Ալեն Սիմոնյանը զանգեց եւ ասաց, որ հարձակում է եղել. Փաշինյանը ցուցմունք տվեց (տեսանյութ)

Արթուր Այվազյանի (Մանախ) գործով որպես վկա քիչ առաջ դատարան ներկայացավ ՀՀ վարչապետ Նիկոլ Փաշինյանը։ 

Նա դատարանում հարցաքննվեց եւ  ասաց, որ եթե որևէ բան չի հիշի, ապա կարող են իր նախաքննական ցուցմունքը հրապարակել․ «Այո, Հայկ Սարգսյանին ճանաչում․ եմ մեր շտաբի պետն է եղել, ընկերական հարաբերությունների մեջ ենք եղել։ Արթուր Այվազյանի հետ անձամբ առաջին անգամ եմ հանդիպել, բայց իմ ԱԺ  պատգամավոր եղած ժամանակ նրանից նամակներ եմ ստացել։ Խորհրդարանական ընտրությունների նախօրդ օրը ես տանն էի, զանգեցին ինձ, եթե չեմ սխալվում՝ Ալեն Սիմոնյանն ինձ զանգեց ու ասաց, որ տղաների վրա հարձակում է եղել՝ Հայկ Սարգսյանի։ Ես գիտեի, որ նախընտրական շրջանի վերջին օրն էր և Հայկին խնդրել էի վերջին ժամերն օգտագործել։ Ես փորձեցի զանգել Հայկին, բայց նա չպատասխանեց, հետո, եթե չեմ սխալվում, Ալենի միջոցով փորձեցի, ասացի՝ ինձ զանգեն։ Ինձ ասացին, որ միջադեպ է եղել, ես ասացի, որ արագ լքեն տարածքը և գան նախընտրական շտաբ»։

Շարունակելով միջադեպի մասին վկայությունը՝ վարչապետն ասաց․ «Դուրս եկա տնից, գնացի շտաբ, ինձ պատմեցին, որ իրենք երբ շենքում են եղել, մի քանի քաղաքացիներ եկել են ու հարցրել, թե ինչ իրավունքով են օգտագործում ՀՀ պետական դրոշը, վերցրել են այն, մեր տղաները դրոշը հետ են պահանջել, և այդ դրոշը տեղափոխող քաղաքացին հարվածել է Հայկ Սարգսյանին։ Մեր մարդիկ միջամտել են, թույլ չեն տվել, որ հարվածները շատանան, այդ անձը հանել է զենքը և պահել է Հայկի վրա, մեր մարդկանցից մեկը հարվածել է նրա ձեռքին, զենքն ընկել է։ Հետո, երբ ես իմացա՝ այդ զենքի մասին ա, ասացի, որ ինձ ցույց տան, ես դա նկարել եմ, ահազանգել եմ ոստիկանություն, զենքը, առանց ձեռք տալու, նկարել եմ՝ ուղիղ եթերով։ Իմ էջում ցուցադրել եմ զենքը և պատմել, թե ինչ է տեղի ունեցել շարժական շտաբի հետ»։

Վարչապետը նաեւ նշեց, որ Հայկ Սարգսյանը հրաժարվել է, որ իրեն հասցված վնասվածքները նկարի Նիկոլ Փաշինյանը․ «Ես տեսա, որ զենքի ներսում մարտական փամփուշտներ կային, բայց չեմ հիշում, թե ինչպես զենքը հանձնվեց ոստիկաններին»։

Վարչապետը դժվարացավ հիշել՝ զենքն ինքն անձա՞մբ է տարել-տվել ոստիկանությանը, թե՞ ոչ։ Ասաց՝ որքանով հիշում է, ոստիկաններն այդպես էլ չեն եկել Տերյան փողոցի իրենց շտաբ, այն վերցրել։ Վարչապետն ասաց՝ քանի որ դեպքը երկու տարի առաջ է տեղի ունեցել, ինքն ամեն ինչ մանրամասն նկարագրել է իր նախաքննական ցուցմունքում, որը կարող են հրապարակել։

Ըստ մեղադրական եզրակացության՝ Արթուր Այվազյանին մեղադրանք է առաջադրվել այն բանի համար, որ նա, 31.03.2017թ․ ժամը 22:40-ի սահմաններում Անդրանիկի փող․ թ․ 53 շենքի բակում անթաքույց արհամարհանք դրսևորելով հասարակության հանդեպ, «Ելք» դաշինքի համակիր Հայկ Սարգսյանի նկատմամբ բռնություն գործադրելով, կոպիտ կերպով խախտել է հասարակական կարգը:

Միջադեպը եղել է «Ելք» դաշինքի քարոզարշավի ընթացքում եռագույնի շուրջ առաջացած խոսակցությունից, որի արդյունքում զենք է գործադրվել: Արթուր Այվազյանին մեղադրանք է առաջադրվել ՀՀ քրեական օրենսգրքի 258-րդ հոդվածի 2-րդ մասով (Խուլիգանություն, որը զուգորդվել է անձի նկատմամբ բռնություն գործադրելով) եւ 235-րդ հոդվածի 1-ին մասով (ապօրինի կերպով զենք պահելը կամ փոխադրելը):