Թեժ դեկտեմբեր (քաղաքական շանսոն)

ՀՀ որոշ քաղաքական գործիչներ այն կարծիքին են, որ Աքլորի տարի` նշանակում է աքլորանալու տարի:

***

Մարդ կա` ուզում է քաղաքական գործիչ դառնալ` հնարավորություն չունի, մարդ էլ կա` հնարավորություն ունի, բայց ընդունակություն չունի: Ուրեմն խմենք էն բանի կենացը, որ մեր հնարավորություններն ու ընդունակությունները հաշտ լինեն միմյանց հետ:

***

ՀՀ նախկին Պնախարար Սեյրան Օհանյանին զոռով ուզում են տեղավորել ընդդիմադիր դաշտում: Խցկել խցկելն է, միանգամից նշանակեք «գեներալնի» ընդդիմություն:

***

«Համախմբումը» մեծ դժվարություն ունի Վարդան Օսկանյանին այլոց հետ համախմբելու հարցում:

***

Գյումրու չգործող քաղաքապետ Վարդան Ղուկասյանը հայտարարել է, որ Գյումրիում քաղաքական գործիչ չկա: Ըստ Ղուկասյանի` մի քանիսը կան, որ միայն իրենց տանն են զբաղվում քաղաքականությամբ: Մեր հարցին` արդյոք առաջիկա ապրիլին կունենա՞նք «Տանը մնացածների» դաշինք, Ղուկասյանը դժվարացավ պատասխանել և քֆուր-քյաֆար կապեց լրագրողների հասցեին: 

***

«Տարվա ռացիոնալ գործիչ» անվանակարգում, ի շարս այլոց, նոբելյան մրցանակի են ներկայացվել` Հայաստանից Լևոն Տեր-Պետրոսյանը, իսկ Ադրբեջանից` Իլհամ Ալիևը: Նոբելյան հանձնաժողովում մեր աղբյուրը տեղեկացնում է, որ առավել նախընտրելի են Ալիևի դիրքերը, որովհետև նա մեկ միավոր է ստացել հենց իր մրցակցից:

***

Ապրիլին մենք ընտրելու ենք ոչ թե 100 պատգամավոր, այլ 99: Այդ մի տեղը Գալուստ Սահակյանինն է, որովհետև նա միակ Գալուստ Սահակյանն է:

***

Գլուխ եկած միակ քաղաքական դաշինքն անվանել են ԵԼՔ: Իսկ ելք գտնելու համար մարդուն ուրիշ ի՞նչ է պետք... այո, ԽԵԼՔ:

*** 

Եվ վերջում մեկ լուր Վանաձորից: Քաղաքապետարանից հայտնում են, որ պահանջվում է քաղաքապետ: