Ես չեմ հավատում ՀԱԿ-ԲՀԿ համագործակցությանը

Հարցազրույց ՀԱԿ անդամ, «Քրիստոնեա-ժողովրդական վերածնունդ» կուսակցության նախագահ Սոս Գիմիշյանի հետ:



- Պարոն Գիմիշյան, ՀԱԿ վերջին հանրահավաքին Լեւոն Տեր-Պետրոսյանը վերահաստատեց իր դիրքորոշումը ԲՀԿ-ի հետ համագործակցության վերաբերյալ, այս համագործակցությունը խոչընդոտողներին կամ այլ կարծիք հայտնողներին «խառնակիչներ» անվանեց: Ձեր տեսակետն ինչպիսի՞ն է ՀԱԿ-ի՝ ԲՀԿ-ի հանդեպ դրսեւորած մարտավարության վերաբերյալ:



- Այդ համագործակցությունը ես բացառում եմ: Չնայած հանրահավաքի ժամանակ հնչեց մի միտք, որ այն, ինչը որ չի հաջողվել Սերժ Սարգսյանին՝ միավորել ԲՀԿ-ին իշխանության հետ, հիմա որոշ ընդդիմադիր գործիչների իրենց հակառակ կարծիքը հայտնելով՝ նպաստում են դրան, բայց, միեւնույն է՝ ես չեմ հավատում ՀԱԿ-ԲՀԿ համագործակցությանը, դա անիմաստ համագործակցություն եմ համարում, որովհետեւ ինձ համար քաղաքականությամբ զբաղվել՝ նշանակում է ժողովրդի հետ միասին քաղաքականություն իրականացնել: ԲՀԿ-ն ժողովրդի աջակցությունը չունի, միայն փողով գնված ձայներ են, եւ այնտեղ ժողովրդի գործոնը չկա: Եթե փողը հանենք, վերացնենք ընտրակաշառքը, ապա ինչի՞ համար պետք է ձայն տան ԲՀԿ-ին, ո՞ր գաղափարի, ո՞ր մտքի, ո՞ր նպատակի համար:



- Հետեւաբար ինչի՞ վրա են հիմնված ՀԱԿ ղեկավարի հաշվարկները:



- Չեմ կարող ասել, դա իր հաշվարկներն են: ՀԱԿ-ը մեկ տարի առաջ ուներ ժողովրդի լիարժեք աջակցությունը: ՀԱԿ ամենամեծ ձեռքբերումը 18 կուսակցությունների միավորված եւ միասնական լինելն էր, դրան գումարած՝ ժողովրդի աջակցությունը: Այսքանից հետո նոր քաղաքական ուժի հետ համագործակցության գնալը, այն էլ այն կուսակցության, որը ձայն չունի, ժողովրդի աջակցությունը չունի, ես անիմաստ եմ համարում: Առավել եւս, որ մի քանի տարի առաջ նույն ՀՀԿ-ն հայտարարում էր, որ ԲՀԿ-ն լիակատար պատասխանատվություն էր կրում մարտի 1-ի համար՝ ուղղակի մասնակցություն ունենալով, եւ այլն:



Թեպետ ամեն ինչ չէ, որ ես պարտավոր եմ հասկանալ, եւ իմ հասկանալով է որոշվում: Քաղաքականության մեջ բարոյականությունն ավելի լուրջ արժեք է, քան այս քաղաքական խաղերը: Իզուր չէ, որ դրանք խաղեր են կոչվում, ես դրանց մեջ ոչ իմաստ եմ տեսնում, ոչ էլ ՀԱԿ-ին օգնող կամ նրա քաղաքական նպատակներին աջակցող բան եմ տեսնում:



- Այդ դեպքում ինչի՞ն է միտված այդ համագործակցությունը, երբ խորհրդարանական ընտրություններին, ըստ որոշ եզրակացությունների, դա նույնպես խոչընդոտեց ավելի բարձր տոկոսներ ստանալու համար: Ինչպես նաեւ՝ ի՞նչ նպատակ է հետապնդում Լեւոն Տեր-Պետրոսյանի այն դիրքորոշումը, թե ԲՀԿ-ի հետեւում պետք չէ փնտրել Ռոբերտ Քոչարյանին:



- Ես որքանով գիտեմ՝ ԲՀԿ-ն Քոչարյանի պրոյեկտն է: Թեպետ դա ինձ համար այնքան նշանակություն չունի, որքան այն դիրքորոշումներն ու քայլերը, որոնք կատարել է ԲՀԿ-ն: Իհարկե, այն կարեւորում է ժողովրդի աջակցությունը, բայց այդ աջակցությունը ձեռք է բերվում փողի միջոցով: Սա ապագա չունեցող ճանապարհ է, եւ ԲՀԿ-ին իր որեւէ ծրագրային մոտեցումներով չեմ տարբերում այսօրվա իշխանություններից: Ի՞նչ տարբերություն ՀՀԿ-ի եւ ԲՀԿ-ի միջեւ՝ առավել եւս, որ իրենք երկար տարի կիսել են իշխանությունը եւ բարեհաջող աշխատել Ռոբերտ Քոչարյանի եւ Սերժ Սարգսյանի հետ:



Ես չեմ տեսնում, թե որեւէ բան է փոխվել, իսկ հիմա այս պատմություններն Օսկանյանի եւ ԲՀԿ-ի հետ համագործակցության, իսկապես, ինչպես գնահատում են, քաղաքական խաղ է, որը ես չեմ հասկանում: Կրկնում եմ՝ եթե ես չեմ հասկանում, դա չի նշանակում, որ այնտեղ ոչ մի բան չկա, դա չի հասկանում նաեւ հասարակության մեծամասնությունը: Իսկ եթե հասարակության մեծամասնությունը չի հասկանում, մեկ-երկու հոգի են հասկանում, դա էլ նորմալ բան չէ: Ես հաճույքով կհամագործակցեի այն քաղաքական ուժի հետ, որի հետեւում լուրջ զանգվածներ կան, լուրջ սոցիալական խմբեր կան:



- Այս պահին դաշտում տեսնո՞ւմ եք նման ուժ:



- Ես դրա կարիքը չեմ տեսնում: 18 կուսակցություն շատ է ու քիչ չի, դա ՀԱԿ-ի միակ եւ գլխավոր ձեռքբերումն է, կառույցի ձեւավորումը: Ցավոք սրտի, մենք կորուստներ ունենք, երեք կուսակցություն գնացել են: Թերեւս ձեռքբերում էր նաեւ, որ մինչեւ մեկ տարի առաջ ժողովրդի հետ մենք 100 հազարանոց միտինգներ էինք անում, եւ մինչեւ մեկ տարի առաջ մենք եւ ժողովուրդը միասնական էինք, վստահություն էինք կրում: Հինգ տարվա մեջ այս խաղերի արդյունքում ամեն ինչ կորցրինք եւ ոչ մի բան ձեռք չենք բերել եւ ունենք պարտված պառլամենտական ընտրություններ:



- Չեք էլ կիսո՞ւմ Տեր-Պետրոսյանի վերջին ելույթում հնչեցված միտքը, որ որակապես նոր խորհրդարան ունենք:



- Եթե համաձայնենք նրա ասածի հետ, թե խորհրդարանի որակը, հետեւաբար դրա արդյունքում կառավարության որակները փոխվել են, այսինքն՝ իշխանությունների աշխատաոճն է փոխվել, ուրեմն կեցցե Սերժ Սարգսյանը, որ նպաստել է այս լավ խորհրդարանի ձեւավորմանը: Իսկ որ հենց ինքն է ձեւավորել, այլ կարծիք չկա: Դե ուրեմն կեցցե իշխանությունը, կեցցե Սերժ Սարգսյանը, էլ ինչո՞ւ ենք պայքարում նրա դեմ: Հիմա պետք է համագործակցենք եւ դառնանք «կառուցողական» ընդդիմություն:



