«Համախմբումը» կարող է համախմբվել ընտրություններից հետո

Վարդան Օսկանյանի ղեկավարած «Համախմբում» կուսակցության անդամ, ԱԺ պատգամավոր Էլինար Վարդանյանը կարծում է, որ իրենց կուսակցությունը Գյումրիում ռեալ շանսեր ունի՝ անցնելու Գյումրու ավագանու կազմ։ Ըստ նրա՝ Գյումրին այն տարածքն է, որտեղ բնակչությունը կարողանում է իր հստակ դիրքորոշումն արտահայտել ընտրությունների նկատմամբ։ Հիշեցնենք՝ հոկտեմբերի 2-ին Գյումրիում տեղի կունենան ավագանու ընտրություններ, որով էլ կորոշվի, թե ով է լինելու քաղաքապետը։ Մասնակցում են 10 կուսակցություն եւ մեկ դաշինք՝ գործող քաղաքապետի գլխավորած «Բալասանյան դաշինքը»։

-Շանսեր ունե՞ք անցնելու Գյումրու ավագանի, թե՞ ձեւավորելու եք իշխանություն։

-Ես առաջ չեմ անցնի, բայց մի բան ակնհայտ է, որ ընտրություններից հետո եւս կոալիցիաները չեն բացառվում այլ ընդդիմադիր կուսակցությունների հետ, իսկ դա նշանակում է չբացառել ավագանու իշխող դիրքը։

-Դրանից հետո կարո՞ղ է հետեւել իմպիչմենթ հաղթած թեկնածուին, եթե նա ձեր սրտով չլինի։

-Ես կանխատեսումներ անելու ցանկություն չունեմ, բայց ես, էլի եմ կրկնում, մեր շանսերը ռեալ եմ գնահատում եւ, միեւնույն ժամանակ, ռեալ եմ գնահատում այլ ընդդիմադիր ուժերի հետ հետագա դաշինքներ կազմելը։

-Իսկ ի՞նչն էր խանգարում մինչեւ ընտրությունները դաշինքով հանդես գալ։

-Այդ մասին, թերեւս, բազմիցս հնչել է։ Եղել են բանակցություններ, վերջնական լուծման չենք եկել, բայց նախնական դաշինքների բացակայությունը չի բացառում հետո դաշինքներ կնքելու հնարավորությունը։

-Կա՞ն ուժեր, որոնց հետ հետագայում հնարավոր համարում եք կնքել այդ դաշինքը։

-Ես չեմ բացառում ընդդիմադիր ցանկացած ուժի հետ դաշինք կազմելը։

-Ձեր կարգախոսն է՝ «Համախմբում հանուն Գյումրիի»։ Իսկ ո՞ւմ հետ համախմբվեցիք, որովհետեւ կարծես թե միանձնյա եք մտել պայքարի մեջ։

-Համախմբում հանուն Գյումրիի՝ թերեւս չի նշանակում միայն որեւէ ուժի հետ համախմբում, այլ նաեւ նշանակում է քաղաքացիների համախմբումը հանուն Գյումրիի։ Այսինքն՝ քաղաքացիներն իրենք կարող են համախմբվել՝ Գյումրիում իրենց վճռական դիրքորոշումը հայտնելու եւ Գյումրիում փոփոխություններ մտցնելու։ Բացի այդ, գործընթացն այնպիսին է, որ նախընտրական գործընթացը հետընտրական համախմբումը չի բացառում։

-Ամեն դեպքում՝ «Համախմբման» փիլիսոփայությունն իր մեջ ավելի լայն կոնսոլիդացիա չէ՞ր ենթադրում քաղաքական ուժերի հետ։

-Այո, դա է ենթադրում, եւ մենք դա երբեւէ չենք էլ բացառել, բայց միայն այդ ամենը պրոյեկտել մեկ փոքրիկ ընտրության վրա, թերեւս տեղին չէ։ Այո, այս անգամ նախնական դաշինքներ, կոալիցիաներ կազմելու հնարավորություն չեղավ, բայց ես էլի կկրկնվեմ՝ դա չի բացառում հետընտրական դաշինքների եւ կոալիցիաների կազմումը։ Միեւնույն ժամանակ «Համախմբումը» ենթադրում է ցանկացած կուսակցության համախմբում։

-Ձեր կուսակցության նորաստեղծ լինելը կամ որոշ անձանց հետ ասոցացվելը կապ ունի՞, որ այլ քաղաքական ուժեր վարանել են համագործակցել ձեզ հետ, կամ գուցե վստահության պակա՞ս կար։

-Ես չեմ կարող պատասխանել այլ քաղաքական ուժի փոխարեն, բայց Ձեր կողմից նշված հանգամանքները, թերեւս, այնքան էական չեն, որովհետեւ կուսակցության նորաստեղծ լինելը դեռեւս չի նշանակում, որ դա որեւէ կերպ ազդում է կուսակցության հեղինակության վրա։ Պարզապես կուսակցության գրանցումից հետո միանգամից ընտրություններին մասնակցելու ժամանակահատվածը, իրականում, շատ կարճ էր։ Բայց ես չեմ կարծում, թե վստահության պակաս կար, պարզապես տեխնիկական խնդիրներ կային։

-Գյումրու վերջին ողբերգական դեպքի վերաբերյալ ի՞նչ գնահատական կտաք, ըստ Ձեզ, այդ դեպքը որքանո՞վ կազդի հոկտեմբերի 2-ի ընտրությունների վրա։

-Իհարկե, շատ ցավալի է, որ ընտրական պրոցեսում տեղի ունեցան այնպիսի իրադարձություններ, որոնք ցանկացած հասարակության համար անընդունելի են։ Ես կարծում եմ, որ իրավապահ մարմինները պետք է ձեռնարկեն բոլոր հնարավոր միջոցառումները թե՛ դեպքի պատշաճ քննության համար, թե, իրականում, Գյումրիում ծագող բոլոր հարցերին պատշաճ պատասխաններ տալու համար։ Թե ինչպիսի ազդեցություն կունենա, ես՝ ինքս, չեմ կարող կանխատեսել. երկու օր հետո կլինեն ընտրություններ, ու արդյունքներն իրենք ցույց կտան հասարակության վերաբերմունքը ե՛ւ նախընտրական քարոզարշավին, ե՛ւ դրա ընթացքում տեղի ունեցած իրադարձությունների վրա։

-Վերջին հարցը. ձեր հիմնական մրցակիցը ո՞ր ուժն է Գյումրիում, ձեզ համար «Բալասանյան դաշինքը» համարվո՞ւմ է ֆավորիտ թեկնածու, եւ արդյոք հենց նրա՞նց դեմ եք պայքարելու։

-Այսպես ասեմ՝ մենք պայքարում ենք գործող համակարգի եւ գործող իշխանության դեմ։ Թերեւս դրանով ամեն ինչ ասված է։

Վահե ՄԱԿԱՐՅԱՆ