Կարա-Դարվիշ․ ՈՎ ԵՄ ԵՍ
ԱՆ-շարժությունների մեջ տվայտվող հայ գրականության կեցությունը ժամանակ առ ժամանակ ինքն իրեն է դուրս բերում ծովի մակերեւույթ եւ քարացած արյունը կենդանացնող դերվիշությունը ինքն իրեն վերհիշելու համար է ցուցանում:
Եվ ահա, 20-րդ դարասկզբի հայ ֆուտուրիստ-գրող Կարա-Դարվիշի բացիկ-պոեմներն ասես ուղերձներ լինեն՝ գրականության այս անհետացող կրակի ու եռքի:
Ներկայացնում եմ դրանցից մեկը.
ՈՎ ԵՄ ԵՍ
Ես ցնորամիտ երազկոտ եմ - աստղերն եւ լուսինն են իմ երազը:
Ես հաստատուն երկրացի եմ - հողն ու բնությունն են իմ արմատը:
Ես արթուն պահապան եմ - ամեն արժեքների աչալուրջ հսկողն եմ:
Ես համաշխարհային քաղաքացի եմ - աշխարհն է իմ հայրենիքը:
Ես մարդ եմ, եւ մարդն է իմ ընկերը - ազգակիցը:
Ես սատրապ - բռնակալ եմ - բոլոր կեղծավորների, փարիսեցիների դահիճն եմ:
Ես ստրուկ եմ, գառ եմ, աղավնի ու մանուկ - բոլոր արդարամիտների, ճշմարտախոսների ղուլն եմ, կամակատարն եմ:
Ես գոռոզ ու հպարտ Ասքանազյանն եմ - առաջին հայն եմ, որ սիրում է հայ ազգը, ինչպես քառասուն հազար քաջարի եղբայրներ:
Ես բոլշեւիկ եմ - մինչեւ մազերիս ծայրը դեմոկրատ եմ, սոցիալիստ եմ:
Ես անարխիստ եմ - մահ, որոտ եւ կայծակ եմ բոլոր քարացումների համար:
Ես մաքսիմալիստ եմ - արմատից եմ պոկում, հանում,- որ փթած է. հնացած է, մաշված է:
Ես ֆուտուրիստ եմ - հպարտ ու գոռոզ կուռքերը փշրողն եմ, հաստատուն պատվանդանները գլորողը, նվիրական արձանները ջարդողը - վանդալը:
Ես խելառ սիրահար եմ - բոցավառ համբույրներ եմ դրոշմում գեղեցկուհու կրծքին եւ կատաղի թեւերով սեղմում բուռն, փոթորկոտ եւ տարփալից գրկումս:
Ես ամեն ինչ եմ եւ ոչինչ եմ:
Ես Կարա-Դարվիշն եմ:
hունվ. 4, 1918 Կարա-Դարվիշ
շարունակելի
Կարծիքներ