ՀԱՊԿ-ն ՀՀ ղեկավարությունից քաղաքական սթափություն է ակնկալում

Հավաքական անվտանգության պայմանագրի կազմակերպությունը (ՀԱՊԿ), չնայած Հայաստանի վերնախավի որոշ մտահոգություններին, հույս ունի, որ երկրի ղեկավարությունը քաղաքական սթափություն կդրսևորի, Երևանը մնում է մեր դաշնակիցը: Այս մասին ՏԱՍՍ-ին տված հարցազրույցում հայտարարել է ՀԱՊԿ գլխավոր քարտուղար Իմանգալի Տասմագամբետովը։

«Չեմ թաքցնի, որ որոշակի իրադարձություններ և տրամադրություններ մտահոգություն են առաջացնում Հայաստանի վերնախավի շրջանում, բայց մենք հույս ունենք Հայաստանի քաղաքական ղեկավարության քաղաքական սթափության և կազմակերպության հետ կապված տարբեր սցենարների իրականացման հեռանկարների հավասարակշռված գնահատականի առումով։ Ուզում եմ շեշտել, որ Հայաստանը մնում է մեր դաշնակիցը, գործող բոլոր պարտավորությունները մնում են ուժի մեջ»,- պատասխանել է գլխավոր քարտուղարը հարցին, թե ՀԱՊԿ-ն ակնկալո՞ւմ է հայտարարություն Երեւանից՝ կազմակերպությանը մասնակցությունը կասեցնելու վերաբերյալ։

«Ե՛վ ես, և՛ քարտուղարությունը աշխատում ենք կազմակերպությունում ընդունված կանոնակարգերին և ընթացակարգերին խիստ համապատասխան, մենք, իհարկե, մեր վերլուծաբանների և նրանց հասանելի գործիքների օգնությամբ վերլուծում ենք իրավիճակը Հայաստանի շուրջ և կազմակերպության հետ Հայաստանի հարաբերություններում», - հավելել է Տասմագամբետովը:

Ավելի վաղ Հայաստանի վարչապետ Նիկոլ Փաշինյանը France 24-ին տված հարցազրույցում ասել էր, որ Երևանը սառեցրել է մասնակցությունը ՀԱՊԿ-ին։ Բացի այդ, նա չի մասնակցել Մինսկում կայացած ՀԱՊԿ գագաթնաժողովին։ ՌԴ նախագահի մամուլի քարտուղար Դմիտրի Պեսկովը նշել է, որ Մոսկվան շարունակում է կապերը Երևանի հետ՝ պարզաբանելու Փաշինյանի հայտարարությունները։ ՌԴ ԱԳՆ-ում ՏԱՍՍ-ին պարզաբանել են, որ Ռուսաստանը երկկողմ կապուղիներով Հայաստանից պարզաբանում է սպասում այս հարցի վերաբերյալ։ Միևնույն ժամանակ, ՌԴ ԱԳՆ-ն հայտարարեց, որ ՀԱՊԿ միջոցառումներին Երևանի մասնակցության դինամիկան նվազել է, ինչը չի համապատասխանում բարեկամ հայ ժողովրդի շահերին, և կոչ արեց հանգիստ, վստահելի երկխոսության միջոցով քննարկել և վերացնել մտահոգությունները։