Խաչատուր Սուքիասյանն իմ վաղեմի բարեկամն է

Մամուլում արդեն գրվել է, որ Ազգային ժողովի նախկին պատգամավոր, գործարար Խաչատուր Սուքիասյանը մտադիր է կուսակցություն հիմնել: Չնայած այս խոսակցությունները պտտվում են դեռեւս անցած տարվանից, բայց դրանք ներկայումս ավելի առարկայական են դարձել: Տեղեկություններ կան, որ Սուքիասյանը ցանկանում է համագործակցել Հայաստանի լիբերալ կուսակցության նախագահ Հովհաննես Հովհաննիսյանի հետ, հենց նրա կուսակցության վրա հիմնել նորը, այսինքն՝ շատ ժամանակ չծախսել բյուրոկրատական քաշքշուկների, կուսակցության գրանցման եւ այլնի վրա: Չի բացառվում, որ առաջիկայում այս կուսակցությունը, նրա ղեկավարն ակտիվանան, հետո համալրման գործընթաց սկսվի: «Խաչատուր Սուքիասյանն իմ հարազատն է, մենք բարեկամական հարաբերություններ ունենք, բայց, վստահեցնում եմ, նման հարցեր չենք քննարկել»,- մեզ հետ զրույցում վստահեցրեց Հովհաննես Հովհաննիսյանը: Երկու տարուց ավելի է՝ կուսակցությունը համագումար չի արել, Հովհաննիսյանն ասաց, որ պլանավորել են գարնանն անել, կուսակցապետն իր ղեկավարած կառույցի անդամության անգամ ստույգ թիվը չի հիշում. «Ցուցակային՝ մոտ 2․100-ից ավելի ենք»:

Լիբերալների ղեկավարին նաեւ Ընտրական օրենսգիրքը փոխելու ու հաջորդ ընտրությունների մասին հարցրինք:

- Պարոն Հովհաննիսյան, կուլիսներում արդեն մեկնարկել է տարվա քաղաքական կարեւոր գործընթացը՝ Ընտրական օրենսգիրքն են փոխում, Դուք, Ձեր կուսակցությունը մասնակցելո՞ւ եք գործընթացին:

- Տոներից հետո կուսակցական հավաք տեղի չի ունեցել, դեռ այս հարցը չենք քննարկել, բայց ամեն դեպքում կարող եմ ասել, որ մենք մեր առաջարկները կներկայացնենք: Կընդունվի, թե չի ընդունվի, արդեն խորհրդարանական կուսակցությունների խնդիրն է լինելու, իրենք պետք է խորհրդարանում հետամուտ լինեն:

- Սկզբունքային առաջարկներ կա՞ն, որոնք կցանկանայիք տեսնել նոր օրենսգրքում, եւ որը կնպաստի ընտրությունները չկեղծելուն:

- Այս պահին դժվար է որեւէ բան առանձնացնելը, ճիշտ կլինի, որ մենք մշակենք եւ մի տասն օրից ներկայացնենք:

- Ինչպես գիտեք, նոր Սահմանադրությամբ 100 տոկոս համամասնական ընտրակարգին ենք անցում կատարել, եւ ԸՕ-ն պետք է ապահովի այս համակարգը: Նախապատվությունը իշխանությունը կարծես թե ռեյտինգային քվեարկությանն է տալիս, որն իր հերթին մեծամասնականի տարրեր է պարունակում: Ի՞նչ լուծում կառաջարկեք Դուք:

- Եվրոպական շատ երկրներ կան, որտեղ ռեյտինգային քվեարկությունն է գործում, բայց, ինչ խոսք, մեզ մոտ մի քիչ յուրահատուկ է, եւ պետք է նայել, ճիշտ հաշվարկ անել: Պետք է ամեն ինչ անել, որ այդ ԸՕ-ով ձեւավորվի մի պառլամենտ, որն իր վրա կկարողանա կրել թե քաղաքական, թե տնտեսական ողջ բեռը: Դրա համար այդ պառլամենտում պետք է նստած լինեն մարդիկ, քաղաքական գործիչներ, որոնք կկարողանան այդ բեռն իրենց ուսերին վերցնել:

- Իսկ հնարավո՞ր է, որ Ձեր կուսակցությունն էլ ապագա խորհրդարանում ներկայացվածության հայտ ներկայացնի:

- Տեսնենք, կախված է մի քանի հանգամանքներից, միայն ցանկությունը քիչ է, հնարավորություններ պետք է լինեն, որ կարողանանք պայքարին մասնակցել, ամեն դեպքում՝ ցանկություն կա:

- Պարոն Հովհաննիսյան, տեղեկություններ կան, որ ապագայում հնարավոր է համագործակցեք գործարար Խաչատուր Սուքիասյանի հետ, նա ցանկանում է կուսակցություն հիմնել:

- Ճիշտն ասած՝ Խաչատուր Սուքիասյանն իմ վաղեմի բարեկամն է, մենք բարեկամական հարաբերություններ ունենք, բայց ես իր հետ երկար ժամանակ չեմ էլ հանդիպել, վերջին անգամ 1-1.5 ամիս առաջ եմ հանդիպել, բայց եղել է զուտ բարեկամական հանդիպում, քաղաքական թեմաների մասին չենք խոսել: Դեռեւս Կոնգրեսում ենք քաղաքական հարցերի մասին խոսել: Ես հիմա չգիտեմ իր քաղաքական նպատակները: …Իսկ «եթե»-ներով չեմ առաջնորդվում: