Բրիտանացի խորհրդարանականները պահանջում են «Իսլամական պետության» գործողությունները ցեղասպանություն ճանաչել

Մեծ Բրիտանիայի ավելի քան 60 խորհրդարանականներ նամակ են հղել վարչապետ Դևիդ Քեմերոնին՝ ՄԱԿ-ի վրա ճնշում գործադրելու խնդրանքով, որպեսզի «Իսլամական պետություն» խմբավորման գրոհայինների կողմից Սիրիայում և Իրաքում քրիստոնյաների, ինչպես նաև մյուս կրոնական փոքրամասնությունների սպանություններն ու խոշտանգումները ճանաչվեն ցեղասպանություն: Այս մասին հաղորդում է bbc.com-ը:

Նամակն ստորագրել են Մեծ Բրիտանիայի խորհրդարանի Ստորին պալատի 66 անդամ, որոնց թվում են 3 անգլիկան եպիսկոպոսներ, գիտնականներ, իրավաբաններ և այլն:
Նրանք ցանկանում են, որ Քեմերոնն օգտագործի իր ողջ քաղաքական ազդեցությունը, որպեսզի հենց «ցեղասպանություն» բառը օգտագործվի Սիրիայում և Իրաքում «Իսլամական պետության» գործողությունների վերաբերյալ:

Որպես այդ տեսակետի ապացույց նրանք բերում են «Իսլամական պետության» զինյալների կողմից կրոնական առաջնորդների սպանությունները, զանգվածային սպանությունները, խոշտանգումները, հանուն փրկագնի և սեքսուալ ստրկության առևանգումները, քրիստոնյա կանանց և աղջիկների, ինչպես նաև այլ կրոնական ներկայացուցիչների նկատմամբ բռնությունները: