Կարինե Աճեմյանը՝ Քիմ Քարդաշյանի այցի, նրա գեղեցկության ու օգտակարության մաիսն

ԱԺ ՀՀԿ խմբակցության պատգամավոր Կարինե Աճեմյանի կարծիքով Քիմ Քարդաշյանն հայկական դիմագծեր ունի և նման է հայուհու։ 
Լրագրողների հետ զրույցում այսօր տիկին Աճեմյանն ասաց, որ հարկավոր է ուշադրություն դարձնել այն հանգամանքի վրա, թե ինչ հեղինակություն ունի Քիմ Քարդաշյանը․ «Ես հիմա չեմ խոսում այն մասին, թե ինչու է այդպես, բայց մենք 21-րդ դարում ենք ապրում, և փաստորեն 77 միլիոն մարդ նրան հետևում են, նրա հետևից գնում են, լսում են, կարդում են, երկրպագում են»։

Արդյոք գեղեցի՞կ կին է Քարդաշյանը Աճեմյանի աչքերով։ «Ես չեմ կարող տղամարդկանց անունից խոսել, որովհետև ես իմ չափանիշներն ունեմ կանացի գեղեցկության հետ կապված»,-ասաց նա։ Աճեմյանը նշեց նաև, որ Քիմը աշխարհում շատ ճանաչված է և կարող է խոսել Հայաստանի մասին, Հայոց ցեղասպանության մասին, իսկ դա նշանակում է, որ շատ մարդիկ, ովքեր նույնիսկ չգիտեն՝ Հայաստանը որտեղ է, արդեն կիմանան ու կիմանան նաև Հայոց ցեղասպանության մասին։

Hraparak.am-ի դիտարկմանը, թե փաստորեն Քիմ Քարդաշյանն ավելի մեծ գործ կարող է անել Հայաստանի ու Ցեղասպանության ճանաչման գործում, քան անում է Հայաստանի արտգործնախարարությունը, ՀՀԿ-ական պատգամավորն ասաց․ «Գիտե՞ք ինչ, էդ առումով եմ ասում, որ նա պարզապես շատ ճանաչված է, և նրա խոսքին հետևում են, շարժումներին հետևում են, ֆիլմերը նայում են, և այն, ինչ կնկարահանվի այստեղ, նույնպես շատ պոպուլյար կդառնա, ինչը մեզ այսօր շատ պետք է»։

Վահե ՄԱԿԱՐՅԱՆ