոն Ալթունյանը, որը երկար տարիներ բժիշկ-անեստեզիոլոգ է աշխատել Հրազդանի հիվանդանոցում, «Ինգո Արմենիա» ապահովագրական ընկերության գործադիր տնօրենն էր, իսկ «Ինգո Արմենիան» մեկն էր այն 6-7 ապահովագրական ընկերություններից, որոնք մնացին շուկայում վարչապետ Տիգրան Սարգսյանի 2011 թվականի «զտումներից» հետո: Նրա օրոք Կենտրոնական բանկն այս ոլորտի համար ընդհանուր կապիտալի նվազագույն շեմը սահմանեց 1 միլիարդ դրամ: Արդյունքում ապահովագրական ընկերությունների կեսը վերացան: Նրանք, ովքեր մնացին ոլորտում, կարճ ժամանակ անց ոտքի կանգնեցին եւ սկսեցին ահռելի շահույթներ ստանալ, քանի որ նշված օրենքի ընդունումից մի երկու ամիս առաջ, 2010 թվականի հոկտեմբերից, ուժի մեջ էր մտել ԱՊՊԱ-ն (ավտոտրանսպորտային միջոցների օգտագործումից բխող պատասխանատվության պարտադիր ապահովագրություն), «Ինգո Արմենիան» եւ մյուս ընտրյալներն ուղղակի դատապարտված էին հարստացման: 2014 թվականին «Ինգո Արմենիան» Հայաստանի ապահովագրական 6 ընկերություններից երկրորդն էր իր կշռով՝ «Ռոսգոսստրախ Արմենիայից» հետո:
Իգնատի Առաքելյանը հայտնվեց հակառակ կողմում
Գյուղատնտեսության նախարար Իգնատի Առաքելյանը մեկ այլ արտոնյալ ձեռնարկության գործադիր տնօրենն էր` Երեւանի կոնյակի գործարանի, որտեղ նա կարիերան սկսել է հասարակ հաշվապահից: Սա մի գործարան է, որը երկար տարիներ մթերել է աճեցվող խաղողի 90 տոկոսը: Մինչեւ 2004 թվականն այն արտադրում էր հայկական կոնյակի 63 տոկոսը: Այսօր էլ «Պեռնո Ռիկարն» ամենահարուստ կոնյակ արտադրողն է Հայաստանում, որը բարդ հարաբերություններ ունի գյուղացիների հետ եւ միշտ առիթ է փնտրել խաղողի գինը գցելու: Իգնատի Առաքելյանը հիմա պետք է պետական մտածողություն ձեւավորի եւ անշահախնդիր ձեւով կանգնի գյուղացու եւ արտադրողի մեջքին, այսինքն՝ խաղա հակառակ կողմից:
Ռուսական կայուն ձեռնարկությունների դրածոները
Տրանսպորտի, կապի եւ տեխնոլոգիաների նախարար Վահան Մարտիրոսյանն էլ է պաշտպանված եւ արտոնյալ ձեռնարկության ներկայացուցիչ, որը «Պեռնո Ռիկարից» էլ պաշտպանված է Հայաստանում: Խոսքը ռուսական «Ռոստելեկոմի» մասին է, որը Հայաստանում մատուցում է ֆիքսված հեռախոսակապի, ինտերնետ հասանելիության եւ նոր սերնդի IP հեռուստատեսության ծառայություններ, եւ որի դուստր ձեռնարկության ղեկավարն էր մեր նոր տրանսպորտի նախարարը: Էներգետիկայի նախարարը ռուսական «Հրազդան ՋէԿ»-ի տնօրենն է, ՊԵԿ նորանշանակ նախարար Վարդան Հարությունյանը ռուսական «Գազպրոմ Արմենիան» էր ղեկավարում, իսկ մեկ այլ «գազավիկ»` «Էյ Ի Ջի սերվիս» ընկերության տնօրեն Արսեն Հարությունյանը նշանակվեց Ջրային պետական կոմիտեի ղեկավար: Սա այն ընկերությունն է, որն անհասկանալի ծառայությունների համար գազ սպառող յուրաքանչյուր անձից ամեն ամիս երաշխավորված գումար է ստանում: ՀՀ քաղաքացիները սա համարում են պորտաբույծ կառույց, ինչպեսեւ ողջ գազի համակարգը, որն անտրամաբանական թանկ գներով է վաճառում գազը: Անգամ Ուկրաինայում գազն ավելի էժան է, քան Հայաստանում: Նոր կառավարիչներին զուտ ձեւականորեն կարելի է բիզնես աշխարհի ներկայացուցիչներ համարել: Նրանք բոլորն էլ եկել են երաշխավորված, պետական հովանավորությամբ եւ աջակցությամբ գործող բիզնեսից, կայուն ռուսական ընկերություններից, որոնք երբեք չեն գտնվել ազատ մրցակցության դաշտում եւ ծաղկել են բացառապես իշխանության ուժով:
ՀԳ. Եվ հիմա այս մարդիկ, իրենց նշանակման օրից սկսած, պետք է սովորեն ապրել ՀՀ քաղաքացիների դարդերով, պետական մտածողություն ցուցաբերեն: Կառավարության ամեն նիստից հետո նրանք լրագրողներին նույնն են ասում` դեռ չեն խորացել խնդիրների մեջ, ժամանակ տվեք, 100 օր տվեք եւ այլն: Առայժմ ոչ մի նոր գաղափար կամ «նոու հաու», կամ միտք, թե ինչպես պետք է իրենց ոլորտները դուրս բերեն փոսերից, նրանք չեն բարձրաձայնել:
Սյուզան ՍԻՄՈՆՅԱՆ
Կարծիքներ