Ասել կուզեմ, որ փաստացի Լեւոն Տեր-Պետրոսյանը ողջունեց, այն, ինչ որ տեղի է ունեցել, դրական է գնահատում, եւ այդ դրականը վերագրվում է իշխանությանը: Այդ դեպքում մենք ինչո՞ւ ենք պայքարում սահմանադրական կարգ վերականգնելու, իշխանափոխություն իրականացնելու, եթե լավ պրոցեսներ են տեղի ունենում, եւ լավ արդյունքներ կան: Հնչեցված գնահատականներից նաեւ կարելի է այսպիսի հետեւություններ անել. եթե իրավիճակ է փոխվել, որակ է փոխվում, ուրեմն պետք է իշխանություններին ողջունել: Ակնհայտ է, որ թե խորհրդարանը, թե ուժերի հարաբերակցությունը ձեւավորեց Սերժ Սարգսյանը՝ այնպես, ինչպես իրեն էր հարմար, եւ ինչպես ինքն էր նախանշել: Իմիջիայլոց ասեմ՝ շատ փայլուն աշխատանք է արել, երեկ ես միտինգում եւս լսեցի, որ շատ փայլուն աշխատանք է կատարել, որի արդյունքում ունենք որակական փոփոխություն:



- Պարոն Գիմիշյան, ՀԱԿ առաջնորդը «խառնակիչներ» անվանեց մարդկանց, որոնք չեն ուզում հավատալ ԲՀԿ-ի ընդդիմադիր  դրսեւորումներին. որպես ՀԱԿ անդամի, ում մոտեցումը եւս տարբերվում է, ուզում եմ հարցնել՝ ՀԱԿ-ում շա՞տ են նման խառնակիչները:



- Ես լսել եմ նրա կարծիքը դրա մասին եւ այսօր էլ չեմ խուսափում ասել իմ կարծիքը, որ ընդունելի եմ համարում: Նշանակում է՝ ես խառնակիչ եմ: Դե, ասելով չէ, գիտեք: Կարող է ես սխալվում եմ՝ չեմ բացառում, բայց, մյուս կողմից էլ, չեմ տեսնում որեւէ հիմնավորում վերջին մեկ տարվա այս քաղաքական խաղի մեջ:



- Ձեր ասած խաղի հանգուցալուծումը, գագաթնակետը ո՞րն է լինելու:



- Չեմ կարող բացառել, եւ տա Աստված, որ այդպես լինի, բայց, հավանաբար, հաշվարկն արված է այն բանի, որ մի օր տեղի կունենա ԲՀԿ-ՀԱԿ միավորում, որի արդյունքում ես չգիտեմ նորից ինչ պետք է լինի: Խորհրդարանում ի վերջո ՀՀԿ-ն մեծամասնություն ունի, եւ այդ միասնությունը բավարար չէ ինչ-որ խնդիր լուծելու, մարդկային զանգվածի իմաստով: Ավելին, քան ուներ ՀԱԿ-ը մինչեւ անցած տարվա գարուն, չի կարող ունենալ թեկուզ ԲՀԿ-ի հետ միասին: Ավելին՝ հենց այստեղ մարդկային զանգվածի միավորման մեջ է գլխավոր խնդիրը. ոչ ոք չի մոռացել մարտի 1-ը եւ այն, ինչ որ կատարվել է:



Խորհրդարանի միասնությունն էլ ոչինչ չի կարող փոխել: Ես ուղղակի չեմ հասկանում՝ ո՞նց կարող է ԲՀԿ-ն իշխանություններին դեմ գնալ: Ո՞նց կարող էր այդ ուժն այդքան ձայն ստանալ: Հենց այնպե՞ս: Եթե Սերժ Սարգսյանը ԲՀԿ-ին 10 տոկոս գրեր, վերջինն ինչ-որ քայլի՞ էր դիմելու, իհարկե ոչ: Ինչի՞ մասին է խոսքը: Ի՞նչ էր անելու, ապստամբելո՞ւ էր. իհարկե ոչ: Այսինքն՝ եթե նրան տրվել է այդքան ձայն, ուրեմն շատ հանգիստ են եղել, որ որեւէ պրոբլեմ չի լինի: Գուցե հաշվարկը դրսի վրա՞ է, չեմ կարող ասել: Տա Աստված, եւ հաջողություն եմ ցանկանում այն մարդկանց, որոնք հակառակ կարծիքն ունեն: Ես էլ կընդունեմ իմ սխալը:



