ՀԱԿ-ը ինքն իր ընտազանգվածի մի մասը տվեց նոր ՕԵԿ-ին՝ ԲՀԿ-ին

Հայ ազգային կոնգրեսի մաս կազմող «Ժողովրդավարական հայրենիք» կուսակցությունը հանդես է եկել հայտարարությամբ, որտեղ նշվում է. «Մայիսի 6-ի ԱԺ ընտրություններն անցկացվեցին ահաբեկման ու վախի մթնոլորտում. վարչախումբն օգտագործեց ընտրակեղծիքների տեխնոլոգիաների իր ողջ զինանոցը: «Ժողովրդավարական հայրենիք» կուսակցությունը, չընդունելով 2012 թ. մայիսի 6-ի ԱԺ ընտրությունների  արդյունքները, գտնում է, որ երկրի ճակատագրով մտահոգ քաղաքական ուժերի այլընտրանքն իրավիճակի ճշգրիտ գնահատումն ու նոր ուժային կենտրոնի ձեւավորումն է»: Արդյոք չի՞ նշանակում, որ «Ժողովրդավարական հայրենիքի» ղեկավարն այլեւս Կոնգրեսին չի ընդունում որպես ռադիկալ ընդդիմություն եւ պատրաստվում է լքել ՀԱԿ-ը: Զրուցեցինք կուսակցության ղեկավար Պետրոս Մակեյանի հետ:



- Պարոն Մակեյան, փաստորեն Դուք ՀԱԿ-ին այլեւս չեք դիտարկում որպես արմատական ընդդիմություն, որը կարող է երկրում էական փոփոխություններ բերել, եւ նոր ուժի անհրաժեշտություն եք տեսնում: Հնարավո՞ր է, որ Ձեր կուսակցությունը եւս լքի ՀԱԿ-ը:



- Ես հրապարակային ասել եմ, որ ՀԱԿ-ը միայնակ չի կարող պայքարել այս վարչախմբի դեմ, վերջերս նաեւ Զուրաբյան Լեւոնը նշեց, որ հետընտրական զարգացումների չտանելու միակ հիմնավորումն այն էր, որ Կոնգրեսին այլ ուժեր չմիացան: Ես ունեցել եմ առիթ պատասխանելու, որ «Ժողովրդավարական հայրենիքը» 10 տարի շարունակ պայքարում է երկրում սահմանադրական կարգը հաստատելու համար, եւ ինքնանպատակ չէ դուրս գալը կամ մնալը:



2008-ին պաշտպանել ենք Լեւոն Տեր-Պետրոսյանին, որովհետեւ մենք հստակ պատկերացրել ենք, որ նա այն քաղաքական գործիչն է, որ կարող է իրավիճակ փոխել: Մտել ենք ՀԱԿ կազմի մեջ, որովհետեւ հասկացել ենք, որ քաղաքական ուժերի միավորումը լուրջ ուժային կենտրոն է: Այսօր մենք տեսնում ենք, որ այդ ուժային կենտրոնն իրեն չի սպառել, բայց այս պահին բավարար չէ: ...Միգուցե սխալների մասին այս պահին հրապարակային խոսելը ճիշտ չէ: Թեպետ ես ժամանակին ասել եմ, որ մենք գտնում էինք, որ երկխոսության չպետք է գնար իշխանության հետ, շատ սխալ էր ԲՀԿ-ի հետ հույսեր կապելը: Եվ արդյունքում ունեցանք այն, որ մեր ընտրազանգվածի մի մասը գնա դեպի նոր ՕԵԿ՝ ԲՀԿ:



- Ասացիք, որ ՀԱԿ-ը չի սպառել իրեն, հույս ունեք, որ այսպիսի ընտրություններից հետո, մանդատները վերցնելուց հետո ՀԱԿ-ը կրկի՞ն ռադիկալ քայլերի կգնա: Ե՞րբ պարզ կդառնա, որ ՀԱԿ-ն իրեն սպառել է:



- ՀԱԿ-ը չի սպառվել եւ տակտիկական հեռանկարային ծրագրեր պետք է ընդունի մինչեւ 2013թ., բացի դրանից, մեր հայտարարությունում ներառված կետի համադրմամբ, այն է՝  մտահոգ ուժերի հետ համագործակցելուց հետո կերեւա, որ գնալու է իր հին ճանապարհով՝ 2008-ից մինչեւ 2011-ի գարնան ճանապարհով, այդ դեպքում հնարավոր կլինի երկրում ռեալ իրավիճակ փոխել, եթե ոչ, ապա նշանակում է, որ ոչ միայն ՀԱԿ-ը, այլեւ հայաստանյան քաղաքական վիճակը չի փոխվելու, մնալու է այս վարչախմբի տիրապետության տակ:



- Այսինքն՝ Կոնգրեսում ընտրություններից հետո քննարկո՞ւմ է եղել մարտավարությունը փոխելու վերաբերյալ, որովհետեւ ՀԱԿ-ը նախորդ տարվանից հայտարարում է, որ կողմ է, այսպես կոչված, թավշյա հեղափոխությանը:



- Կարծում եմ՝ այն իրավիճակը, որում հայտնվեց ՀԱԿ-ը ընտրություններից հետո (թեեւ մենք ասել ենք, որ որեւէ ընտրություն չի եղել), այնուամենայնիվ, դա ՀԱԿ-ի վարած քաղաքականության հետեւանքն էր: Եթե մենք լոյալ քաղաքական գիծ չտանեինք, ապա շատ հնարավոր է այսօր կառավարության ձեւավորումը դրվեր ՀԱԿ-ի վրա: ՀԱԿ-ը, բնականաբար, իր մեղքի բաժինն ունի այս ամենում, բայց այնքանով, որ թույլ տվեց, որ վարչախումբն ազատ կարողանա իր նախամտածված ծրագիրը տանի առաջ:



- Պարոն Մակեյան, ասացիք, որ ՀԱԿ-ն իրեն դեռ չի սպառել, եւ հույս հայտնեցիք, որ կվերանայի իր մարտավարությունը, կարո՞ղ ենք արձանագրել, որ «Ժողովրդավարական հայրենիքը» մինչեւ 2013-ը կսպասի եւ դուրս չի գա ՀԱԿ կազմից:



- Ես նման բան չասացի, ասացի, որ այս պահին մենք տեսնում ենք այն պոտենցիալը, որ կա ՀԱԿ-ում իրավիճակ փոխելու համար, եւ, այլ մտահոգ ուժերին ներգրավելով գործընթացի մեջ, կարող ենք հասնել ցանկալի արդյունքի: Իսկ դա կարող է լինել 1, 2, 5 ամսվա ընթացքում կամ մինչեւ 2013 թվականը: Իսկ քայլերը, որոնք այդ ուղղությամբ պիտի տարվեն կամ ոչ, կերեւան, մենք կքննարկենք եւ կհասկանանք՝ գնալո՞ւ են նախանշված վիճակին, թե՞ ոչ:



- Արդեն հայտնի է, որ երկու կուսակցություն լքել են ՀԱԿ-ը, ինչպե՞ս կգնահատեք նրանց քայլը, նրա՞նք են առավել ռեալ գնահատել իրավիճակը, թե՞ Դուք:



- Կարծում եմ՝ իմ կողմից այդ հարցին պատասխանելը ճիշտ չի լինի, բայց, այնուամենայնիվ, «Հանրապետություն» կուսակցության հետ մենք երկար ճանապարհ ենք անցել՝ 11-12 տարի, եւ ես վստահ եմ, որ ոչ միայն մեր համագործակցությունը, այլեւ Կոնգրեսի հետ նրա համագործակցությունը կշարունակվի:



- Պարոն Մակեյան, տեսակետ կա, որ դժգոհություններ առաջացել են հիմնականում մանդատ չստացողների մոտ: Դուք առհասարակ կո՞ղմ էիք մանդատները վերցնելուն:



- Այդ հարցը (նկատի ունի մանդատները վերցնել-չվերցնելու՝ Լ.Շ.) ՀԱԿ-ում ընդհանրապես չի քննարկվել եւ որոշում չի ընդունվել, ինչն ամենամեծ սխալն է: Մեր տեսակետը հետեւյալն է, որ ԱԺ նման իմիտացիոն ընտրություններից հետո պետք է ընդդիմությունը, եւ առաջին հերթին ՀԱԿ-ը, հրապարակից դուրս չգար, եւ այդ ժամանակ այդ գործընթացները կհանգեցնեին մի հանգրվանի, որ մինչեւ ԱԺ առաջին նիստը պարզ կլիներ՝ մանդատները վերցնել եւ գնալ, զուգահեռ պայքարը շարունակե՞լ ԱԺ-ում, թե՞ անիմաստ է, եւ դրանք չպետք է վերցնել: Հիմա միանշանակ պատասխանելը ճիշտ չէ, բայց եթե գործընթաց սկսվեր, այդ ժամանակ մոտեցումը հստակ կլիներ:



- Լավ, այդ դեպքում, երբ ռեալ պահին Կոնգրեսը գործողություններ չսկսեց, Ձեր լավատեսությունն ի՞նչ հիմքեր ունի, որ առաջիկայում կվերանայի իր մարտավարությունը: Գուցե Արամ Սարգսյանն առավել ռեա՞լ գնահատեց իրավիճակը:



- Մեր հույսը, որ մենք պետք է ամեն ինչ անենք, որ Կոնգրեսում մեր ասելիքը տեղ հասցնենք: Երկրորդ՝ մենք այս պահին չենք տեսնում այլընտրանք, երրորդ՝ եթե մենք զգացինք, որ այլեւս որեւէ այլընտրանք Կոնգրեսում չենք կարող գտնել, ուրեմն կուսակցությունն իր մոտեցումներն ու որոշումները կկայացնի: