«Հրապարակ». Հենց Փաշինյանի պատճառով է, որ Արցախի իշխանություններն անելանելի վիճակում են հայտնվել ու նստացույց են անում
«Հրապարակի» զրուցակիցն Արցախի «Արդարություն» կուսակցության համահիմնադիր Հակոբ Հակոբյանն է:
- Պարոն Հակոբյան, Արցախի Հանրապետության նախագահ Արայիկ Հարությունյանը եւս միացել է Ստեփանակերտի Վերածննդի հրապարակում տեղի ունեցող համազգային բողոքի ակցիային: Նրա ներգրավվածությունն ակցիային բավականին շատ քննադատությունների արժանացավ, հատկապես՝ Հայաստանում: Մարդիկ ասում են, որ գործադիր իշխանությունը պետք է քայլեր ձեռնարկի, լուծումներ գտնի, այլ ոչ թե քաղաքական ուժերի եւ ակտիվիստների նման ակցիաներ անի: Ի վերջո` ի՞նչ գնահատական կտաք Դուք: Ի՞նչ է սա նշանակում: Արդյո՞ք Արցախն այս աստիճան բարդ ու անհույս վիճակում է հայտնվել, որ երկրի նախագահն է նստացույց անում:
- Արցախում իրավիճակը ոչ միայն բավականին բարդ է, այլեւ` ծայրահեղ լարված: Յոթ ամիս շարունակ 120 հազար մարդու պահում են շրջափակման մեջ, իսկ ահա բոլորովին վերջերս էլ որեւէ տեսակ ապրանք չի մտնում Արցախ: Բնական է, որ այդ պայմաններում Արցախում ստեղծվելու էր ծայրահեղ լարված իրավիճակ, ուստի, Արցախի Հանրապետության նախագահի այս գործողությունները կարելի է հենց բացատրել դրանով: Մյուս կողմից էլ` մեզ համար անընդունելի է, նաեւ՝ անհասկանալի, թե ինչու է նման գործողությունների դիմում Արցախի նախագահը, քանզի նա ունի բոլոր տեսակի գործիքակազմերը, որպեսզի ոչ թե իջնի փողոց` նստացույց անի, այլ օգտագործի իր գործիքակազմերը` երկրում իրականացնելով ճգնաժամային կառավարում, կարողանալով մեղմել այս սարսափելի վիճակը:
- Գուցե իրավիճակն այնքան բարդ է, որ անգամ Հարությունյանն ի զորու չէ ինչ-որ բան փոխել եւ անզորությունից ակցիա է իրականացնում, որ աշխարհի ուշադրությունը բեւեռի այս իրավիճակի վրա: Շառլ Միշելն էլ առաջարկել է Արցախին` ինտեգրվել Ադրբեջանին, օգտվել Աղդամի ճանապարհից:
- Անզորության մեջ կարող է ընկնել ժողովուրդը, շարքային քաղաքացին, բայց ո՛չ երկրի նախագահը: Երկրի իշխանություններն անզորության մեջ ընկնելու իրավունք պարզապես չունեն, ցանկացած իրավիճակում պետք է ելք գտնեն, քանի որ պետություն ասվածը ստեղծվել է հենց նրա համար, որ կարողանան ճգնաժամային իրավիճակներում լուծումներ առաջարկել, ոչ թե անզորության մեջ ընկնել: Եթե Արցախի իշխանությունները ոչինչ չեն կարողանում անել, ուրեմն իրենց մեկ բան է մնում` հրաժարական ներկայացնել:
- Մի պահ պատկերացնենք՝ Արայիկ Հարությունյանը հրաժարական ներկայացրեց: Կա՞ այնպիսի ծանրակշիռ ու բանիմաց մեկը, որը կարող է, վերջապես՝ ցանկանում է ստանձնել այդ մեծ պատասխանատվությունը` վերցնել պատերազմող երկրի իշխանությունը, որն արդեն քանի ամիս է՝ բլոկադայի մեջ է: Բացառությամբ ինչ-որ մութ ուժերի կողմից ֆինանսավորվող անհայտ ու անփորձ երիտասարդների, կա՞ այդպիսի մեկը, որը նաեւ հանրային ճանաչում եւ ընկալում ունի:
- Կարծում եմ` քաղաքականության մեջ «եթե»-ներ չկան: Արցախի Հանրապետությունը զուրկ չէ նրանցից, ովքեր կարող են ստանձնել իշխանության պատասխանատվությունը: Թյուր է այն կարծիքը, որ եթե Արայիկ Հարությունյանը հեռանա, ոչ ոք չի կարողանալու իշխանություն վերցնել:
- Ոչ թե չի կարողանալու, այլ տպավորություն է, որ ցանկություն էլ չկա:
- Դրանք բոլորը ենթադրություններ են: Քաղաքականության մեջ չպետք է ենթադրություններով առաջնորդվել:
- Հայաստանի վարչապետ Նիկոլ Փաշինյանն ու նրա իշխանությունը փաստացի Արցախի դեմ հայտարարություններով են հանդես գալիս, ճանաչում են Ադրբեջանի տարածքային ամբողջականությունը` ներառյալ Արցախը: Նիկոլ Փաշինյանի պնդումների եւ ցանկությունների հետ արցախահայությունը համաձայն չէ, բայց նա շարունակում է ներկայացնել Արցախը, հանդես գալ ձեր անունից, որոշել ձեր ճակատագիրը: Ինչո՞ւ Փաշինյանին չեք զրկում ձեր իրավունքների մասին խոսելու եւ ձեր ճակատագիրը որոշելու իրավունքից:
- Այն, որ Նիկոլ Փաշինյանը նույնիսկ 2020 թվականից հետո իրավունք չուներ խոսելու, փաստ է: Նա առհասարակ չպետք է զբաղեցներ Հայաստանի Հանրապետության վարչապետի պաշտոնը, որովհետեւ նա պարտված ղեկավար է: Այնպես չէ, որ Արցախում Փաշինյանի հայտարարություններին չեն հակադրվում, սակայն դա պետք է հստակ ձեւակերպեն Արցախի Հանրապետության իշխանությունները, դա նրանց անելիքն է: Հենց նույն Փաշինյանի պատճառով է, որ Արցախի իշխանություններն անելանելի իրավիճակում են հայտնվել եւ նստացույց են իրականացնում: Նիկոլ Փաշինյանը ոչ միայն Արցախի մասին իրավունք չունի հայտարարություններ անել, այլեւ չունի իրավունք՝ խոսելու Հայաստանի մասին:
Կարծիքներ