Փաստորեն՝ խեղճ Սաշիկ

Հայաստանում ոչ թե խլում են բիզնեսը, ոչ թե փայ են մտնում, այլ առավել փոքրերը գնում են մեծերի մոտ, խոստովանում են, որ իրենց բիզնեսը իրենց հնարավություններից «աբյոմով» մեծ է և առաջարկում են միասին աշխատել:

ԱԺ ՀՀԿ խմբակցության ղեկավար Վահրամ Բաղդասարյանն ավելի շատ այս թեզին է հավատում, քան թե այն մյուսին, ըստ որի, իբր, բիզնեսները փոքրերից խլում են զոռով:

Այստեղից էլ պարոն Բաղդասարյանը հանգել է այն եզրակացության, որ ուրիշի բիզնեսներին տիրանալու կամ դրանցում փայ մտնելու մասին մամուլն ու ժողովուրդը միայն հեքիաթներ են պատմում: Ասենք՝ ինչո՞ւ միայն մամուլն ու ժողովուրդը: Նաև Գագիկ Ծառուկյանն է հեքիաթներ պատմում այդ մասին, այն էլ իր հարցազրոյցներում:

Ուրիշ հարց, որ Վահրամ Բաղդասարյանն էլ Գագիկ Ծառուկյանին մեղադրեր ուրիշների բիզնեսները փակել տալու և արտոնյալ դիրքեր գրավելու մաջ, բայց, այ քեզ խայտառակություն, Բաղդասարյանը սխալ է հանում ժողովրդին ու մամուլին: Այդպես ավելի հեշտ է, ըստ նրա, քան թե Ծառուկյան Գագիկին ավելի գրգռելը:

Եվ ի՞նչ է ստացվում վերջում: Վերջում ստացվում է՝ խեղճ Սաշիկ, ինքը տանը նստած՝ մամուլը գրում է, որ նա «փայ մտնելու» սովորություն ունի: Բաղդասարյանն էլ, առանց անհարմար զգալու, մամուլին մեղադում է ՀՀ նախագահի հարազատներին պախարակելու և այդ քստմնելի ճանապարհով նախագահին վնասելու մտադրություն ունենալու մեջ:

Այո, մամուլին այլևս այլ ելք չի մնում, քան փաստերով գրելը: Աառաջին փաստն էլ, որքան էլ որ տարօրինակ է, Բաղդասարյանն է տալիս: Ասում է՝ ես չէի կարողանում իմ բիզնեսը յոլա տանել և դիմել եմ Սաշիկ Սարգսյանին, որ նա ինձ օգնի և միասին անենք գործը: Իսկ թե ինչի արդյունքում է Բաղդասարյանը հայտնվել ՀՀԿ ցուցակում, ինքը՝ Բաղդասարյանը և պատմությունն այդ մասին համեստորեն լռում են:

Մենք իհարկե չենք մտածում, որ դա տեղի է ունեցել Սաշիկ Սարգսյանին այդ բիզնեսի մեջ զոռով ներգրավելու արդյունքում, բայց, ամեն դեպքում, ամենամեծ ցանկության դեպքում էլ անհնար է հակառակը պնդելը: Խնդրում ենք, դուք էլ մեզ հասկացեք, հարգելի պարոն Բաղդասարյան:

Էդիկ Անդրեասյան