Հայաստանի իշխանությունը լեգիտիմ չէ. 2021թ. խորհրդարանական ընտրությունները եւս կարող էին կեղծված լինել

«Քաղաքացիական պայմանագիր» կուսակցության վարչության անդամների ընտրության ժամանակ կատարված եւ «Հրապարակի» շնորհիվ բացահայտված ընտրակեղծարարության փաստը կասկածի տակ է դնում Հայաստանի ամբողջ իշխանության լեգիտիմությունը: Եթե ՔՊ-ականները կարող էին կեղծել վարչության անդամների ընտրությունները, ինչո՞ւ չէին կարող կեղծել համապետական ընտրությունների արդյունքները: Մանավանդ որ այդ ընտրությունների արդյունքները կեղծելուց էր կախված իշխանությունը պահել-չպահելու հարցը: Թվում է, թե ՔՊ-ում այնքան ժողովրդավարություն կա, որ ընտրակեղծարարությունը բացահայտելուց հետո տեղի է ունեցել վերահաշվարկ, եւ արդարությունը վերականգնվել է: Այսինքն՝ ՔՊ-ականների մի մասը եւ ղեկավարությունը շահագրգռված են եղել, որ արդարությունը վերականգնվի։ Բայց շահագրգռված են եղել, քանի որ անարդարությունն ուղղված է եղել իրենց դեմ: Մինչդեռ համապետական ընտրությունների ժամանակ ՔՊ-ի կողմից իրականացված ընտրակեղծարարության բացահայտման հարցում շահագրգռված չէր որեւէ ՔՊ-ական, քանի որ ընտրակեղծարարության շահառուն ամբողջ կուսակցությունն էր, իշխանական թիմը:

Կասկած չկա, որ ՔՊ վարչության անդամների ընտրություններում ընտրակեղծարարությունն իրականացվել է Փաշինյանի անմիջական հրահանգով: Ընտրակեղծարարության արդյունքում ՔՊ վարչության անդամ էին դառնալու փախվարչապետ Համբարձում Մաթեւոսյանը եւ ՔՊ խմբակցության ղեկավար Հայկ Կոնջորյանը: Դժվար է պատկերացնել, թե նրանց՝ վարչության անդամ դառնալու մեջ ով պետք է Փաշինյանից բացի շահագրգռված լիներ: Ամենայն հավանականությամբ, Փաշինյանը քաղաքականապես նպատակահարմար է գտել, որ վարչության անդամ դառնան փոխվարչապետը եւ խմբակցության ղեկավարը, մանավանդ որ նրանք իրենց հնազանդ էությամբ ավելի կառավարելի են Փաշինյանի կողմից, քան որեւէ մեկը:

Ընտրակեղծարարության թիվ մեկ մեղավոր եւ պատասխանատու է հռչակվել Արփի Դավոյանը: Հնարավոր է, որ նա ընտրակեղծարարության կազմակերպիչն է, բայց նա ի՞նչ շահագրգռվածություն կարող էր ունենալ նման կեղծիք կազմակերպելու, առանց իր վերադասի`Փաշինյանի անմիջական հրահանգի: Չի բացառվում, որ ընտրակեղծարարության փաստը եւս բացահայտվել է ՔՊ-ի ներսում առկա ներխմբային հակամարտությունների հետեւանքով, եւ կուսակցության ներսում իրար մրցակից ուժերը փորձել են այդկերպ ցույց տալ, որ Փաշինյանն այլեւս կորցնում է իրավիճակի ամբողջական վերահսկողությունը: Մինչդեռ մեզ ավելի շատ հետաքրքրում է այդ բացահայտման արդյունքում իշխանության լեգիտիմության կորստի փաստը:

Հայաստանի Սահմանադրությամբ՝ իշխանությունը պատկանում է ժողովրդին: Ժողովուրդն է իշխանության աղբյուրը, եւ այդ իշխանությունը նա ձեւավորում է ընտրությունների միջոցով: Փաշինյանը ՏԻՄ ընտրությունների օրինակով արդեն բազմիցս ցույց է տվել, որ ժողովուրդը զրկված է առնվազն տեղական իշխանություններ ձեւավորելու իրավունքից, մի դեպքում՝ ընտրված քաղաքապետին կալանավորելով, մյուս դեպքերում՝ ընտրված քաղաքապետին պարտադրելով, որ հրաժարական ներկայացնի, մյուսներին ստիպելով՝ փոխել քաղաքական կողմնորոշումը: Համապետական մակարդակում մինչեւ նախորդ օրը ընդունված էր համարել, որ Փաշինյանի իշխանությունն ունի ժողովրդի մեծամասնության աջակցությունը, քանի որ 681 հազար մարդ քվեարկել է ՔՊ-ի օգտին: ՔՊ-ում ընտրակեղծարարության բացահայտումից հետո այլեւս կարելի է կասկածի տակ դնել նաեւ 2021 թվականի հունիսի 20-ի խորհրդարանական ընտրությունների արդյունքները: Եթե վարչապետի պաշտոնը զբաղեցնող Փաշինյանը կարող էր հրահանգել՝ կեղծել ՔՊ վարչության անդամների ընտրության արդյունքները, ինչո՞ւ չպետք է հրահանգեր Կենտրոնական ընտրական հանձնաժողովին՝ կեղծելու խորհրդարանական ընտրության արդյունքները: 

Այլեւս ամենայն վստահությամբ կարող ենք պնդել, որ 2021 թվականի խորհրդարանական ընտրությունները կեղծվել են, եւ Փաշինյանն ու ՔՊ-ն բռնազավթել են իշխանությունը: Փաշինյանի կողմից կառավարվող խմբակը ոչ միայն չի ներկայացնում հայ ժողովրդին եւ իրավունք չունի կառավարել Հայաստանը, այդ իշխանությունն իրավունք չունի Հայաստանը ներկայացնել նաեւ միջազգային հարաբերություններում: Հիմա առավել տրամաբանական բացատրություն է ստանում այն հարցը, թե ինչու է գործող իշխանությունն իրականացնում հակազգային եւ հակահայկական քաղաքականություն:

Հայաստանի ընդդիմությունն այլեւս պետք է պայքարի ոչ միայն Արցախի հարցում հակահայկական զարգացումներ թույլ չտալու, այլեւ 2021 թվականի կեղծված ընտրությունների արդյունքներն անվավեր ճանաչելու եւ իշխանությունը ժողովրդին վերադարձնելու համար: Մի՞թե արդարությունը գոյություն ունի միայն մեկ-երկու ՔՊ-ականի համար, ովքեր հասան ՔՊ վարչությունում իրենց տեղն ունենալու իրավունքի վերականգնմանը, իսկ մի ամբողջ ժողովուրդ տարիներ շարունակ պետք է հանդուրժի ՔՊ-ականների կողմից իրականացվող անարդարությունը եւ զրկված լինի սեփական երկրում օրինական իշխանություն ունենալու իրավունքից:

Քանի դեռ 2021 թվականի ընտրակեղծարարության հետեւանքները վերացված չեն, իսկ իշխանությունը գողացված է ժողովրդից, Հայաստանի քաղաքական օրակարգի թիվ մեկ հարցը պետք է լինի լեգիտիմ իշխանության ձեւավորումը:

Ավետիս Բաբաջանյան