Մեր շներն ու կատուները կարող են փրկել Փարիզը․ թուրք լրագրող

Թուրքիայի շներն ու կատուները կարող են փրկել Փարիզը, որը գրավել են առնետներն ու մկները, գրում է Sabah-ի սյունակագիր Մևլութ Թեզելը։

Ինչպես նշել է լրագրողը, Ֆրանսիայի մայրաքաղաքի իշխանությունները «պատերազմ են հայտարարել առնետներին»՝ դրա վրա ծախսելով զգալի միջոցներ և կիրառելով կրծողների դեմ պայքարի տարբեր մեթոդներ։

«Քաղաքի պաշտոնյաներն ամեն օր որսի էին գնում, բայց առնետները հաղթեցին ճակատամարտում», - ասել է Թեզելը:

Հիմա Փարիզում որոշել են փոխել մոտեցումը և քաղաքապետարանում ստեղծել են աշխատանքային խումբ՝ առնետների հետ քաղաքացիների «համակեցության» հարցերով, նշել է նա։

«Իրականում խնդիրը կլուծվի, եթե մենք մեր փողոցներից հավաքենք շների ու կատուների բանակ և ուղարկենք Փարիզ»,- ընդգծել է հոդվածի հեղինակը։

Փարիզի իշխանությունները տարիներ շարունակ անհաջող կերպով փորձում են պայքարել Ֆրանսիայի մայրաքաղաքում ապրող միլիոնավոր առնետների հետ։ Քաղաքի յուրաքանչյուր զբոսայգու և փոքրիկ հրապարակի ցանկապատին փակցված է «առանց առնետների» գրառմամբ ցուցանակ և քաղաքացիներին աղբ չթափելու կոչ։ 

Դեռ 2017-ին մայրաքաղաքում կրծողների թվի կրճատման նպատակով 1,5 մլն եվրո արժողությամբ ծրագիր էր մեկնարկել։ Այն ներառում էր այնպիսի միջոցառումներ, ինչպիսիք են ավելի հաճախակի աղբահանությունը և թույնի տեղադրումը այն վայրերում, որտեղ հավաքվում են առնետները: 

Աղբի պլաստիկ տոպրակները փոխարինվել են առավել պինդ աղբամաններով։