Արդարադատության փոխնախարարը տեղյակ չէր տարիներ ի վեր գործող «անարդար» ավտոկայանատեղիներից

Ազգային ժողովում ՀՀ 2017 թվականի բյուջեի նախագծի քննարկման ժամանակ ԱԺ պատգամավոր Թևան Պողոսյանը կարմիր գծերի հետ կապված հարց ուղղեց ՀՀ արդարադատության նորանշանակ փոխնախարար Արթուր Հովհաննիսյանին։ Նկատենք, որ արդարադատության նախարար Արփինե Հովհաննիսյանը քննարկմանը ներկացավ միայն նիստի սկզբում, հետո պարզվեց՝ գործուղման է, ուստի հեռացավ և նրա փոխարեն որպես զեկուցող հանդես եկավ նրա առաջին տեղակալը՝ Արթուր Հովհաննիսյանը։

Թևան Պողոսյանը վերջինից հետաքրքրվեց ավտոկայանատեղիների հարցում տիրող մի անարդարությունից, թե ինչպե՞ս է ստացվում, որ քաղաքում գործում են կարմիր գծանշումներով վճարովի ավտոկայանատեղիներ, բայց որոշ մասնավոր օբյեկտների՝ խանութների, ռեստորանների տերեր իրենց օբյեկտների դիմացի այդ գծանշումներով կայանատեղիները սեփականացնում են և թույլ չեն տալիս այլ անձինք այդ տարածքում մեքենա կայանեն։

Ի պատասխան՝ արդարադատության նախարարի տեղակալն ասաց միայն հետևյալը․ «Տեղական տուրքերի մասին օրենքով նախատեսված է մի ռեժիմ, երբ որ տնտեսվարող սուբյեկտը համայնքի հետ պայմանավորվում է, որոշակի ամսական կամ տարեկան գումար է վճարում և այդ տարածքում իր համար կազմակեպում է ավտոկայանատեղի, որտեղ կարող է սահմանափակել կամ չսահմանափակել այլ մեքենաների մուտքը։ Բայց սրա համար կան հստակ պահանջներ, այսինքն՝ այդ ավտոկայանատեղիում պետք է լինի համապատասխան ցուցանակ, որտեղ պետք է գրված լինի՝ ծառայողական մեքենաների համար։ Բաց է մնում այդ հարցը, հստակ չի երևում օրենսդրությունից, որ նման ծառայողական ավտոկայանատեղիների կազմակերպման դեպքում պե՞տք են կարմիր գծերը լինեն, թե՞ ոչ։ Իսկ եթե չկա ցուցանակ ծառայողական մեքենաների կայանատեղի լինելու մասին փաստող, կարմիր գիծ է, կա վահանակ, որ սա վճարովի ավտոկայանատեղի է, սակայն ինչ-որ մի սուբյեկտ երկաթ է դնում և արգելում է այլ անձանց այդտեղ կայանել, ես գտնում եմ, որ սա խնդրահարույց հարց է, և պետք է ուսումասիրություններ կատարել՝ բացառելու նման դեպքերը, սա անօրինական երևույթ է»։

Քանի որ փոխնախարարի պատասխանում խնդրի լուծումը չէր մատնանշվում և ավելի շատ պատգամավորի բարձրաձայնած մտահոգության կրկնությունն էր, փորձեցինք պարոն Հովհաննիսյանից առանձին մեր հարցերի միջոցով հասկանալ՝ ինչպես է պատրաստվում այս խնդրին լուծում տալ։

-Պարոն Հովհաննիսյան, Դուք Ձեր պատասխանում, կարծես թե, ավելի շատ արտահայտեցիք այն մտահոգությունը, ինչ բարձրաձայնեց պատգամավորը։ Հիմա ես Ձեզնից ավելի շատ խնդրի լուծում մատնանշող որևէ պատասխան եմ ակնկալում՝ Դուք Ձեր մասով ինչպե՞ս եք պակերացնում այս հարցի լուծումը։

-Ես կզեկուցեմ նախարարին, ենթադրում եմ՝ կբարձրացնեն այդ հարցը կառավարությունում, որովհետև պատասխանատու մարմինները տարբեր են, միգուցե կլինեն արագ հանձնարարականներ, միգուցե կստեղծվի աշխատանքային խումբ, այսինքն՝ հարցի լուծման մեխանիզմը այս պահին դեռևս կքննարկենք։ Համենայնդեպս, ես իրավական կողմը ներկայացրի, որ իրավական խնդիր կա։ Եթե կարմիր գիծ է, կա վճարովի կայանատեղիի տրաֆարետ և երկաթ է դրված, կամայականորեն չեն թողնում, որ այդտեղ մեքենա կայանի, դա արդեն․․․

-Ենթադրում եք, որ նախարարը, նախարությունը կամ այլ պատկան մարմինները այս խնդրի մասին նո՞ր պետք է իմանան։

-Ես, ճիշտն ասած, այսօր լսեցի, որ այդ հարցը բարձրաձայնվեց հենց արդարադատության նախարարության անունից, որպեսզի մենք ևս հետևողական լինենք, պետք է նաև հարցը քննարկել, ենթադրում եմ, քաղաքապետարանի հետ, ով անմիջական պատասխանատուն է ավտոկայանատեղերի կազմակերպման հետ կապված, միգուցե տեխնիկական հարց է՝ տրաֆարետներն են մոռացել դնեն, որ սրա համար մենք վճարել ենք մի տարով, սա մեր ծառայողական կայանատեղին է, ուղղեն այդ սխալը, միգուցե քաղաքապետարանը միջոցներ ձեռնարկի։

-Ինքներդ մեքենա վարու՞մ եք, բախվե՞լ եք այդ խնդրին։

-Հա։ Բայց ճիշտն ասած՝ ոչ, չեմ բախվել, ուղղակի ուշադիր չեմ եղել, որ երկաթ լինի ու կարմիր գիծ լինի։

-Այսինքն՝ երբևէ չի՞ պատահել, որ փորձեք կայանել որևէ սուպերմարկետի դիմաց՝ որպես հաճախորդ, այնտեղ կարմիր գիծ լինի, բայց Ձեզ արգելեն կայանել։

-Այն սուպերմարկետները, որոնցից ես օգտվում եմ, այնտեղ մասնավոր ավտոկայանատեղի է, անվճար։

-Ամեն դեպքում տարօրինակ է, որ նոր եք լսում այս մասին, քանզի այդ մասին և՛ մամուլի հրապարակումներ են եղել, այդ թվում՝ մեր կողմից, նաև վարորդներն են բազմիցս այդ խնդրի մասին բարձրաձայնել։ Հիմա թեկուզ նոր տեղեկանալով և զեկուցելով նախարարին՝ որևէ շոշափելի արդյունք կարո՞ղ ենք առաջիկայում ակնկալել։

-Միջոցներ կձեռնարկենք՝ ինչպես լուծել այդ հարցը, հիմնական պատասխանատուների հետ կխոսենք, և կարծում եմ՝ սա այն լուրջ հարցը չէր, որ չի կարող շատ արագ լուծում ստանալ։

Վահե ՄԱԿԱՐՅԱՆ