Մեկ ամիս է՝ լուր չունեն
hraparak
16 Նոյեմբեր 2013 | 07:48
0
Հայ ռազմագերի Հակոբ Ինջիղուլյանից արդեն մեկ ամիս որեւէ տեղեկություն չունի ոչ պաշտպանության նախարարությունը, ոչ Կարմիր խաչի միջազգային կազմակերպությունը: ԿԽՄԿ մամուլի ծառայությունից երեկ հետաքրքրվեցինք, թե ինչ ուղղությամբ են ընթանում բանակցությունները հակառակ կողմի հետ:
«Բանակցությունները մեզ մոտ, ինչպես հայտնի է, կոնֆիդենցիալ եղանակով են ընթանում: Բայց ասեմ, որ բոլոր հավանական սցենարների դեպքում մեր ուշադրության կենտրոնում ռազմագերին է եւ նրա վերջնական որոշումը»: Նշենք, որ, ըստ արդեն իսկ հրապարակված տեղեկությունների, Ինջիղուլյանը ցանկություն է հայտնել տեղափոխվել երրորդ երկիր:
Այդ որոշումը, սակայն, վերջնական չէ եւ, ինչպես երեւում է, ձգձգվում է: Նշենք նաեւ, որ վերջին անգամ Ինջիղուլյանին տեսակցել են Կարմիր խաչի միջազգային կոմիտեի Բաքվի ներկայացուցիչները` հոկտեմբերի 14-ին: Այդ հանդիպման ժամանակ Կարմիր խաչի աշխատակիցներն Ինջիղուլյանին են հանձնել ընտանիքի նամակը, ինչպես նաեւ ռագմագերու նամակն են փոխանցել նրա ընտանիքին: Հանդիպումից այլ մանրամասներ չեն ներկայացվել:
Կարմիր խաչի լրատվական ծառայության աշխատակիցն ասաց, որ տեսակցությունների կոնկրետ գրաֆիկ չկա, եւ դեռ հայտնի չէ, թե հաջորդ հանդիպումը երբ կլինի: Հիշեցնենք, որ Հակոբ Ինջիղուլյանը հակառակորդի տարածքում հայտնվել էր օգոստոսի 7-ի լույս 8-ի գիշերը` ծառայությունն իրականացնելու ժամանակ տեղանքում չկողմնորոշվելու հետեւանքով:
Սոնա ՀԱՐՈւԹՅՈւՆՅԱՆ
Կարծիքներ