Իսկ ո՞ւր են Եվրամիության ուղարկած միլիոնավոր եվրոները եւ ինչի՞ վրա են ծախսվել
Նիկոլ Փաշինյանը Եվրախորհրդարանում ունեցած ելույթում խոսեց նաեւ ԵԽ-ի կողմից Հայաստանին տրամադրված գումարների մասին։ «Եվրոպական Միության հետ մեր հարաբերությունների օրակարգն իրականում շատ ծավալուն է. չափազանց էական է ԵՄ տնտեսական եւ ներդրումային պլանի ներքո իրականացվող ծրագրերին նոր թափ ու ծավալ հաղորդելը, որի կարեւոր նպատակներից են` կայուն եւ համաչափ տնտեսական զարգացումը, ենթակառուցվածքների արդիականացումը, թվայնացումն ու տեխնոլոգիական զարգացումը, ինչպես նաեւ՝ Հայաստանի հարավային մարզերի դիմակայունության բարձրացումը: Վերջինը հատկապես կարեւոր է թե՛ երկրի շարունակական զարգացման, թե՛ տարածաշրջանում կայուն խաղաղության կերտման համատեքստում: Ծրագրի շրջանակում արդեն իսկ մեկնարկել են տարբեր ֆինանսական գործիքներով իրականացվող ավելի քան 400 մլն եվրո արժողությամբ ծրագրեր, որից շուրջ 270 մլն եվրոն ՓՄՁ ֆինանսների հասանելիության, շուրջ 34 մլն եվրոն` տեխնոլոգիական զարգացման, շուրջ 43 մլն եվրոն` Սյունիքի դիմակայունության բարձրացման եւ շուրջ 62 մլն եվրոն` Երեւանի կանաչ զարգացման ուղղություններով»,- ասաց նա:
Ինչ խոսք, գնահատելի է Եվրախորհրդարանի կողմից նման օգնությունը եւ վերաբերմունքը մեր երկրի հանդեպ: Հայաստանը տարբեր ոլորտներում շատ խնդիրներ ունի, եւ այդ խնդիրները լուծելու համար նաեւ ֆինանսներ են պետք, շատ ֆինանսներ: Սակայն տեսանելի՞ է արդյոք աջակցություն ստացած որեւէ ոլորտում որեւէ փոփոխություն:
270 մլն եվրո հատկացվել է փոքր եւ միջին ձեռնարկատիրությանն աջակցելու համար: Փոքր ու միջին ձեռնարկատերերը կփաստեն, որ ձեռնարկություն հիմնելու կամ զարգացնելու համար երբ իրենց փող է պետք լինում, միակ աղբյուրը բանկերից տոկոսով փող վերցնելն է: Դժվար է գտնել իշխանության հետ կապ չունեցող որեւէ ձեռնարկատիրոջ, որը կփաստի, որ կառավարությունը գոնե չնչին գումարով աջակցել է իրեն՝ բիզնեսի զարգացման կամ կայացման համար: Այդ 270 մլն եվրոն պետք է փնտրել կա՛մ իշխանական օլիգարխների բիզնեսներում, կա՛մ բոլորովին այլ տեղում…
34 մլն եվրո՝ տեխնոլոգիական զարգացման համար: Իսկ ի՞նչ է արվել Հայաստանում տեխնոլոգիայի զարգացման ոլորտում, ի՞նչ նորարարություններ են ֆինանսավորվել այդ գումարներով՝ տեսանելի ոչինչ չկա: Տեխնոլոգիական առումով Հայաստանն ինչպես եղել է, այնպես էլ մնում է, եւ եթե ժամանակին խոսվում էր IT ոլորտում մեր հաջողությունների կամ գիտության տարբեր ճյուղերում առաջընթացի մասին, այսօր այդ ամենն իսպառ մոռացվել է:
43 մլն եվրո տրամադրվել է Սյունիքի դիմակայունության զարգացմանը: Երկարատեւ պատերազմական լարվածության մեջ գտնվող Հայաստանի համար Սյունիքը մշտապես մեր թշնամիների` Ադրբեջանի ու Թուրքիայի թիրախում է, վերջիններս չեն էլ թաքցնում իրենց նկատառումները Սյունիքի նկատմամբ: Սյունիքի գլխին կանգնած է պատերազմի թատերաբեմ դառնալու սպառնալիքը: Իսկ այդ վտանգը կարելի է վերացնել, եթե ոչ միայն բանակի ու զինուժի համալրմամբ, ապա գոնե՝ սահմանների ամրապնդմամբ, ապաստարանների, խրամատների կառուցմամբ ու կահավորմամբ: Ի՞նչ է արվել այդ ուղղությամբ, ինչպե՞ս է Սյունիքի դիմակայունությունը զարգացվել, ինչի՞ վրա է ծախսվել այդ 43 մլն եվրոն:
Պարզվում է՝ Երեւանի կանաչ զարգացումը եվրոպացիներն ավելի բարձր են գնահատում՝ 62 մլն եվրո, քան Սյունիքի անվտանգությունը՝ 43 մլն: Թե ինչ է արվել կամ արվելու, որ Երեւանը կանաչ լինի, դուրս գա այս անապատային փոշիներից ու զարգանա, հասկանալի չէ, հատկապես այն համատեքստում, որ Երեւանում անխնա հատվում են ծառերը` իբրեւ թե հին լինելու պատճառով, կանաչ սպանդի են ենթարկվում: Գուցե Երեւանի կանաչ զարգացում ասելով ՔՊ-ական իշխանությունը հասկանում է թանկ ճապոնական սակուրաներ գնելը, որոնք ո՛չ հարուստ կանաչ սաղարթ ունեն, ո՛չ երեւանյան կլիմայի են հարմարեցված: Ինչեւէ, սպասենք գարնանը, տեսնենք, թե որքան կանաչ է լինելու ծառահատված Երեւանը…
Մի բան միայն տեսանելի է Եվրախորհրդարանի հատկացրած գումարներից՝ ոստիկանության «բարեփոխումը»: Այո, ոստիկանությունում շատ բան է փոխվել, բայց ոչ թե հանցագործությունների կանխարգելման կամ բացահայտման ուղղությամբ, այլ՝ ոստիկանության աշխատողների բարեկեցությունն ապահովելու եւ ամբողջ համակարգը երկրի վարչապետի անվտանգությանն ու իշխանության պաշտպանությանն ուղղելու առումով:
Կարծիքներ