Լույս է տեսել «Մշակութային Հրապարակ» ամսաթերթը
Սիրելի ընթերցող,
Լույս է տեսել «Հրապարակ» օրաթերթի նոր նախագիծը՝ «Մշակութային Հրապարակ» ամսաթերթը, որն իրականացվում է մշակույթի նախարարության համաֆինանսավորմամբ։
Համարում կարող եք կարդալ գրող Արփի Ոսկանյանի «Չդարձնել գրականությունը մանրադրամ» հոդվածը․ «Վարչապետի թիկնապահները պիտի պաշտպանեն նրան քաջ գրականագետներից, որոնք փորձելու են պարզել՝ գրականությո՞ւն է արդյոք վարչապետի վեպը, թե՞ ոչ։ Չնայած հանդուգն հարցադրմանը, արյունահեղություն տեղի չի ունենում։ Ֆեյսբուքը ցնծության մեջ է՝ մենք ունենք աննախադեպ իրավիճակ՝ վարչապետ, որ ոչ միայն հաջողել է հեղափոխություն անել, այլեւ գրող է, նույնիսկ գրականագետ»։
Գրող, լրագրող Սիրան Գրիգորյանը ջազ երաժիշտ Լեւոն Մալխասյանի հետ զրուցել է ջազից, Երեւանից, մշակույթից, կանանցից եւ մի քիչ էլ քաղաքականությունից․ «Ջազմենն իրավունք չունի ադմինիստրատիվ աշխատանքով զբաղվելու: Աստված որ ջրի երես է հանում մարդուն, մի ուղի է տալիս, հասկացնում է՝ սա է քոնը, սրանով շարժվիր, հանկարծ այդ խրամատից դուրս չգաս: Բիզնեսմեն կամ պաշտոնյա դառնալու համար էլ պետք է տաղանդ ունենաս, դրանով լուրջ զբաղվես: Ես դրա ժամանակը չունեմ, իսկ ո՞վ գնա իմ երազանքների ետեւից»։
Համարում տեղ է գտել նաեւ գրող, դրամատուրգ Ալեքսանդր Թոփչյանի «Արդար դատաստան» պիեսը․ «Միեւնույն է, ոչխար ես: Համը հանեցիք, ամեն անգամ ձեր բողոքներն ենք քննարկում եւ ամեն անգամ՝ գայլերի դեմ, ի՜նչ անհաշտ նկարագիր ունեք դուք՝ ոչխարներդ, չե՞ք կարող, ինչ է, հաշտ ու խաղաղ ապրել կողք-կողքի: Լեզու գտեք իրար հետ, վերջապես, օրինակ՝ ես հրաշալի հարաբերություններ եմ հաստատել վագրերի հետ, մեկս մյուսից դժգոհելու ոչ մի պատճառ չունենք: Ճի՞շտ է, վագր եղբայր»։
Մեր գործընկեր «Անտարես» հրատարակչությունը շուտով լույս կընծայի Ուիլյամ Սարոյանի «Անունս Արամ է» պատմվածաշարը՝ Նունե Թորոսյանի թարգմանությամբ: Համարում ներկայացված է ժողովածուի պատմվածքներից մեկը․ «Ավտոբուսը Ռինոյից կեսգիշերը մի փոքր անց էր մեկնել։ Ռինոն Ամերիկայի էն քաղաքներից է, որ մարդկանց ախտերից է սնվում։ Միակ ապրուստը դրամախաղն ու պոռնկությունն են։ Բնականաբար պայծառ լուսավորություն ունի։ Հիշում եմ, մի խաղատուն մտա ու շեմից սրահի հեռու ծայրում փոքերի սեղանին թուղթ բաժանողի քթից տնկված երեք սև մազը պարզ տեսա։ Էդքան լուսավոր էր»։
Այս եւ մի շարք այլ հետաքրքիր նյութեր կարող եք կարդալ «Մշակութային Հրապարակի» առաջին համարում։ Թերթը կարող եք հարցնել բոլոր կրպակներից եւ «Հայ գիրք» գրախանութից։
Կարծիքներ