Քվորումի խնդիրն էլ կվերանա

Անցած հինգշաբթի տեղի ունեցած ՀՀԿ գործադիր մարմնի նիստում, բացի կոալիցիա կազմելու խնդրից, քննարկման թեմա են եղել նաեւ օրենսդրական հարցեր, որոնք առնչվում են խորհրդարանում քվեարկության կարգին: Որովհետեւ, անկախ նրանից՝ ՀՀԿ-ն ունի ռեալ մեծամասնություն, թե ոչ, քվորումի խնդիր հայոց պառլամենտում միշտ կա: ՀՀԿ-ում համամասնականների մասով մտավախություն չունեն՝ նրանք առաջին իսկ կոչով ներկայացող են, խնդիրը մեծամասնականների հաշվով է: Բանն այն է, որ կարեւոր քվեարկությունների ժամանակ անչափ դժվար է նրանց սաունաներից, ռեստորաններից բերման ենթարկել, էլ չենք ասում դուբայներում արեւահարվելու նուրբ հանգամանքի մասին:



Այդ իսկ պատճառով Սերժ Սարգսյանը հանձնարարական է տվել Դավիթ Հարությունյանին` «մի հատ նայել» եվրոպական օրենսդրությունը եւ մերը նույնպես ազատականացնել: Ասել է թե՝ հնարավոր դարձնել, որ պատգամավորը երբ վերջացնի սաունայում իր գործերը, վերկենա-գա պառլամենտ` քվեարկելու անհրաժեշտ-կենսական օրենքը:



Վատ չէ, իհարկե, պարզապես խնդիրն այն է, որ Գալուստ Սահակյանն այլեւս միայնակ է նստելու Աժ դահլիճում ու էլ ավելի է տրվելու մելանխոլիկ մտքերին: Երեկ Դավիթ Հարությունյանից հետաքրքրվեցինք՝ քննարկումներ գնո՞ւմ են քվեարկության կարգը փոփոխելու հետ կապված: Վերջինս այսպես արձագանքեց. «Ինձ նման քննարկում ծանոթ չէ: Ես դրանից տեղյակ չեմ»:



Մեր դիտարկմանը, թե ինքն ուսումնասիրած կլինի այլ երկրների փորձը եւ կարո՞ղ է ասել, որ եթե փոփոխվի քվեարկության կարգը, դա Հայաստանում կաշխատի՞, թե՞ ոչ: «Նայած ինչ խնդիր ենք ուզում լուծել: Չեմ կարծում, որ մենք թռուցիկ նկարագրելով, կարող ենք պատասխան տալ՝ կգործի, թե ոչ: Այսինքն, պետք է հասկանանք, թե դա ինչ նպատակ է հետապնդում, ինչ վտանգներ է իր մեջ պարունակում, ինչ մեխանիզմներ կան վտանգները չեզոքացնելու համար»,-ասաց Դավիթ Հարությունյանը:



Այս զգուշավոր պատասխանից կարելի է ենթադրել, որ իրականում կա նման մտադրություն, եւ արդեն իսկ ուսումնասիրվել եւ վերլուծվել է միջազգային փորձը: Իսկ նման փոփոխության  թերեւս միակ նպատակը խորհրդարանում քվորում ապահովելն է, իսկ թե ինչ խնդիր կլուծեն կարգը փոփոխելով՝ պարզից էլ պարզ է: