Հարց ունեմ վարչապետին․ «Փյունիկի» գլխավոր մարզիչ

«Ես ինձ համարում եմ ուժեղ մարդ ու չեմ համարում, որ ամեն ինչ ճիշտ եմ անում, բայց ամեն ինչ պարզ եմ անում ի տարբերություն ՀՖՖ նախագահի ու փոխնախագահի, որոնք միշտ խուսափել են ինչպես լրագրողների, այնպես էլ իմ հարցերից»։ Այս մասին քիչ առաջ «Փյունիկ» ֆուտբոլային ակումբի նախագահ Արթուր Սողոմոնյանի հրավիրած մամուլի ասուլիսի ժամանակ հայտարարեց «Փյունիկի» գլխավոր մարզիչ Եղիշե Մելիքյանը։

«Երեք տարի ունեցել եմ շատ հարցեր, ու չեմ ստացել ոչ մի պատասխան։ Ինձ կարող են ասել, որ ես մարզիչ եմ ու ուղղակի պետք է իմ գործով զբաղվեմ։ Ես կարող եմ ասել, որ ես ուղղակի մարզիչ չեմ։ Ես 10 տարի է մարզիչ եմ, բայց մինչև այդ 25 տարի եղել եմ ֆուտբոլում ու 15 տարին եղել եմ հայկական ֆուտբոլում ու իրավունք ունեմ իմ կարծիքն ասելու։ Արաս Օզիլիզը ֆուտբոլիստ է ու որոշել է դնել ՀՖՖ նախագահի թեկնածությունն ու ուզում է ինչ-որ բան փոխել, ես էլ ուզում եմ ինչ-որ բան փոխել որպես մարզիչ, քանի որ տեսնում եմ, շատ բաներ իր հունով չի գնում։ Ինձ դատի տվեցին ու փորձեցին վախի մթնոլորտ ստեղծել։ Ես պատրաստ եմ պայքարել, բայց պատրաստ չեմ լռել։ Ինձ դատի տվեցին, իմ առողջ քննադատության համար, բայց կարգապահականն ասաց, որ ես վիրավորել ու վարքաբեկել եմ։ Եթե ցանկանայի այդպիսի բան անել, համապատասխան բառեր կընտրեի դրա համար։ Ես ասել եմ, որ ֆեդերացիան անօրինական է աշխատում ու ունեմ ապացույցներ, բայց դրա համար դատի չեն տալիս, բայց հենց ասում եմ «Սեռի Կառդինալ», ինձ դատի են տալիս»,- ասաց Մելիքյանը։

«Իրենց պարտավորությունն է, որ հավասար պայմաններ ստեղծեն թիմերի համար, բայց խոչընդոտում են մեզ, ինձ որակազրկում են, դատի են տալիս, խաղադաշտից են զրկում, մեր նախագահին են դատի տալիս։ Շատ վատ են աշխատում, թափանցիկ չեն աշխատում։ Մենք ունենք երկրպագուների բանակ։ Ժամանակին նրանք եղել են լրագրողներ ու բախտ են ունեցել ինձանից հարցազրույցներ վերցնել, ու դա լավ էր ստացվում իրենց մոտ, բայց հիմա ֆեդերացիա են ղեկավարում, պետք է կարողանան դա ճիշտ անել։ Ես մեծ հիասթափություն ունեմ ու հասկանում եմ, որ իմ խոսելուց էլ շատ բան չի փոխվելու, քանի որ վերևներից ուժ ունեն ու շարունակում են իրենց գործը։ Ես քաղաքականությունից հեռու եմ ու նախկինում չէի հասկանում սևերի ու սպիտակների բաժանումը, բայց հիմա հասկանում եմ։ 25 անդամ են ընտրելու ՀՖՖ նախագահ, Պրեմիեր լիգայի թիմերն էլ ունեն մեկ ձայն, մյուս անդամներն էլ։ Սպորտն արդյունքներ է սիրում, մեծ հարգանքով մեր վարչապետին, որը հետևում է իրադարձություններին, հիմա հարց ունեմ։ 4 տարի հետևելով ՀՖՖ ղեկավարների աշխատանքներին, կարո՞ղ են ասել, որտեղ են հասել արդյունքի, որ իրենք պիտի շարունակեն իրենց աշխատանքը։ Ի՞նչ են արել այդ մարդիկ»,- հավելեց նա։