«Ինֆարկտ» նախնական ախտորոշմամբ Գալեյանը տեղափոխվել է «Աստղիկ» ԲԿ
Հայկ Գևորգյան
24 Փետրվար 2024 | 12:29
0
«Վերջին դատական նիստով Գարիկ Գալեյանի խափանման միջոցի ժամկետը երկարաձգելուց և դրանով իսկ նրան Եռաբլուր զինվորական պանթեոն այցելելն արգելելուց հետո, Գարիկ Գալեյանի առողջական վիճակը կտրուկ վատացել է: Երեկ առավոտյան, «ինֆարկտ» նախնական ախտորոշմամբ Գալեյանը տեղափոխվել է «Աստղիկ» ԲԿ և ներկայումս գտնվում է վերակենդանացման բաժանմունքում:
Առողջական վիճակն այն աստիճան ծանր է, որ առժամանակ հնարավոր չէ վիրահատական միջամտություն կատարելը»: Նշում է Արցախյան 44-օրյա պատերազմում զոհված Մխիթար Գալեյանի հոր՝ Գարիկ Գալեյանի փաստաբան Վահան Հովհաննիսյանը:
Փաստաբանը «Հրապարակի» հետ զրույցում նշեց. «Այս պահին պրոգրեսիվ վիճակ է՝ բացասական առումով: Չեն կարողանում վիրահատական միջամտություն անել՝ ստենտավորել: Պետք է վիճակը կայունանա: Պետք է քննարկել խափանման միջոցը փոխելու միջնորդություն ներկայացնելու հարցը: Գուցե արտահերթ դատական նիստ հրավիրենք», - նշեց փաստաբանը:
Փաստաբան Հովհաննիսյանը պնդեց, որ Գարիկ Գալեյանի առողջական վիճակը կտրուկ վատացել է վերջին դատական նիստից հետո:
Կարծիքներ