Տարվա մարդը՝ զինվոր
Գիտե՞ք, ես առանձին որևէ զինվորի մասին գրել չեմ ուզում: Թե ում անունն ինչպես է, ով որտեղ է ծառայում, որ սահմանն է պահում, ով ում տղան է, որ գյուղից:
Բոլորի անունը նույնն է՝ զինվոր, բոլորն ընդհանուր մի մայր ունեն՝ ժողովուրդ ու տարածքը մեկն է՝ Հայաստան:
Ֆեսբուքում այս այս պայծառ լուսանկարն է շրջում: Թոռը տատի հետ:
Նայե՜ք տատիկի աչքերին, ինչքան էլ փորձում է իրեն ուրախ ցույց տալ, բայց աչքերի անկյուններում ծվարել է սահմանը ոչ խաղաղ լինելու վախը, բայց չանտեսեք, որ թոռան գրկում ինչքա՜ն ապահով է զգում իրեն, ինչքա՜ն հպարտ ու երջանիկ:
Տատն աչքերով խոսում է.
-Աստված, պահպանիր գառիս, իմ հույսը դու ես, պահպանիր բոլոր գառներին…
Իսկ թոռը, ով երևի 19 տարեկան կլինի, պատասխանում է աչքերով.
-Տատ ջան, ես արդեմն մեծ եմ ու պիտի պաշտպանեմ իմ օջախը:
Եթե նայեք խոսող աչքերին, ինչքա՜ն բան կգտնեք, որ ոչ մի նկարիչ չի կարող արտահայտել այդպե՜ս խոսուն, իրական:
Սա տատ ու թոռ նկար չի, ժողովուրդ ու զինվոր նկար է:
Հանրության ողջ սերը, գուրգուրանքը, նվիրվածությունը, մտահոգությունը, քնքշանքը զինվորի հետ է:
Ներող եղեք, հայրեր ու մայրեր, տատեր ու պապեր, որ ձեր տղան ժողովրդինն է, որ մեղրի պես անուշ այս տատի մեղրածոր հայացքով մի ողջ ժողովուրդ է սպասում զինվորի վերադարձին:
Սա՛ է տարվա լուսանկարը ու սա պիտի լինի տարվա լուսանկարը՝ մայրական անափ սեր:
Թե չէ տարվա ամեն ինչը հնարեցիք, բայց սահմանը պահող, կյանք նվիրաբերող զինվորի մասին ոչ մի խոսք:
Զինվորին եմ համարում բոլոր առումներով տարվա մարդը: Նորից եմ կրկնում, կարևոր չէ՝ ով է նա, ում տղան է, որ սահմանն է պահում…
Կարևորն այն է, որ մեր գիտակցության մեջ տարվա մարդ համարենք զինվորին:
Սահման պահող զինվորին:
Մեր տղուն:
Հասմիկ Բաբաջանյան
Կարծիքներ