Ծառուկյանը մատնացույց արեց «ժողովրդի թշնամու» տեղը

«Արարատցեմենտ» գործարան տանող ճանապարհը երեկվանից փակ է, աշխատակիցները շարունակում են բողոքի ակցիան եւ պահանջում հանդիպում ԲՀԿ առաջնորդ Գագիկ Ծառուկյանի հետ, որը գործարանի սեփականատերն է: Հիշեցնենք, որ շուրջ հազար աշխատակիցներ ծանուցագրեր են ստացել, որ հունիսի 15-ից ազատվելու են աշխատանքից: Գործարանի տնօրինությունը պարզաբանել է, որ Իրանից ներկրվող հումքի էժան լինելու պատճառով իրենց արտադրանքը մրցակցային չէ։ Բանն այն է, որ օրերս կառավարությունը նախագիծ է ներկայացրել, համաձայն որի՝ պետական տուրքը հանվելու է Իրանից ներկրվող ցեմենտի հումքի՝ կլինկերի վրայից, իսկ իրանական կլինկերն անհամեմատ էժան է, և դրա հետևանքով տեղական արտադրողները տուժելու են: ԲՀ խմբակցության ղեկավար Գագիկ Ծառուկյանն այսօր ԱԺ-ում անդրադարձավ իրեն պատկանող ցեմենտի գործարանում ստեղծված իրավիճակին:

Ծառուկյանի խոսքով՝ ստեղծված իրավիճակի  հիմնական պատճառն ԱԺ տնտեսական հարցերի մշտական հանձնաժողովի դիրքորոշումն է: Հիշեցնենք, որ վերոնշյալ՝ հումքի վրայից պետական տուրքը հանելու առաջարկն արել են հանձնաժողովի իշխող խմբակցության պատգամավորները:
«Քննարկվել էր էկոնոմիկայի նախարարի հետ, որ նայելով պարսկական ցեմենտը, ասենք թե, տեղի արտադրանքը՝ որոշումը ճիշտ կայացվել էր: Մենք էլ դրա համար 50 հազարը սարքել էինք 40 հազար, և ավելի մեծ պահանջարկ կըլնի: Բայց չգտեմ ով ինչ անձնական շահերի շնորհիվ՝ հանձնաժողովը որոշում է կայացրել՝ թող էդքան ընտանիք չաշխատի, այլ կլինկերի վրա, ասենք թե, տուրքը չդրվի: Հենց կլինկերը ցեմենտի ամենակարևոր մասն է, որը հիմնական ծախսերի 90 տոկոսն է: Ասենք եթե, 100 հազար տոննա, որն ինձ զեկուցել են կառավարիչները, ստանալու համար հարկավոր է 3 մլն դոլար գազի գումար վճարել, միլիոնուկես հոսանքի գումար վճարել, 1350 հոգու աշխատավարձ տալ: Իսկ եթե իրենք որոշում են կայացնում կլինկերի վրա տուրք չդնել, իրենց անձնական շահերի, որոշ ծանոթ-բարեկամների խնդիրը լուծել և պրովոկատորներին ուղարկել ցեմենտի գործարան, որ իրանք ընդհանրապես կապ չունեն ցեմենտի գործարանի հետ»,- ասաց Ծառուկյանը՝ անուններ չնշելով։ 

«Ի՞նչ ա եղել, հիմա մենք ցեմենտ չենք արտադրի, կլինկեր կբերենք, ի՞նչն ա խնդիրը: Եթե իրանք չեն մտածում և ասում են՝ թող մի քանի հարյուր ընտանիք էլ անգործ մնա… Համապատասխան մենք քայլ ենք կատարել, որ կարողանանք տնտեսական հեղափոխության համար քայլ կատարեն, բայց այսօր հանձնաժողովի նախագահը պարտավոր է պատասխան տալ: Քննարկելուց կտեսնենք, որ ժողովուրդն էլ իմանա, թե իրենց թշնամին ով ա: Կառավարությունը հանձնարարել ա, հարցը լուծված ա, թե ինչ փոխվեց հանձնաժողովում, դուք բոլորդ էլ ներկա կլինեք և կտեսնեք»,- նշեց նա: