Լրագրային շանսոն. Շոգից քշվածներս

Բավական էր Գալուսը Գրիգորիչն իրար խառներ Բավրան ու Բավարիան, որ մեր լրատվամիջոցները իսկույն մոռանային, որ ՀՀԿ Մեծությունը ոչ թե աշխարհագրության, այլ հայերենի մասնագետ է:

***

Հայտնի է Նիկոլ Փաշինյանի և Հեղինե Բիշարյանի` ԱԺ դահլիճից դուրս հանդիպման վայրը: Այն տեղի է ունենալու Գյումրիում, ամենայն հավանականությամբ` ավագանու ընտրությունների օրը:

***

Մեր աղբյուրների փոխանցմամբ` Գյումրիում տեղի ունենալիք ավագանու ընտրություններում միանգամից երկու քաղաքապետ են ընտրելու` գործող և չգործող: Գյումրեցիները պնդում են, որ մեծ նշանակություն ունի, թե ով է իրենց չգործող քաղաքապետը: Ըստ նրանց` այս տարիներին Վարդան Ղուկասյանը մեծ հաջողությամբ է կատարել չգործող քաղաքապետի իր պարտականությունները:

***

«Հրապարակը» գրել էր, որ քաղաքական գործիչների մեծ մասն այս տարի հայտարարելու է, որ ամռանը հանգստի է մեկնելու Արցախ: Բայց «Հրապարակ»-ն ի՞նչ իմանար, բոլոր քաղաքական գործիչներն այս տարի նման հայտարարություն կանեն:

***

Գիտե՞ք` ինչու ՀՀ իշխանություններն ու ընդդիմությունն իրար հետ ջրոցի չեն խաղում: Որովհետև երկուսն էլ սիրում են միայն ջրել, ջրվել չեն սիրում:

***

Նոր ընտրական օրենսգիրքն ասում է` եթե դոնոր կազմակերպությունները փող տան, Հայաստանում լավ ընտրություններ կլինեն, իսկ եթե չտան` ՀՀԿ-ն հո ապուշ չէ, որ սեփական փողերով լավ ընտրություն կազմակերպի:

Էդիկ Անդրեասյան