- ՀԱԿ հանրահավաքի ժամանակ Լեւոն Տեր-Պետրոսյանը շրջանցեց վերջին շրջանում ամենաաղմկահարույց իրադարձությունը. Վարդան Օսկանյանի դեմ հարուցված քրգործի փաստին որեւէ գնահատական չտրվեց, ինչո՞ւ:



- Գիտեք, ես այդտեղ եւս տեսնում եմ փիառ տեխնոլոգիա: Ես չեմ հավատում, որ Օսկանյանի դեմ ինչ-որ քայլեր են ձեռնարկվելու: Պարզապես, որպես հավանական նախագահացուի, դնում են շրջանառության մեջ եւ աղմուկ սարքում, որ արեւմտամետ մի թեկնածու կա: Այդ դեպքում եւ Հյուսիսը, եւ Արեւմուտքը որոշակի դիրքորոշումներ պետք է հստակեցնեն: Այստեղ ավելի շատ քաղաքական խաղ եմ տեսնում: Երբ որ կտեսնեմ, որ ԲՀԿ-ն կզրկվի իր փողերից, որի արդյունքում կզրկվի նաեւ ժողովրդի աջակցությունից:



- ՀԱԿ-ը, կարծում եք, նախագահական ընտրություններին սեփական թեկնածուո՞վ հանդես կգա, ինչո՞ւ հանրահավաքին չհայտարարվեց կամ ակնարկվեց դրա մասին:



- Խորհրդարանական ընտրություններից հետո ես դրա նպատակահարմարությունը չեմ տեսնում: Շատ կուզենայի, որ ունենայինք, բայց այս ծանր պարտությունից հետո լավ չեմ պատկերացնում:



- Իսկ միասնական թեկնածո՞ւ ԲՀԿ-ի հետ՝ ի դեմս Օսկանյանի:



- Այդ դեպքում մենք 7 տոկոսով պիտի ենթարկվենք ԲՀԿ-ի 3-4 անգամ ավելի տոկոսներին, գնանք-ծառայենք ԲՀԿ-ի թեկնածուին: Որովհետեւ անտրամաբանական կլինի, որ իրենք պաշտպանեն 7 տոկոս ունեցող թեկնածուին: Սա էլ է ինձ ստիպում չհասկանալ ԲՀԿ-ի հետ խաղը: Ի դեպ՝ այդ տոկոսների մասին. ՀԱԿ-ում վերջին շրջանում քաղխորհրդի նիստեր չեն արվում, որոնք առավել քան անհրաժեշտ են, որպեսզի վերլուծենք եւ հասկանանք, թե ովքեր են դրանում մեղավոր, արդյո՞ք կանխամտածված քայլերի հետեւանքով նման արդյունքներ ունեցանք, թե՞ սխալ հաշվարկների: Անկախ ամեն ինչից՝ ՀԱԿ-ն իմն եմ համարում եւ շատ կուզենայի պահպանել այդ կառույցը, բայց որոշ մարդկանց քայլերից վտանգ է նկատվում, որ կառույցն ավելի շատ կորուստներ կունենա:



- Ի դեպ, ՀԱԿ-ից հեռացողների քայլն արդարացվա՞ծ եք համարում:



- Դա իրենք պետք է մեկնաբանեն: Ես հանգիստ եմ վերաբերվում, որովհետեւ այդ խնդիրները ես էլ եմ տեսնում: Ես միշտ բարձրաձայնել եմ այդ խնդիրների մասին, որոնք բերել են այս հետեւանքին: Եվ հիմա ուզում եմ շարունակել պայքարը, բայց անհրաժեշտ է որոշ հետեւություններ անել, որը կնպաստի կառույցի պահպանմանը: