Բալասանյանը՝ փոքրիկ կռվախնձոր ՀՀԿ-ի ու ԲՀԿ-ի միջև

ՀՀԿ փոխնախագահ Արմեն Աշոտյանն այսօր ՀՀԿ գրասենյակի նորակառույց մամուլի կենտրոնում ասուլիս տվեց և պատասխանեց լրագրողների հարցերին։

Լրագրողներից մեկը հետաքրքրվեց, թե ինչու՞ Գյումրու քաղաքապետի ընտրություներում ՀՀԿ-ն կանգ առավ գործող քաղաքապետ Սամվել Բալասանյանի թեկնածության վրա, ով նախկինում ՕԵԿ-ական, հետո ԲՀԿ-ական է եղել, այսօր էլ ոչ նա է, ոչ նա՝ անկուսակցական է։ Լրագրողը նկատեց նաև, որ Բալասանյանը հեղինակազրկված պաշտոնյա է՝ նկատի ունենալով հենց այդ՝ տարբեր կուսակցոթյուններ փոխելու հանգամանքը։

Աշոտյանն ասաց, որ Բալասանյանը գուցե քաղաքական մամուլի տեսակետից իր քաղաքական գործունեության մեջ թողել է տեղ մամուլի համար, որպեսզի լրատվամիջոցներն անդրադառնան նրան քաղաքական տեսանկյունից, բայց իրենց համար կարևոր է նրա կազմակերպչական ջիղը՝ որպես քաղաքապետ։ Եվ նրանք հենց դա են գնահատել նրա մեջ, որ առաջադրել են։

Ինչ վերաբերում է Բալասանյանի՝ ՀՀԿ անդամ չլինելուն, Աշոտյանն ասաց, որ իրենք չունեն այն վատ ավանդույթը, որ անպայման բոլորը պետք է լինեն ՀՀԿ-ական։ «Մենք չենք ուզում լինել Կոմունիստական կուսակցություն, չենք եղել և չենք լինի։ Կուսակցական տոմսը, կուսակցական լինելը կարևոր է քաղաքական տեսակետից կուսակցության համար, բայց դոգմա չէ, պոստուլատ չէ քաղաքական առաջընթացի կամ թեկնածու լինելու համար»,-ասաց նա՝ հիշեցնելով, որ կառավարության կազմում էլ կան նախարարներ, որոնք կուսակցական չեն։

Լրագրողի այն դիտարկմանը, թե իր խոսքից կարո՞ղ է ենթադրել, որ ՀՀԿ-ն որևէ բարդույթ չունի նույն ԲՀԿ-ի կադրերին աջակցելու՝ թերևս նկատի ունենալով հենց Բալասանյանին, ՀՀԿ փոխնախագահն ասաց. «Ես չգիտեմ՝ ինչու եք Դուք պարբերաբար ուղղությունը տանում դեպի ԲՀԿ, չեմ ուզում այդտեղ որևէ կանխակալ մոտեցում տեսնել։ Կարծում եմ՝ Սամվել Բալասանյանն ավելի հին է, քան ԲՀԿ-ն, եթե խոսենք, այսպես ասած, ֆեյսբուքյան թեգերով։ Սամվել Բալասանյանը՝ որպես գործիչ, ավելի հայտնի էր Գյումրիում իր աշխատանքով, քան ստեղծվել է «Բարգավաճ Հայաստան» կուսակցությունը։ Եթե չեմ սկալվում՝ 2005 թվականին է ստեղծվել»։

Hraparak.am-ի անմեղ հարցին, թե հիշու՞մ է՝ ում կողմից է ստեղծվել ԲՀԿ-ն, Աշոտյանը, չգիտես ինչու, երևի ինչ-որ ենթատեքստ գտավ, որն և հարցի պատասխանը թողեց մեզ վրա. «Կարծում եմ՝ դու, թեպետ երիտասարդ ես, բայց կարող ես անպայման մեր նորագույն պատմության 11 տավա բոլոր անցած էջերը թերթել և իմանալ»։

Գյումրու քաղաքապետի վերաբերյալ ՀՀԿ փոխնախագահի այս հայտարարությունը, թե «Բալասանյանն ավելի հին է, քան ԲՀԿ-ն», վայրկյաններ անց խռովեց ԲՀԿ-ականների հոգիները։ Բալասանյանը ասես դարձավ կռվախնձոր երբեմնի կոալիցիոն գործընկերների միջև, որոնք այսօր էլ պակաս ջերմ հարաբերությունների մեջ չեն, քան կոալիցիա եղած ժամանակ էր։ Ի պատասխան՝ ԲՀԿ խոսնակ Վանիկ Էլիազբարյանն էլ իր հերթին ֆեյսբուքյան իր էջում կատարած մի գրառմամբ արձագանքեց Աշոտյանի այս մտքերին։

«Արձագանքելով այսօր Արմեն Աշոտյանի այն մտքին, որ Սամվել Բալասանյանն ավելի հին է, քան ՝ ԲՀԿ-ն, պրն. Աշոտյանին հիշեցնեմ, որ քաղաքապետը ո՛չ անտիկվարիատ է, ո՛չ Պիկասոյի կտավ և ո՛չ էլ ՝ Ֆաբեռժեի ձու, որ որքան հին լինի՝ այնքան արժեքավոր»,-նկատեց ԲՀԿ խոսնակը։

Վահե ՄԱԿԱՐՅԱՆ