Կամավորները՝ ՎիվաՍել-ՄՏՍ-ի գրասենյակում

 Հնարավոր չէ ինտեգրվել որեւէ հասարակության, առավել եւս՝ երկրի տեր դառնալ առանց այդ երկրի բնակիչների հետ ամենօրյա շփման, առօրյա խնդիրների հետ առնչվելու եւ նրանց հետ ձեռք ձեռքի լուծումներ որոնելու գործին լծվելու:
«Դեպի Հայք» ծրագիրը, ՎիվաՍել-ՄՏՍ-ի աջակցությամբ, 2004 թվականից կազմակերպել է 37 երկրից ժամանած ավելի քան 1000 հայ երիտասարդների կամավորական նախաձեռնությունների մասնակցությունը Հայաստանի տարբեր մարզերում: «Դեպի Հայք» ծրագրով Հայաստան ժամանողներն անմոռանալի փորձ են ստանում իրենց հասակակիցների հետ շփման եւ տեղում մասնագիտական հմտությունները կիրառելով:
«Օգտագործեք երիտասարդ տարիքին հասանելի հնարավորությունները՝ բաց եղեք նորը տեսնելու, այն զարգացնելու եւ երկրի առաջխաղացմանը նպաստելու մարտահրավերի առջեւ: Պարզապես ձեռք մեկնեք ձեր հայրենակիցներին՝ փոքր գործեր անելով: Այսկերպ դուք կարող եք հարստանալ հոգեպես, կյանքի փորձ ձեռք բերել եւ այսկերպ փոխել աշխարհը: Հիշեք, որ դուք Հայաստանի դեսպաններն եք աշխարհի տարբեր երկրներում եւ լավագույն օրինակը ձեր երեխաների համար»,-նշել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը՝ ողջունելով ԱՄՆ-ից, Ռուսաստանից, Հորդանանից, Սիրիայից, Ֆրանսիայից, Արգենտինայից, Ուրուգվայից, Միացյալ Թագավորությունից, Լիբանանից եւ Կանադայից ժամանած կամավորներին:
Կամավորները Ռալֆ Յիրիկյանի հետ կիսվել են իրենց տպավորություններով եւ հարցեր ուղղել ՎիվաՍել-ՄՏՍ-ի ստեղծման եւ անցած ուղու մասին: Հանդիպումից հետո սփյուռքահայ երիտասարդները, Ռալֆ Յիրիկյանի ուղեկցությամբ, շրջել են ընկերության գլխամասային մասնաշենքում: