Երկրում իրավիճակն այն չէ, ինչ զեկուցում են վարչապետին
Ռուսական հեռուստաընկերություններից մեկին տված հարցազրույցում ՀՀ վարչապետ Նիկոլ Փաշինյանը հայտարարել է, թե չի ների դավաճանությունը 2018 թվականի հեղափոխության արժեքներին: «Յա՞, իրո՞ք»:
Ի տարբերություն, ասենք, հայրենիքի դավաճանության, հեղափոխական արժեքների դավաճանությունը որեւէ օրենքով կամ իրավական այլ ակտով սահմանված չէ, որ հասկանաս, թե ով ինչպես դավաճանեց:
Հեղափոխական արժեքներն էլ գրավոր սահմանված չեն, բանավոր հայտարարվել են մի 1 մլն անգամ. ո՛չ կոռուպցիային, մենաշնորհներին, օրենքի իշխանություն եւ այլն: Արժեքներ, որ հեղափոխությամբ ձեւավորված «նոր Հայաստանում» չեն հարգվում հենց առաջին օրվանից: Օրինակներ. հին Հայաստանից պետեկամուտների կոմիտեի նախագահի տեղակալ Ռաֆիկ Մաշադյանը համակարգում է տեղավորել իր ամբողջ ազգուտակին, որոնք մշտապես խուսափում են կրճատումներից: Նույնն անում են «նոր Հայաստանի» բարձրաստիճան պաշտոնյաները, անգամ՝ պաշտոնյաների կանայք:
Իրենց ուղղված բոլոր քննադատություններին «նոր Հայաստանի» պաշտոնյաները մի բան են ասում՝ նախկինում էլ դա կար: Բայց հեղափոխության արժեքներից մեկն էլ հին արատավոր բարքերը բացառելն էր: Եվ հեղափոխության պատճառն էլ նրանցից եւ մանավանդ այդ բարքերը կրողներից ազատվելն էր։
Ուրեմն Նիկոլ Փաշինյանին դավաճանել են թիմակիցները, ինչպես Տիբերիոս Կլավդիոս Կեսար Օգոստոս Գերմանիկուս կեսարին:
Անցած տարի, հեղափոխական օրերին վարչապետ Սերժ Սարգսյան-ընդդիմադիր Նիկոլ Փաշինյան հրապարակային բանավեճի ժամանակ վերջինս առաջինին ասաց. Հայաստանում իրավիճակն այն չի, ինչ ձեզ զեկուցում են: Հեղափոխությունն այս հարցում էլ բան չի փոխել: Երկրում իրավիճակն այն չէ, ինչ զեկուցում են վարչապետին: Երկրում հեղափոխական արժեքներին դավաճանած լիքը պաշտոնյաներ կան, ու վարչապետը չգիտի դրա մասին:
Անդրանիկ ՎԱՐԴԱՆՅԱՆ
Կարծիքներ