«Հրապարակ». Եթե արտահերթը Թուրքիային ձեռնտու է, ուրեմն դրանք կլինեն

«Հրապարակի» զրուցակիցն ԱԺ «Հայաստան» խմբակցության պատգամավոր, դաշնակցական Արմենուհի Կյուրեղյանն է:

- Տիկին Կյուրեղյան, վերջին շրջանում շատ է խոսվում արտահերթ խորհրդարանական ընտրությունների մասին, եւ որոշ քաղաքական ուժեր անթաքույց քարոզարշավ են անգամ սկսել: Ակտիվացողներից մեկն էլ «Հանրապետություն» կուսակցության նախագահ Արամ Սարգսյանն է։ Նա հայտարարություններով է հանդես գալիս, հարցազրույցներ տալիս: Երեկ էլ հայտարարել է, որ եթե առաջիկայում լինեն արտահերթ խորհրդարանական ընտրություններ, ապա ինքը ռադիկալ ընդդիմություն է լինելու: Ի դեպ, սա ասում է մի քաղաքական գործիչ, ում ղեկավարած քաղաքական ուժը երկու ամիս առաջ մասնակցեց Երեւանի ավագանու ընտրություններին, նույնպես հայտարարեց, որ ընդդիմություն է, ապա ՔՊ-ի հետ կոալիցիա կազմեց եւ մեծապես աջակցեց, որ Տիգրան Ավինյանը քաղաքապետ դառնա` չունենալով անհրաժեշտ ձայներ: Ի՞նչ կասեք այս իրավիճակի մասին:

- Շատ ծիծաղելի իրավիճակ է: Արամ Սարգսյանը, փաստորեն, իրեն ընդդիմություն է համարում, այն էլ՝ ռադիկալ: Ընդդիմություն` նայած թե ում: Եթե նա նախատեսում է, որ առաջիկայում լինելու են արտահերթ ընտրություններ, իսկ այդ պարագայում խորհրդարանական ընդդիմությունը հաղթելու է, ապա այսօրվա ընդդիմության համար, որը վաղն իշխանության է գալու, նա կարող է լինել ռադիկալ ընդդիմություն: Նա փաստացի չի ասում, թե կոնկրետ ում է ընդդիմանալու: Եթե առաջիկայում լինեն արտահերթ ընտրություններ, այս իշխանությունները, նաեւ Արամ Սարգսյանը լինելու են ընդդիմություն, այդ իմաստով ճիշտ է ասել: Արամ Սարգսյանն ու էլի նրանց նման մի քանի իբր ընդդիմադիր ուժեր ե՞րբ են իրականության մասին խոսել, որ հիմա էլ խոսեն: Մշտապես ասել են մի բան, արել` ճիշտ հակառակը: Այնպես որ, կներեք, ես Արամ Սարգսյանի ոչ մի խոսքին լուրջ չեմ վերաբերվում, որովհետեւ առհասարակ իրեն քաղաքական ուժ չեմ համարում, էլ ուր մնաց ռադիկալ ընդդիմություն համարեմ: Ես այդ մարդուն չեմ տեսնում որպես քաղաքական ուժ: Նա պարզապես Նիկոլ Փաշինյանի թիմի կցորդն է:

- Բոլոր ժամանակներում էլ եղել են Արամ Սարգսյանի նման «ընդդիմադիրներ»: Այդ առումով ամենացցուն օրինակն Արթուր Բաղդասարյանն է, ում անընդհատ հիշում են մարդիկ, որն աջակցեց Սերժ Սարգսյանին: Բարոյակա՞ն է, երբ քաղաքական ուժը, կուսակցությունը հանդես է գալիս որպես ընդդիմադիր, բայց խաբում է իր ընտրողին եւ իշխանության հետ կոալիցիա կազմում:

- Դա անթույլատրելի երեւույթ է, բայց, շատ ներողություն, այս իշխանություններն էլ թույլատրելի սահմաններում չեն գործում: Իրենք էլ մի բան են հայտարարել, խոստացել՝ արել են ճիշտ հակառակը: Հիշեք ՔՊ-ի նախընտրական քարոզարշավները: Ո՞ր մի խոստումն են կատարել: Դա կոչվում է վարչական ռեսուրսի կիրառում, կոռուպցիայի մեծագույն դրսեւորում: Անթույլատրելի երեւույթ է դա, չի կարելի հանրությանն այդպես խաբել, քվե վերցնել` նպատակներ իրականացնելու համար, եւ անել խոստումների ճիշտ հակառակը: Խոստումներ տալ՝ սեփական նպատակներն իրագործելու համար, ու դրժել դրանք, դա ամենամեծ կոռուպցիոն դրսեւորումն է: 

