Ժան Կլոդ Յունկերի նախագահման օրոք Եվրամիությունը չի ընդլայնվի. զեկույց

Եվրամիության ընդլայնման վերաբերյալ նախօրեին Եվրահանձնաժողովի կողմից հրապարակված ամենամյա զեկույցում ասվում է, որ Եվրահանձնաժողովում հաստատել են այն սկզբունքային դիրքորոշումը, ըստ որի` ԵՄ-ն չի ընդլայնվի նախագահ Ժան Կլոդ Յունկերի գործունեության օրոք: Այս մասին հաղորդում է «Korrespondent.net»-ը:

«Շատ երկրներում և շատ ոլորտներում անցյալ տարիների ընթացքում կարևոր առաջընթացի ֆոնին երկրներում առկա խնդիրները վկայում են, որ նրանցից ոչ մեկը պատրաստ չի լինի միանալ ԵՄ-ին՝ Եվրահանձնաժողովի մանդատի ընթացքում, որն ավարտվում է 2019-ի վերջին»,- ասվում է փաստաթղթում:

Զեկույցը վերաբերում է Թուրքիային, ինչպես նաև բալկանյան երկրներին Չերնոգորիային, Սերբիային, Ալբանիային, Մակեդոնիային, Բոսնիա և Հերցեգովինային ու Կոսովոյին:
Նշվում է, որ Թուրքիան և Արևելյան Բալկանների երկրները, Սիրիայից և Իրաքից ներգաղթյալների ու փախստականների հոսքի պատճառով ճգնաժամի մեջ են: