Բաղրամյանը նորից կփակեն

Երեկ «Ոչ թալանին» նախաձեռնության անդամներն իրազեկման երթ անցկացրին քաղաքի կենտրոնական փողոցներում։ Թռուցիկները, որոնք բաժանում էին անցորդներին, մարդկանց հրավիրում էին Ազգային ժողովին կից ամենառոմանտիկ վայրը՝ Սիրահարների այգի։ Սեպտեմբերի 1-ին տեղի ունենալիք հավաքի մասին գիտենք միայն, որ «կլինի կարծիքների փոխանակում: Հանդիպման ընթացքում «Ոչ թալանին» նախաձեռնությունը կհայտնի իր հետագա քայլերի եւ գործողությունների մասին։ Բոլորի ներկայությունը շատ կարեւոր է»։ Նախաձեռնության համակարգողներից Մաքսիմ Սարգսյանն ավելին ասել չցանկացավ, նա նախընտրում է խորհրդավորությունը պահպանել․ «Դեռ չակերտները չենք բացում, այն, ինչ որ գրված է իվենթում, դա է, երիտասարդների համախմբում, այդպես է գրված, բայց նաեւ գրել ենք բազմաթիվ անգամներ, որ հոգով երիտասարդների ներկայությունը խիստ կարեւորում ենք՝ անկախ անվանումից, ու դեռ այս պահին այսքանը»։ Ֆեյսբուքյան «իվենթում»՝ հրավերում, ի դեպ, մասնակցության մասին պատրաստակամություն է հայտնել արդեն 719 մարդ։ Թե այդքան մարդ ինչպես է տեղավորվելու փոքրիկ այգում, հարցականի տակ է, ամենայն հավանականությամբ, Բաղրամյանը նորից փակվելու է մարդկանց քանակից։