«Յուքոմը» հաստատեց. Դատարանը բավարարել է «Յուքոմ» ՓԲԸ հայցի ապահովման միջնորդությունը
Ինչպես մենք գրել էինք,«Յուքոմ» ընկերությունը դիմել է դատարան՝ «ԹԻՄ» ՍՊԸ-ի դեմ՝ անբարեխիղճ մրցակցությունը դադարեցնելու վերաբերյալ։ Այն է՝ «Թիմ» ՍՊ ընկերությանը «Վեոն Արմենիա» ՓԲ ընկերության բաժնետոմսերի ձեռքբերման գործարքի կնքման շուրջ բանակցություններ վարելը և «Վեոն Արմենիա» ՓԲ ընկերության բաժնետոմսերի ձեռքբերման բանակցող գործարքը կնքելն արգելելու պահանջով: Երեկ մենք գրել էինք, որ դատարանը՝ վրիպակների պատճառով հետ է վերադարձրել հայցադիմումը, առաջարկելով ուղղել վրիպակները։
Այսօր մենք տեղեկացանք, որ հայցն արդեն նորից է ներկայացվել դատարան եւ դատարանն այն վարույթ է ընդունել։ Ավելին՝ մասնակիորեն բավարարել է հայցվորի պահանջը՝ հայցի ապահովման միջոց կիրառելու մասին։
Ըստ այդմ՝ դատարանը «արգելել է «Թիմ» ընկերությանը կնքել «Վեոն Արմենիա» ՓԲ ընկերության բաժնետոմսերի ձեռքբերման գործարք եւ գրանցման ներկայացնել գործարքից ծագող իրավունքները»։ «Թիմ»- ի եւ «Վեոնի» միջեւ բանակցությունները եւս արգելելու պահանջը դատարանը մերժել է։
«Յուքոմ» ընկերությունը քիչ առաջ հաղորդագրությւոն է տարածել՝ նշելով․
«Ի պաստասխան ԶԼՄ-ների հարցման, տեղեկացնում ենք, որ ս. թ. օգոստոսի 13-ին Երևան քաղաքի առաջին ատյանի ընդհանուր իրավասության դատարանը բավարարել է «Յուքոմ» փակ բաժնետիրական ընկերության հայցի ապահովման միջնորդությունը մասնակի՝ այն մասով, որ արգելել է «ԹԻՄ» ՍՊ ընկերությանը կնքել «Վեոն Արմենիա» ՓԲ ընկերության բաժնետոմսերի ձեռքբերման գործարք և գրանցման ներկայացնել գործարքից ծագող իրավունքները:
«Յուքոմ» ՓԲԸ-ն հայցադիմում էր ներկայացրել Երևան քաղաքի առաջին ատյանի ընդհանուր իրավասության դատարան ընդդեմ «ԹԻՄ» սահմանափակ պատասխանատվությամբ ընկերության՝ խնդրելով հաստատել, որ առկա պայմաններում «ԹԻՄ» ՍՊԸ կողմից «Վեոն Արմենիա» ՓԲԸ բաժնետոմսերի ձեռքբերման բանակցային գործընթացում «Յուքոմ» ՓԲԸ պատկանող չբացահայտված տեղեկատվության օգտագործումը և «ԹԻՄ» ՍՊԸ հիմնադիրների կողմից «Յուքոմ» ՓԲԸ հանդեպ ունեցած ֆիդուցիար պարտավորությունների խախտումը հանդիսանում է անբարեխիղճ մրցակցություն, ինչպես նաև պարտավորեցնել «ԹԻՄ» ՍՊ ընկերությանը դադարեցնել անբարեխիղճ մրցակցությունը:
Նշենք, որ «Յուքոմ»-ը միջնորդել էր կիրառել հայցի ապահովման միջոց, մասնավորապես, «ԹԻՄ» ՍՊԸ-ին արգելել վարել բանակցություններ «Վեոն Արմենիա» ՓԲԸ-ի բաժնետոմսերի ձեռքբերման վերաբերյալ գործարքի կնքման շուրջ, ինչպես նաև կնքել «Վեոն Արմենիա» ՓԲԸ բաժնետոմսերի ձեռքբերման բանակցվող գործարքը (ստորագրել գործարքը և գրանցման ներկայացնել գործարքից ծագող իրավունքները):
Հաշվի առնելով գործի առանձնահատկությունները՝ «Յուքոմ»-ը ձեռնպահ է մնում հետագա տեղեկատվության տրամադրումից, սակայն գործի հետագա փուլերում, ըստ անհրաժեշտության, հավելյալ պարզաբանումներ կներկայացվեն հանրությանը:
Կարծիքներ