Փաշինյանի վաղվա հարցին Զախարյանը պատասխան ունի

«Նաիրիտ» գործարանի աշխատակիցները նախագահի նստավայրի մոտից երթով շարժվեցին դեպի Ազգային ժողով, որտեղ նրանց մոտեցավ ՀԱԿ խմբակցության պատգամավոր Նիկոլ Փաշինյանը: Հիշեցնենք, որ կառավարության շենքի մոտ օրեր առաջ նստացույց հայտարարած գործարանի աշխատակիցներին մոտեցել էր Փաշինյանը և  նաիրիտցիների աչքի առաջ զանգահարել Երվանդ Զախարյանին, վերջինս էլ նրան խոստացել է, որ մինչև տարվա վերջ նաիրիտցիները կստանան իրենց աշխատավարձերը՝ գուցե մաս-մաս:

«Մենք միայն մի խնդրանք, ունենք, որ վաղը ԱԺ հարց ու պատասխանի ժամանակ էներգետիկայի և բնական պաշարների նախարար Երվանդ Զախարյանին հարցնեք մեր աշխատավարձերի պարտքի մասին»,- Նիկոլ Փաշինյանին խնդրեց գործարանի աշխատակիցներից մեկը։ Պատգամավորը խոստացավ, որ այդ հարցը անպայման կտա․« Չնայած ես այլ հարց եմ պատրաստել նրա համար, բայց այնուամենայնիվ ձեր առաջարկած հարցն էլ կտամ»,-ասաց պատգամավորը և հեռացավ։
Ցուցարարները նույնպես հեռացան՝ հայտարարելով, որ վաղը հավաքվելու են ԱԺ-ի դիմաց: