Արծվիկ Մինասյանը խուսափեց «սենսացիա» բացահայտելուց

Էկոնոմիկայի դաշնակցական նախարար Արծվիկ Մինասյանն այսօր այդպես էլ չհրապարակեց այն անունները, թե ովքեր են երկրի մոնոպոլիստները։ Մինչդեռ նա այդ մասին խոստացել էր դեռ մայիսի 18-ին՝ վարչապետի հանձնարարականի շրջանակներում, որ ուսումնասիրեն դաշտը, պարզեն՝ որ ոլորտներն են մենաշնորհային և ովքեր են դրանց հետևում կանգնած։

Hraparak.am-ի հարցին, թե վարչապետի հանձնարարականից հետո ի՞նչ նորություն կա, ի՞նչ են արձանագրել այս ամիսներին, Մինասյանը նախ տվեց, որ 15 ապրանքային շուկաներում հուշաթերթերի պատրաստման մասին հանձնարարականը կատարվել է, ներկայացվել է կառավարություն և շուտով կհրապարակվի բոլոր այդ ապրանքատեսակների մասով ամբողջ ներմուծման ընթացակարգը։

Ինչ վերաբերում է անուններին, թե ովքեր են մոնոպոլիստները կամ ովքեր ունեն գերիշխող դիրք այս կամ այն ոլորտում, Մինասյանն ասաց, որ երբ ոլորտների մասին ենք խոսում, անուններ հրապարակելն անիմաստ է դառնում։ Հետո նշեց, որ իրենց գլխավոր խնդիրը օրենսդրական նոր վերանայումների իրականացումն է, և այս պահին նաև հայեցակարգի մշակման աշխատանքնմեր են իրականացվում։

Մենք նորից փորձեցինք ճշտել՝ ովքե՞ր են այդ մենաշնորհային համարվող ոլորտների հետևում կանգնած։

«Բոլոր նրանք, ովքեր որ այս կազմակերպություններում խոշոր բաժնետերեր են, ակնհայտ է դա։ Այսինքն՝ այստեղ երկրորդ հարց չի կարող լինել։ Ցանկացած բաժնետեր, ով որ այսպիսի կազմակերպություններում ունի մասնակցություն, բնական է, որ ինքն է շահագրգռված»,-նորից խուսափեց հարցին ուղիղ պատասխանելուց ՀՅԴ-ական նախարարը։

Hraparak.am-ը նորից պնդեց, որ հանրությանը անուններ են հետաքրքրում, բայց Մինասյանը մնաց անդրդվելի։ «Անունները դուք ինձնից շատ լավ գիտեք, և տնտեսական քաղաքականությունն ավելորդ վերածել նեղ և փոքր խմբային, անձնական մոտեցումներին, ես պատրաստ չեմ, որովեհտև իմ գլխավոր խնդիրը՝ որպես էկոնոմիկայի նախարարի, համակարգային լուծումներ առաջարկելն է կառավարությանը՝ ոլորտներն ազատականացնելու ուղղությամբ»,-ասաց նա՝ կարծիք հայտնելով, որ լրագրողներն հարցը տալիս են ու անհամբեր սպասում ե, որ սենսացիա բացահայտվի։

Վահե ՄԱԿԱՐՅԱՆ