Ջուլիան Ասանժ. ՎիքիԼիքս. «Գաղտնի թղթապանակներ»
Մի շարք անվանի մարդիկ, ականավոր լրագրողներ, որոնց թվում, անշուշտ, խիզախներն այդքան էլ շատ չեն, Ջուլիան Ասանժի ձերբակալությունն ու հանձնումը համարեցին լրագրության պատմության ամենախավար ակնթարթներից մեկը: Ջուլիան Ասանժը, կարելի է ասել, վաղուց հայրենիք չունի՝ Ավստրալիան հրաժարվել է նրանից, Բրիտանիան՝ կալանել, Շվեդիան աղերսում է իրեն հանձնել «բռնաբարության» համար կասկածվող ՎիքիԼիքսի ղեկավարին, ԱՄՆ-ն հարկադրում է Էկվադորին ուղղակիորեն վաճառել լրագրողին, եւ, ինչ խոսք, չի բացառվում, որ էքստրադիցիա պահանջելով՝ կհարկադրի նաեւ Բրիտանիային:
Այդուհանդերձ, Ջուլիան Ասանժն անհայրենիք մեկը չէ: Նրա միակ եւ անվերապահ հայրենիքն ազատ խոսքն է, լրագրությունը: Մեր ժամանակների մեծագույն լրագրողներից մեկին դատավարական ծանրագույն ուղի է սպասվում: Իր հարցազրույցներում Ասանժը քանիցս խոստովանել է, որ ԱՄՆ-ի «անվտանգության» ծառայությունների ձեռքն ընկնելուց վախենում է, եւ դա գրեթե համազոր է մահվան վախին: Իսկապես՝ հնարավոր չէ կանխատեսել, թե մոտ ապագայում ինչպիսի ընթացք կստանա Ասանժի եւ ՎիքիԼիքսի գործը, արդյոք Բրիտանիան կարտահանձնի՞ նրան, ինչպիսի՞ պատիժ կսահմանի ԱՄՆ-ն տարիներով հանրությունից կոծկած սարսափեցնող ճշմարտությունները վեր հանողի նկատմամբ: Իսկ արդեն խոսում են ցմահ բանտարկության, նույնիսկ մահապատժի կիրառման իրական հնարավորություններից:
Օրեր առաջ բրիտանացի ռոք երաժիշտ, «Փինք Ֆլոյդի» հիմնադիրներից Ռոջեր Ուոթերսը դատապարտեց Ասանժի ձերբակալությունը եւ հայտարարեց, որ իր բրիտանացի լինելուց արդեն իսկ ամաչում է, նաեւ մի շարք ակտիվիստներ, որոնց թվում է հայտնի գրող, ձախ գաղափարական, հասարակական գործիչ եւ հրապարակախոս Արունդատի Ռոյը, նաեւ ուրիշներ հայտարարություն տարածեցին, որում իրենց լիարժեք զորակցությունն են հայտնում Ջուլիան Ասանժին՝ բրիտանական արդարադատության մարմիններին հորդորելով գործարքի չգնալ ԱՄՆ-ի հետ եւ անհապաղ ազատ արձակել լրագրողին:
Ջուլիան Ասանժը մի քանի ուշագրավ գրքերի հեղինակ է, որոնց թվում է «ՎիքիԼիքս. գաղտնի թղթապանակներ» հատորը, ուր ծավալուն ներկայացված են ԱՄՆ-ի արտաքին, ներքին քաղաքականության՝ հանրությանն անհայտ կողմերը, ՎիքիԼիքսի գործունեությունն ու դերակատարությունը այդ ամբողջ պարտակած տեղեկատվությունը ստանալու եւ լույս աշխարհ հանելու գործընթացում: Գրքում Ասանժը փաստարկված խորհում է նաեւ կայսրական իշխանության, քաղաքական, ավտորիտար կառույցների, ազդեցիկ կորպորացիաների ձեռքին տեխնոլոգիական գործիքների օգտագործման աղետալի հետեւանքների շուրջ: Եղելություններ, որոնք պարզապես յուրաքանչյուրին են առնչվում:
Կարծիքներ