- Արտահերթ ընտրությունների մասին առաջիններից մեկը գրել է «Հրապարակը»: Մեր տեղեկություններով, այդ թեման շրջանառության մեջ են դրել արեւմտյան ուժերը, որոնք պահանջում են պրոռուսական խորհրդարանը փոխարինել պրոարեւմտյան խորհրդարանով: Նաեւ դրանով է բացատրվում Արամ Սարգսյանի ակտիվացումը: Ձեր կարծիքով` կա՞ արտահերթ ընտրությունների անհրաժեշտություն, այն դեպքում, երբ երկուսուկես տարի է մնացել հերթական ընտրություններին:

- Իմ կարծիքով` իշխանություններին այս պահին արտահերթ ընտրություններն ընդհանրապես ձեռք չեն տալիս: Ինչու, որովհետեւ պրակտիկան ցույց է տվել, որ յուրաքանչյուր արտահերթ ընտրություն, իշխանությունը ձգձգում է 2 տարի, դրանից հետո նրանց վարկանիշը զրոյանում է: Այս իշխանությունները դեռ երկուսուկես տարի ունեն, նրանց այսօրվա արտահերթ ընտրությունը ոչինչ տալ չի կարող: Իհարկե, եթե իրենց տերերը նման պահանջ ունեն, դա այլ հարց է: Հակառակ դեպքում այս իշխանություններին նոր ընտրություններ պետք չեն, թեպետ սրանք իրենց ցանկություններին անգամ տեր կանգնել չեն կարող: Անելու են այն, ինչ թելադրելու են թրքամետ ուժերը: Եթե արտահերթը Թուրքիային ձեռնտու է, ուրեմն կլինեն, կասկածելու բան չկա այդտեղ:

- Կան նաեւ տեսակետներ, որ Նիկոլ Փաշինյանը փորձում է Ռուսաստանի հետ հարաբերությունները կարգավորել, այդ պատճառով էլ Արամ Սարգսյանն ու մյուս արեւմտամետ ուժերն իրենց սկսել են ռադիկալ ընդդիմություն համարել եւ կոշտացնել իրենց դիրքորոշումը:

- Ես նույն հաջողությամբ կարող եմ այդ տեսակ կարծիքները դիտարկել Փաշինյանին օգտակար քայլեր, քանզի այդ թեզերով հանրության ռուսամետ շերտին այդ վերլուծություններով փորձում են ստիպել, որպեսզի նրանք եւս տեր կանգնեն Փաշինյանին, որը գնում է դեպի Ռուսաստան: Դա հենց այդ տրամաբանության մեջ է, աջակցություն է` ուղղված Փաշինյանին: Այնպես որ, այդ պոպուլիստական քայլերով նման մարդիկ ամեն ինչի ընդունակ են: 

- Դուք նշում եք, որ օրվա իշխանություններին արտահերթ ընտրությունները ձեռնտու չեն, որովհետեւ նրանց վարկանիշը զրոյացել է: Կա տեսակետ, որ իշխանության վարկանիշին զուգահեռ զրոյացել է նաեւ ընդդիմության վարկանիշը:

- Նայած թե ինչ չափումների մեջ ենք գնահատում: Ես նման բան չեմ տեսնում, դեռ մի բան էլ հակառակը: Ինքս վանաձորցի եմ, երբ Վանաձորում ամեն օր քայլում եմ փողոցներով, օր-օրի տեսնում եմ, որ մարդկանց վերաբերմունքը փոխվում է` դրական իմաստով: Ինձ մոտենում են մարդիկ, ովքեր նախկինում Նիկոլ Փաշինյանին էին ընտրել, բայց այսօր բարձրաձայնում են, որ իրենք սխալվել են, ավելին` խնդիրների լուծումը տեսնում են մեր միջոցով: Ամեն դեպքում, կոնկրետ իմ միջոցով տարբեր հարցեր են մարդիկ բարձրաձայնում, որպեսզի լուծենք դրանք: Այնպես որ, այն տեսակետը, թե մեր վարկանիշն ընկել է, իրական չէ: Եթե արտախորհրդարանական ընդդիմության մասին խոսենք, ապա նրանք հիմնականում արամսարգսյաններ են եւ ունեն զրոյական վարկանիշ, իսկ խորհրդարանական ընդդիմության վարկանիշը բարձրանում է: