Ժամանակն ամեն ինչ իր տեղը դրեց` ով ով էր, ով ինչ էր

«Օրինաց երկիր» կուսակցության ղեկավար Արթուր Բաղդասարյանը ժողովրդի վստահության չարաշահման սիմվոլ դարձավ դեռ 2008 թվականին, երբ 300 հազար քաղաքացիներ, նրա ընդդիմադիր լինելու գաղափարին հավատալով, քվեարկեցին իր օգտին: Սակայն ընտրություններից հետո այդ 300 հազար ընդդիմադիր քվեն Բաղդասարյանը նվիրաբերեց Սերժ Սարգսյանին: Սեփական ընտրողի  աչքին պոտենցիալ նախագահը փոշիացավ ու դարձավ շարքային խաբեբա:



 



Եվ ահա, երբ որեւէ քաղաքական ուժ վայրիվերումների մեջ է ընկնում, նրան սկսում են կոչել Արթուր Բաղդասարյան-2: Վերջին շրջանում նման որակումներ հնչեցին Գագիկ Ծառուկյանի հասցեին, երբ նա 450 հազարանոց էլեկտորատին (հանուն ում խոստացել էր զրկվել ամեն ինչից) հայտարարեց, թե չի առաջադրվելու ՀՀ նախագահի թեկնածու: ԲՀԿ-ում այս համեմատությունը շատ ծանր են տանում: Ավելին՝ ասում են, նրանց համար անընդունելի է ՕԵԿ-ի հետ մոտ ապագայում կոալիցիա կազմելը: ԲՀԿ-ի կուլիսներում խոսում են, թե իշխանության հետ կոալիցիա կազմելու նախապայմաններից մեկը ՕԵԿ-ի ապամոնտաժումն է կոալիցիայից: Ըստ իրենց, խորհրդարանական ընտրություններին մի կերպ 5 տոկոս հավաքած կուսակցությունն իրավունք չունի 30 տոկոսանոցի հետ ոտք գցել:



 



Արդյո՞ք սա մտահոգում է Արթուր Բաղդասարյանին, եւ արդյո՞ք իրեն ցավ չի պատճառում այն կորսված շանսը, որը կարող էր այլ հանգրվանի հասցնել իրեն: Այս հարցերի պատասխանները փորձեցինք ստանալ Արթուր Բաղդասարյանից՝ ՀՀԿ համագումարի ընդմիջմանը:



 



- Պարոն Բաղդասարյան, ԲՀԿ կուլիսներում պատվաբեր չեն համարում ՕԵԿ-ի հետ կոալիցիա կազմելը` պատճառաբանելով, թե հինգ տոկոս հավաքած կուսակցության հետ անարդար է կոալիցիա կազմելը: Խոսում են, որ այս պահանջը եւս դրվել է Սերժ Սարգսյանի սեղանին:



 



- Աբսուրդային խոսակցություն է: Դե հիմա կարող են ինչ-որ մարդիկ ինչ-որ բաներ խոսել, մենք քաղաքական որոշումներ կայացնող մարդիկ ենք եւ գտնվում ենք բուն իշխանության բուրգում, երկրորդը՝ կոալիցիան ձեւավորվել է երկու կուսակցությունների քաղաքական համաձայնության արդյունքում, եւ ոչ մեկ ոչ մեկին չի կարա այդ կոալիցիայից հանի: Դա կլինի մի դեպքում, եթե երկու կուսակցությունները որոշեն, որ իրենք այլեւս  կոալիցիայում չեն լինելու: Այսօր նման բան չկա:



 



- Ձեր կարծիքով, ինչո՞ւ Ծառուկյանը չառաջադրվեց:



 



- Երեւի դա իրենց  պետք է հարցնել… ԲՀԿ-ն իրեն հռչակել է որպես այլընտրանք, ես իմ ելույթներում ասել եմ՝ դասական քաղաքագիտության մեջ լինում են կամ իշխանություն, կամ ընդդիմություն: Իրենք որդեգրել են այլընտրանքային ռազմավարություն, որը նորույթ է քաղաքականության եւ քաղաքագիտության մեջ: Բայց մենք «Բարգավաճ Հայաստանի» հետ երկար տարիների համագործակցության ճանապարհ ենք անցել եւ  գնահատում ենք մեր անցած ճանապարհը  եւ հարգում նրանց որոշումը: Յուրաքանչյուր կուսակցություն ինքը պետք է որոշի իր մարտավարությունը: Տվյալ դեպքում ավելի ճիշտ կլիներ, որ էդ հարցի պատասխանն իրենք տային:



 



- Գագիկ Ծառուկյանի  չառաջադրվելու հայտարարությունից հետո սկսեցին ԲՀԿ-ին համեմատել ՕԵԿ-ի 2008 թվականի պահվածքի հետ: Ձեզ ցավ չե՞ն պատճառում այդ համեմատությունները:



 



- ՕԵԿ-ն անկախությունից այս կողմ Հայաստանի ամենաազդեցիկ քաղաքական ուժն է: Մենք ոչ մեկի կողմը չենք անցել: «Օրինաց երկիր» կուսակցությունը մասնակցել է ընտրություններին, ես ժամանակին, որպես Ազգային ժողովի նախագահ, կամովին հրաժարական եմ տվել, ՕԵԿ-ի նկատմամբ ժամանակին, շատ լավ գիտեք` ինչ ճնշումներ են իրականացվել… «Օրինաց երկիրը» մնացել է կայուն ու անսասան:



 



 - Իշխանության կողքին կանգնելու առումով…



 



- Իր դիրքորոշումների մեջ… Ոչ, ինչո՞ւ իշխանության, բայց մենք ընտրությունների ենք, չէ՞, մասնակցել:



 



- Հուսախաբ արեցիք Ձեր ընտրողներին:



 



- Ոչ, ինչի՞ համար, ես հավաքել եմ երեք հարյուր հազար  ձայն, եւ էդ երեք հարյուր հազար ձայնի արդյունքում եղել է Սերժ Սարգսյանի կողմից հրապարակային հնչեցված առաջարկ` կազմելու կոալիցիա, եւ կազմեցինք:



 



- Բայց երեք հարյուր հազար հոգին Ձեզ չէր ընտրել  իշխանության հետ կոալիցիա կազմելու համար, ընտրել էր որպես իշխանությանն ընդդիմադիր թեկնածու:



 



- Բայց ինչի՞ համար, ո՞վ է  ասում, ես էսօր քի՞չ եմ քննադատում… 2003 թվականին ես իշխանություն եմ եղել, չէ՞, ինչքա՞ն ձայն եմ տարել, որի արդյունքում ձեւավորեցինք կոալիցիա, երկրորդ տեղն եմ զբաղեցրել, տարել ենք այնքան ձայն, որքան 2008-ին: Ասել՝ դա իշխանամետ ձայներ են, թե ընդդիմադիր, ճիշտ չի:



 



- Այդ քայլի արդյունքում  2012 թ. խորհրդարանական ընտրություններին շատ քիչ ձայն հավաքեցիք:



 



- Շատ քիչը ո՞րն ա, մենք տարել ենք 100 հազար ձայն, իսկ էն ժամանակ, երբ 300 հազար էր,  անձի ընտրություն էր:



 



- Եթե Դուք առաջադրվեիք այս նախագահական ընտրություններում,  կունենայի՞ք այդքան ձայն:



 



- Նախ, որպես քաղաքական գործիչ, ես իմ խոսքն ասել եմ եւ իմ խոսքի տեր մարդ եմ: Ասել եմ, որ չեմ առաջադրվելու, պայմանավորվել եմ Սերժ Սարգսյանի հետ 2008 թվին, երբ կնքել ենք հուշագիր: Ես ասել եմ, որպես երկրի նախագահ` տասը տարի լինելու եմ քո կողքին, որովհետեւ ամեն մի նորմալ երկրում նախագահներն իրենց երկու ժամկետը լիարժեք պետք է աշխատեն, որ իրենց ծրագրերն առաջ իրագործեն: Իսկ ես ինչ ասում եմ, նա էլ անում: «Օրինաց երկիրն» ամեն օր ամրապնդվում է:



 



- Իսկ հանրության շրջանում համարում են,  որ ՕԵԿ-ն այլեւս չկա, միայն Արթուր Բաղդասարյանն է այդ ՕԵԿ-ը:



 



- Գիտեք ինչ կա, կարող են չարությամբ խոսել, ինչպես ասում են՝ լեզվին ոսկոր չկա, բայց մենք միակ կուսակցությունն ենք, ով կարողացավ վերակազմակերպել կուսակցությունը: Այո, մենք էլ ունենք սխալներ, մեզ մոտ հաշվառված էր 150-160 հազար մարդ, բայց մենք տարանք ձայների կեսը, որովհետեւ մարդիկ տրվեցին գայթակղություններին: Դուք շատ լավ գիտեք` ձեր հարեւանները ոնց են քվեարկել:



 



- Իշխանությունն է ընտրակաշառք բաժանել…



 



- Ես ինքս, որպես իշխանության ներկայացուցիչ, դատապարտում եմ, փողի արդյունքում էին ընտրում:



 



- Իշխանության բաժանած փողի արդյունքում…



 



- Չէ, ինչի՞ իշխանության, Դուք լավ գիտեք, թե ովքեր էին փող բաժանում:



 



- Ինչպես ՀՀԿ-ն, այնպես էլ ԲՀԿ-ն, ՕԵԿ-ն-էլ բաժանում էր Ձեր արտադրանքը:



 



- Չէ, չէ, պրիմիտիվ շահարկում եք, հիմա էլ ենք բաժանում: Այ, հենց հիմա, Նոր տարուն մեր կուսակցականներին, համախոհներին՝ դա կլինի Մարտի 8-ին կանանց ծաղիկ բաժանել եւ այլն..



 



- Բայց արդյո՞ք ողորմություն չէ մի շիշ օղի ու հյութ բաժանելը, պարոն Բաղդասարյան: Մինչդեռ կարող էիք օգտակար լինել` որեւէ բարեփոխմամբ հանդես գալով:



 



- Չէ, չէ, կորպորատիվ ցանկացած միջոցառում իր աշխատողներին Նոր տարուն կամ այլ տոներին որոշակի բան բաժանում է իր հնարավորության սահմաններում:



 



- Իսկ չե՞ք վիրավորվում, երբ  որեւէ քաղաքական գործչի գործունեությունը բացասական գնահատելիս որակում են «Արթուր Բաղդասարյան»` որպես ժողովրդին խաբող քաղաքական ուժի խորհրդանիշ:



 



- Արթուր Բաղդասարյանը ոչ մեկին էլ չի խաբել, ես քվեներ ստացել եմ, ու մեր կուսակցությունը մասնակցել է ընտրություններին ու հաղթել, քաղաքականության մեջ դա շատ ազնիվ դասական մոտեցում է: Այսօր Հայաստանում երկու կուսակցություն միասին ունեն անհրաժեշտ քվեները, եւ մենք մեր քաղաքական գործընկերների հետ ազնիվ ենք, ազնիվ համագործակցության ճանապարհին: Իսկ ժամանակը ամեն ինչ իր տեղը դրեց` ով ինչ էր, ով ով էր: